Bantu basungunu bone bajirirana omu njira y’obukenge. Abalwala barhajira bukenge banalongoze abanganga babo; abakliya barhakengana banakalongoza abanyakazi b’omu restora; ababalama omu aviyo barhajira bukenge banakajirira kubi abakozi bamo; abana baba bigamba banakashekera abalimu babo, okubayobohya, n’okubajirira kubi, na bantu baguma na baguma bajira eby’epolitike banakajira ebintu bibi bwenene amango abandi bali basegeza kungaci baba bashinganine bakengwe.

 Ebibliya ebamo obulongozi bw’okulangalira lugenda oborhere bw’obukenge. Na kandi ehugwîre bulya gurhi ene bantu banji barhakengana.

 Omw’igulu lyoshi, oborhere bwinja bunashinganine bw’obukenge, burhaciri bwabonekana.

•   Eraporo yacizindig’ijirwa yayerekine oku abantu b’omu Amérique bayemire n’obwalagale oku olugenzi lw’abantu b’omu États-Unis lusherire bwenene kulusha oku byali omu myaka 22 egezire.

•   Obundi busagasi bwajiragwa oku bantu balushire 32 000 b’omu bihugo 28, bwayerekine oku bantu 65okw’igana (65%) barhacikengana ciru n’ehitya nk’oku byali embere.

 Ebibliya yali erhi yalebire obo borhere rhuli rhwabona ene.

•   “Omu nsiku nzinda amango mazibu ganayishe. Bulya abantu bayishikacilongeza bonene, bayishihira omurhima gwabo omu birugu, bayishikacikunga bône, bayishiba bacibonyi; bâkashobeka abandi busha, bayishiba bigamba, bantu barhishivuga omunkwa, bayunjulirine bubi; bayishiba baminya.”​—2 Timoteyo 3:1-3.

 Ly’omanya binji lugenda oku obo bulebi buli bwahikiriramwo ene, osome omwanzi gudesire; “Je, Biblia Ilitabiri Mitazamo na Matendo ya Watu Leo?”

 Mw’er’igulu lirhacibamwo bukenge, emiliyoni y’abantu yabwine oku Ebibliya enahâne obulongozi bwinja bwenene lugenda oborhere bwinja. Amakanuni gayo g’olugenzi “gâbêra ho ensiku n’amango.” (Ennanga 111:8, Mashi Bible) Rhuganirire nyiganyo nsungunu:

•   Ebi Ebibliya edesire: “Ngasi hyoshi mulonza abantu bammujirire, ninyu mubajirirehyo.”​—Mateyo 7:12.

   Ebi oko kuhugwîre: Rhushinganine rhukajirira abandi omu njira nyinja na ya bukenge, nk’oku nirhu rhwakalonza barhujirire.

•   Ebi Ebibliya edesire: “Lero nta kucikazinywerha, ci ngasi muguma akabwira ababo eby’okuli.”​—Abefezi 4:25.

   Ebi oko kuhugwîre: Rhushinganine rhukaba bikubagirwa omu nderho zirhu n’omu bijiro birhu byoshi.

 Ly’oyiga binji lugenda ogo mwanzi, wekasinga osome:

•   Ilabiro ly’Akalalizi lidesire “Nini Njo Itakusaidia Kujua Mambo ya Muzuri na ya Mubaya?”

•   Omwanzi gudesire “Kuvumilia Wengine​—Biblia Inaweza Kukusaidia.”