Liguma omu mwaka, Abahamirizi ba Yehova haguma n’emiliyoni y’abalalikwa babo omu igulu lyoshi banarhimanane lyo Bakengera olufû lwa Yezu, nk’oku anabarhegekaga. (Luka 22:19) Ako kasanzi kanarhurhabale okuhugûkwa obulagirire bw’ecijiro Yezu ajiraga erhi ahâna obuzine bwage erhi bene bantu barhumire. Na kandi ako kasanzi kanayerekane ebi enterekêro yage eba ehugwîre kuli rhwe; ene n’omu mango gayisha.​—Yowane 3:16.

 Erhi akaba wajire aha Kukengera Olufû lwa Yezu guno mwaka erhi nanga, gurhi wakayunguka n’enterekêro y’olufû lwa Yezu? Yezu ayigirizize oku rhushinganine rhujire bintu bibirhi by’obulagirire:

1.  1. Okuyiga lugenda Nnâmahanga na Yezu. Erhi Yezu asalira emunda Ishe w’omu mpingu ali, aderha erhi: “Akalamo k’ensiku n’amango kuli kukumanya, w’oyo Nyamuzinda w’okuli wenene, n’oyu warhumaga, Yezu Kristu.”​—Yowane 17:3.

2.  2. Okukolesa ebi oli wayiga. Yezu ayerekine oku rhushinganine rhukakolesa ebi rhuli rhwayiga omu kalamo kirhu. Kwa lwiganyo, omu kushwinja Amahubiri gage g’oku Ntondo gamanyikine bwenene, aha abantu boshi omurhima ‘bayumve ebinwa byage banabijire.’ (Luka 6:46-48) Ko n’oko, agandi mango aderha erhi: “Mukamanya ebyo mukanabijira mwaba ba bushagaluke.”​—Yowane 13:17, NWT.

 Ka wanasima oyige binji lugenda Nnâmahanga na Yezu? K’olonzize obe n’amahano gakakurhabala okolese ebi oli wayiga? Aha hali njira nguma na nguma wakabonamwo emyanzi yakakurhabala.

 Enjira yirhu y’okuyiga Ebibliya omukuganira buzira kuhâna kantu yamakarhabala bantu banji okuyiga Ebibliya n’okuyikolesa omu kalamo kabo.

•   Ly’omanya binji, oje oku bukarasa bw’Okulongoza ifunzo ly’Ebibliya.

•   Ly’obona gurhi ifunzo ly’Ebibliya haguma n’Abahamirizi ba Yehova lijirwa, olole evideo edesire Rhukuyegerezize okw’Ifunzo Lyawe ly’Ebibliya.

 Abahamirizi ba Yehova banajire entimanano kabirhi omu mugobe ahantu baharamiza Nnâmahanga hahamagalwa Nyumpa y’Obwami. Kw’ezo ntimanano rhunaganirire Ebibliya na gurhi rhwakakolesa enyigirizo zimuba omu kalamo kirhu.

 Ezo ntimanano ziba za bantu boshi; birhahûnyiri obe Muhamirizi ly’ozijako. Kushimbana n’akanga olimwo, wanahiga okuja oku ntimanano busu oku busu erhi kugerera e vidéoconférence.

•   Ly’omanya ebijirwa kw’ezo ntimanano, olole evideo edesire Bici Bijirwa Aha Nyumpa y’Entimanano?

•   Olonze entimanano ejirwa hofi n’aha olama omu kulola obukarasa Entimanano z’Ecigamba z’Abahamirizi ba Yehova.

 Myanzi minji n’evideo biri kw’eyi site y’e enternete byanakurhabala oyige binji lugenda enyigirizo za Yezu n’obunguke bw’enterekêro y’olufû lwage.

 Kwa lwiganyo, ly’oyiga gurhi olufû lwa muntu muguma lwakalerheramwo bantu banji obunguke, osome emyanzi edesire “Omu Njira Nci Yezu Acungula?” na “Sababu Gani Yesu Aliteseka na Kufa?” erhi olole evideo edesire Bici Byarhumâga Yezu Afâ?