K’Obuminya Bwanacihwe?
Enyuma z’okurherwa n’abaminya, nkaba wanacidosa ntya: ‘Ka Nnâmahanga anarhushibirire? Bulya gurhi ebi biri byajirikana? K’obuminya a bwanacihwe? Gurhi nakahash’ilama n’obu boba boshi ngwerhe?’ Ebibliya ehânyire amashuzo g’okurhuliriza kw’ago madoso.
Gurhi Nnâmahanga abona obuminya?
Nnâmahanga ashomba obushumusi n’obuminya. (Ennanga 11:5; Emigani 6:16, 17) Na Yezu warhumagwa na Nnâmahanga, akalihire abanafunzi bage erhi balonz’ijira ebintu omu njira y’obuminya. (Mateyo 26:50-52) Ciru akaba bantu baguma na baguma banacikunge oku bali bajira ebijiro by’obuminya okw’izino lya Nnâmahanga, Nnâmahanga arhaba ayemire ebijiro byabo. Arhayumvirhiza ciru n’amasala gabo.—Izaya 1:15.
Nnâmahanga anashibirire balya boshi bali balibuka, bahiziremo balya bahumirweko n’ebijiro by’obuminya. (Ennanga 31:7; 1 Petro 5:7) Na kandi Ebibliya eyerekine oku Nnâmahanga ayish’iyusa obuminya.—Izaya 60:18.
Ecisisi c’obuminya
Ebibliya eyerekine n’obwalagale ecilerha obuminya. Edesire ntya: “Amango omuntu arhegesire owabo muntu, buhanya bwage.” (Omuhanûzi 8:9) Kurhenga mîra, abantu b’obuhashe bakolesize obuminya lyo balibuza abandi. Enyanya z’okulibuzibwa, abandi banakolese obuminya lyobacihôla.—Omuhanûzi 7:7.
Obuzinda bw’obuminya
Nnâmahanga alaganyize oku ayusa oboba n’obuminya n’oku analerhe omurhûla okw’igulu. (Izaya 32:18; Mikeyo 4:3, 4)
Ayish’ikûla ecisisi c’obuminya. Nnâmahanga ayish’ihererekeza amarhegesi ga bene bantu n’okushimika oburhegesi bwage burhambule igulu lyoshi. Omurhegesi w’obo burhegesi, Yezu Kristu, ayish’ikajirira abantu boshi aminja, ayish’iyusa okulibuzibwa na kandi ayish’iyusa obuminya. (Ennanga 72:2, 14) Mw’ago mango, obuminya burhakacihaba ciru n’ehitya. Abantu ‘bayish’ilama omu murhûla munene.’—Ennanga 37:10, 11, Mashi Bible.
Ayish’irhenza ebilerhwa n’obuminya. Nnâmahanga ayish’irhengeza bene bantu amazibu galerhwa n’obuminya, gabe ga mubiri erhi g’ekandalala. (Izaya 65:17; Amafulûlo 21:3, 4) Ciru alaganyize oku ayish’ifûla abafîre, lyo balama omw’igulu lirim’omurhûla.—Yowane 5:28, 29.
Ebibliya erhuhire ebirhumire binja by’okulangakira oku hano hofi-hofi Nnâmahanga ajira ntyo. Cikone nkaba wanacidosa ntya: ‘Bulya gurhi Nnâmahanga arhasag’iyusa obuminya?’ Ly’obona ishuzo, olole evideo edesire Bulya gurhi Nnamahanga Alekerire Amalibuko?
a Kanji-kanji “obuminya” buba buhiziremo ebijiro by’obushumusi; bijirirwa ba cikala, lyo babayobohya n’okulonza okulerha empindulo omu by’epolotike, eby’idîni n’omubiyerekire olubaga. Cikone, hali amango abantu barhaba n’entanya ziri kuguma lugenda ebijiro by’obuminya.
Olole n'Ebi Bikulikire
ENYIGIRIZO Z'OMUSINGI Z'EBIBLIYA
Bulya Gurhi Nnamahanga Alekerire Amalibuko?
Ebibliya ehanyîre ishuzo ly’okunali kw’er’idoso.
