“Amango nali mwana, mushinja wani akag’injirira kubi omu nderho n’omu njira y’omubiri ngasi lusiku luja oku nkuba. Enyuma z’okuheruka, nyamazala agendekera okunjirira kubi. Ye na larhazala bakag’injirira nka muja. Nakag’irhanya lugenda okuciniga.”​—Madhu, a w’omu Inde.

 Ikubuliro lishibirira eby’amagala omw’igulu lyoshi (OMS) lidesire ntya: “Okujirira abakazi omu njira y’obuminya kuba kuyenire omw’igulu lyoshi.” Liyerekine oku hofi mukazi muguma omu basharhu anajirirwe n’obuminya erhi kubakwa mango malebe omu kalamo kage.

 Erhi akaba oko kwakuhikire, nkaba wanakaciyumva nk’orhali omu bulanzi, nka ngasi aho ojire muntu mulebe akujirira kubi omu nderho, omu njira y’omubiri, erhi kukubaka. Enyanya z’oko kujirirwa omu njira y’obuminya erhi kubi bulya kone oli mukazi, nkaba wanakaciyumva nka bantu banji banarhanye ntya: ‘Abakazi barhaba ba bulagirire.’ Cikone, ka kobinali abakazi baba ba bulagirire omu masu ga Mungu?

 Olwandiko: “[Mungu] abalema omulume n’omukazi.”​—Omurhondêro 1:27.

 Amahugûlo: Mungu alemire abalume n’abakazi. Anabone oku boshi bashinganine okukengwa. Kandi, alonzize omulume “azigire mukage nk’oku acizigira yêne,” arhali omu kulonza okumurhegeka, kugerera enderho z’obukali erhi buminya. (Abefezi 5:33; Abakolosi 3:19) Bibonekine n’obwalagale oku Mungu anabone okulangwa kw’abakazi oku kuba kwa bulagirire.

 “Erhi ndi mwana, nakag’ibakwa n’abantu b’omu mulala gwani. Erhi ngwerhe myaka 17, omukulu wani w’akazi anyobohya oku ankula oku kazi akaba ntajijiri naye eby’enshonyi. N’enyuma z’okukula, nagayaguzibwe n’ibanie, ababusi, n’abalungu. Cikone buzinda nayiga lugenda Yehova, b Mulemi wirhu. Anabone oku abakazi baba bashinganine okukengwa. Oko kwanyemeza n’obwalagale oku aba anzigire n’oku mba wa bulagirire omu masu gage.”​—Maria, w’omu Argentine.

 Olwandiko: “Hali omwira mwinja olushire mwene wabo omuntu.”​—Emigani 18:24, Mashi Bible.

 Amahugûlo: Omwîra w’okunali anakurhabala. Erhi wakabona oku bihashikine, oganirire muntu mulebe olangalira oku oli waciyumva.

 “Omu myaka 20 yoshi, ntabwiraga omuntu yeshi-yeshi oku nakag’ibakwa. Enyanya z’oko, erhi nja nakula ntal’igwerhe omwishingo, nal’iyobohire, nanal’ivunisire omurhima. Cikone buzinda erhi mbwira muntu mulebe wali mubidu okuyumvirhiza ebyakag’impikira, nayumva oburhulirize bunji.”​—Elif, w’omu Turquie.

 Olwandiko: “Amalagirire ginyu goshi mugahire omu maboko [ga Mungu], bulya kushibirira ayorha ammushibirira.”​—1 Petro 5:7.

 Amahugûlo: Erhi osalira, kobinali Nnâmahanga anayumvirhize. (Ennanga 55:22; 65:2) Bulya anakushibirire, anakurhabala ly’ohugûkwa kunganaci kobinali oba wa bulagirire.

 “Okuyiga lugenda Yehova kwarhondera okuntabala nfume ebihulu by’ekandalala nabire nabyo enyanya z’okujirirwa kubi. Ene, nanayigulira Mungu ebiri oku murhima gwani kugerera isala. Kw’aba nka mwîra ohugûkwa bwinja oku ndi naciyumva.”​—Ana, w’omu Belize.

 Olwandiko: ‘Nyamuzinda . . . atwira enfûzi n’odwirhe arhindibuzibwa olubanja, lyo n’omuntu wàrhengaga omu bidaka alekikalibuza abandi n’ebihamba.’​—Ennanga 10:17, 18.

 Amahugûlo: Hano hofi-hofi, Mungu ayusa obubule boshi bw’obushinganyanya, buhiziremwo okujirira abakazi omu njira y’obuminya na buzira bwonjo.

 “Bwabire nka bufumu kuli nie okuyiga oku hano hofi-hofi Yehova ayusa enkomedu y’okujirira abakazi n’abanyere kubi. Oko kwarhumire naba n’omurhûla omu bukengere.”​—Roberta, w’omu Mexique.

 Ly’oyiga binji lugenda obulangalire Ebibliya ehânyire, bulya gurhi wanalangalira ebiragane birimwo, na gurhi Abahamirizi ba Yehova bahânamwo oburhable kurhenga omu Bibliya, ohûne owakuhaga eyi trakte akulambagirire.

 Orhôle ogu mwanzi omu format yakacapisibwa.