•   “E Chine yahânyire eraporo eyerekine oku ogu mwaka ecidurhu ‘cali cinji bwenene’ emwabo kulusha agandi mango goshi n’oku bo bwa kasharhu baba omu mango g’ecidurhu idaho liyumusiremo bwenene.”​—The Guardian, Nsiku 7/9/2022.

•   “G’omwaka gwa karhanu ogu ebihugo by’omu Afrique byalibûka enyanya z’okuyumûka bwenene kw’idaho.”​—UN News, Nsiku 26/8/2022.

•   “Ebulaya, maeneo abirhi oku asharhu gali omu mazibu g’okuyumûka bwenene kw’idaho. N’oko kuyumûka kuli kudarhi bwenene kulusha oku byamakaba omu myaka 500 egezire.”​—BBC News, Nsiku 23/8/2022.

 Balenga banji bali baderha oku oko kuyumûka kw’idaho kwagendekera kwananaciba kudarhi bwenene. Ka rhwanalangalira oku rhwanacibe n’amango minja gayisha? Bici Ebibliya edesire lugenda oko?

 Ebibliya yali erhi yalebire ntya lugenda gano mango girhu:

•   “Hâbe . . . ecizombo.”​—Luka 21:11.

 Kanji-kanji, okuyumûka kw’idaho kunarhume haba ecizombo erhi ishali. Oko kunyiha kw’ebiryo n’amazibu n’olufû kulerha biri byahikiriza obulebi bw’Ebibliya.​—Amafulûlo 6:6, 8.

 Ebibliya eyerekine n’obwalagale bulya gurhi Idaho ligendekire lyayumûka bwenene. Edesire ntya:

•   ‘Kurhali kwage okulambagira n’okusera omu [kulongoza, NWT] njira yage.’​—Yeremiya 10:23.

 K’okuderha oku bene bantu ‘barhakalongoza’ bwinja enjira zabo erhi kucirhegeka bone. Emihigo yabo mibi bakarhôla enakarhuma idaho lyayumûka n’okunyiha kw’amishi.

•   Abantu basomire eby’esiyanse baba bayenire oku mikolo minji ya bene bantu enakalerha ecidurhu omw’igulu lyoshi n’oko kuli kwarhuma idaho lyagendekera lyayumûka omw’igulu lyoshi.

•   Okulonza okuba na bintu binji, okurharhanya lugenda amango gayisha, kunarhume abantu bashereza emizirhu baharibisa amazingira, okukolesa kubi obuhirhi bw’omw’idaho, n’oko kunarhume amishi gaja gagana okw’igulu.

 Cikone Ebibliya ehânyire obulangalire.

 Ebibliya elaganyize oku Nnâmahanga ayish’iyusa amazibu galiho ene g’okunyiha kw’amishi. Gurhi ayish’ijiramwo ntyo?

1.  1. Nnâmahanga ayishi ‘herêrekeza balya bashereza igulu.’ (Amafulûlo 11:18) Ayish’ikûla ecirhuma amishi ganyiha, k’okuderha; banyakola-maligo, n’abantu bashereza amazingira lyo baba na bintu binji bwenene.​—2 Timoteyo 3:1, 2.

2.  2. “Obudaka buyumusire bwahinduka ciyanja.” (Izaya 35:1, 6, 7) Nnâmahanga ayish’iyusa ngasi buhanya bwalesirwe n’okuyumûka kw’idaho, n’okujira er’igulu libe paradizo eri mw’amishi minja na manji.

3.  3. “Onashîbirire idaho oliniese mw’enkuba, olibumbe buhirhi.” (Ennanga 65:9, Mashi Bible) Kugerera emigisho ya Nnâmahanga, ngasi muntu ayish’iba n’ebiryo binja n’amishi gacîre okw’igulu.