Ene Abahamirizi ba Yehova bali bapata biryo binji by’ekiroho kugerera ebikolanwa by’ecielektronike kulusha agandi mango goshi. Cikone hantu hanji omw’igulu, bene wirhu barhajira buhashe bw’okukolesa e Enternete. Abandi baba balamire omu maeneo e Enternete erhakola bwinja erhi ciru omu maeneo erhabamo.

 Ciru akaba ntyo, bene wirhu na bali birhu banji bakola bagwerhe obuhashe bw’okuba n’ebicapo birhu by’ecielektronike ciru akaba barhagwerhi Enternete! Gurhi oko kuhashikanamwo?

 JW Box ciba cikolanwa cisungunu ebigamba birhajira buhashe bw’okuja oku Enternete bikolesa. Omu JW Box muba akantu kahamagalwa routeur rhwaguliraga barhunzi baguma, muli eprograme y’e ordinatere Edepartema y’Ebeteli eba Eyimangire eby’e Ordinatere yatulaga, n’evideo n’ebitabu by’ecielektronike biba oku jw.org. Eco cikolanwa cinakagulwa hofi dolare 75.

 Aha Nyumpa y’Entimanano egwerhe eco cikolanwa, bene wirhu na bali birhu banakakonekte etelefone erhi tablete zabo oku JW Box omu kukolesa e wifi na ntyo banateleshargé ebitabu n’amavideo. Ciru na bala bajira etelefone za mîra erhi ez’ibeyi lisungunu nabo banahash’irhôla kw’ebyo bitabu n’evideo. Cikone gurhi ecigamba cakahira ebintu bihyahya mw’eyo JW Box erhi akaba ciba omu eneo erhabamo Enternete? Etawi enakalugirhuma e flash ya USB ekalugigulwa hofi dolare 4. Ngasi flash ebamo ebitabu n’evideo biba oku jw.org byakahirwa omu JW Box.

 Gurhi JW Box erhabalamwo bene wirhu? Ishe wa mulala muguma ohamagalwa Nathan Adruandra, olama omu République Démocratique du Congo, ahugwîre ntya: “Najira okwani koshi lyo ntôla edrame edesire ‘Ee Yehova, . . . Nimekutegemea Wewe,’ n’edesire Mukumbuke Bibi ya Loti. Cikone ntahashag’izirhôla, navunika omurhima. Cikone ene nkola ngwerhe obuhashe bw’okuzihira omu telefone yani, n’oko kunarhurhabale rhuli babusi rhuyigirize abana birhu bwinja.”

 Mwene wirhu muguma w’e Nigeria okarhabala ebigamba okubihirira JW Box, adesire ntya: “Bene wirhu banakabona JW Box nka ngalo yago-yago erhenga emwa Yehova. Baba bashagalusire bwenene bulya banahashirhôla ebitabu n’evideo biba omu Bikolanwa by’Omwigiriza buzira mazibu.”

 JW Box 1 700 na kulusha zo za makarhumirwa bene wirhu b’omu Afrique, Océanie, n’ab’omu Amérique du Sud, n’emihigo eri yarhôlwa lyo bayirhumira ebindi bigamba binji kulusha. Ngahi ensaranga z’okugula ebyo bikolanwa zirhenga? Zinakajirwa kugerera oburhabale buhânwa omu kulunga okuboko omukolo gw’omw’igulu lyoshi. Burhabale bunji bujirwa kugerera donate.pr418.com. Rhummuvuzire omunkwa kuli obo burhabale bwinyu.