Yehova Nnâmahanga alonzize abantu boshi bayige binji lugenda ye n’Obwami bwage ciru akaba bali omu kanga kahi. (1 Timoteyo 2:3, 4) Co cirhuma Abahamirizi ba Yehova bajira okwabo koshi lyo bacapisa Ebibliya n’ebindi bitabu biyimangire oku Bibliya lyo barhabala bantu banji bahiziremo n’ebihuli bayige Ebibliya. Enyanya z’oko ikubuliro lirhu linacapise bicapo binji bibe mavideo omu lulimi lw’orhuduma. a Wananabona ebyo bicapo omu ndimi z’orhuduma zilushire 100! Gurhi rhucapisamwo ebyo bichapo n’okubigabira ababilagirireko? Na gurhi rhwakubwiremwo ogo mukolo kulusha oku byali embere?

 Haba ebigusho bya bene wirhu na bali birhu bahindula ebicapo birhu omu ndimi z’orhuduma omw’igulu lyoshi. Abantu ba muli ngasi cigusho, banakaciyigiriza kwa buliri ecicapo bahindula. Enyuma z’aho banahiga njira ehi nyinja bakahânamwo eyo myanzi omu lulimi lw’orhuduma. Erhi bayusa bajira ntyo banajire emyanzi eri mw’eco cicapo ebe video. Mwa gano mango, hali bigusho 60 bya bene wirhu na bali birhu biri byahindula ebicapo biyimangire oku Bibliya ngasi mango omu ndimi z’orhuduma, hanali bindi 40 bijira ntyo mango maguma na maguma.

 Omu mango gageraga, byakag’ihûna nsaranga nyinji lyo rhujira amavideo omu lulimi lw’orhuduma. E caméras n’ebindi bikolanwa by’okujira evideo byakag’igula nsaranga nyinji bwenene kulusha oku bili buno. Nakandi, rhwene rhwakag’iyubaka enyumpa erhi kuzikubûla lyo ziba studio rhwa arejistrizemo amavideo. Byakag’ihûna rhukolese dolare 30 000 b lyo rhuba n’ebikolanwa ecigusho c’okuhindula ebicapo birhu omu lulimi lw’orhuduma cilagirireko.

 Lyo rhukolesa bwinja oburhabale bwa bene wirhu na bali birhu, ikubuliro lirhu lyakubûla oku ebicapo birhu byakag’ihindulwa omu lulimi lw’orhuduma lyanalembuhya ogo mukolo. Rhukola rhuli rhwakolesa ebikolanwa bya mwa gano mango biri byakola bwinja, birhanali by’ibeyi linji. Ahali h’okukolesa e studio, ebigusho by’okuhindula ebicapo birhu omu ndimi z’orhuduma binakahira ecitambara c’irangi ly’akasi n’okujirira e arejistrema omu biro byabo. Amango hali obulagirire bwa bantu banji lyo bajira cicapo cilebe, bene wirhu na bali birhu banaarejistrize emwababwe erhi omu biro byabo ehigabi bahîrwe buzira kuba n’obulagirire bw’okuja omu studio.

 Na kandi rhwajijire eprograme zikolesibwa n’e ordinatere lyo zikarhabala abaarejistre ebyo bicapo lyo bakajira omukolo gwabo bwinja. Ezo mpindûlo zanyihize kali makumi arhanu okw’igana oku kasanzi abahindula ebicapo birhu omu ndimi z’orhuduma bakag’ikolesa lyo bayusa ecicapo. Bene wirhu bashagalukire ezo mpindûlo. Mwene wirhu muguma ohamagalwa Alexander adesire ntya: “Rhukola rhukahira video nyinji z’olulimi lw’orhuduma oku site yirhu y’e Enternete kulusha oku byali embere. Nshagalukire oko bwenene. Nankalola amavideo ngasi lusiku.”

 Ene rhukola rhukakolesa ensaranga zirhahisiri oku dolare 5 000 lyo rhugulira ecigusho c’okuhindula ebicapo omu lulimi lw’orhuduma ebikolanwa cilagireko. Oko kuli kwarhuma rhwajira video nyinji omu ndimi nyinji z’orhuduma.

 Erhi ecigusho c’okuhindula ebicapo ciyusa ca arejistre ecicapo omu lulimi lw’orhuduma, ezo video zishinganine zihikire abazilagirireko. Mango mîra rhwakag’ihâna amakaseti g’e video n’ama DVD, cikone byakag’ihûna nsaranga nyinji, kasanzi kanji, na mikolo minji. Rhwakag’iha abarhunzi amaarejistrema girhu lyo barhujirira makaseti g’evideo manji na ma DVD manji. Na buzinda ago makaseti g’e video n’ama DVD gakag’irhumwa omu bigamba. Omu mwaka gwa 2013 mone, rhwayusize dolare zirhalusire 2 000 000 lyo rhujira ama DVD omu lulimi lw’orhuduma.

 Ebihuli byakag’ishagalukira eyo mipango bwenene. Cikone, okukolesa amavideo kwali kuzibu, ci bwenene erhi omubale gw’amakaseti n’ama DVD gukayushuka. Omu kanga kelebe, byakag’ihûna ma DVD manji lyo rhu arejistre citabu ciguma c’Ebibliya. Mwene wirhu Gilnei w’e Brésil akengire ntya: “Erhi rhwakalonzize okusoma lwandiko lulebe, byakag’ihûna rhulonze akaseti k’evideo lulimo na buzinda rhwanalulonza. Birhali bilembu ciru n’ehitya.” Mwali wirhu muguma wakag’ikolesa ama DVD g’olulimi lw’orhuduma ohamagalwa Rafayane, adesire ntya: “Okujira ifunzo ly’omuntu yene, kwakag’irhamya. Rhwakag’igeza kasanzi kanji rhuli rhwalonza amandiko erhi mahugûlo malebe.” N’erhi bene wirhu na bali birhu bakabire bali omu mukolo gw’amahubiri, bakag’ihêka ama DVD n’amakasiti g’evideo bayish’ikolesa oku televiziyo y’omuntu osimisibwe. Ciru na bene wirhu baguma na baguma bakag’ihêka ebyombo byabo by’okusoma e DVD. Cikone embere z’aho, hali ebyombo by’okusoma ama DVD oku écran na bene wirhu banji bakag’ibikolesa. Bobby, olama e États-Unis adesire ntya: “Erhi enyuma z’okuganirira lwandiko luguma, mwakalonzize okuganirira olundi, byakag’ihûna okukûla e DVD omu combo mwakag’ikolesa n’okuhiramo eyindi. Oko kwakarhôla kasanzi kanji, kwanakag’irhuma rhurhakolesa bwinja Ebibliya omu nganiro zirhu.”

 Omu mwaka gwa 2013, ikubuliro lya Yehova lyarhondera okukolesa e application ehamagalwa JW Library Sign Language, eri yarhabala bene wirhu na bali birhu okurhôla n’okulola evideo omu ndimi z’emihurha kugerera etelefone zabo erhi tablete. Olulimi lw’Orhuduma lw’e Amérique lo lwali lurhanzi okukolesa eyo application. Enyuma z’aho, omu mwaka gwa 2017, eyo application yakubûlwa buhyahya ly’ezindi ndimi zoshi z’orhuduma zikayikolesa. Bene wirhu na bali birhu b’omw’igulu lyoshi bashagaluka bwenene.Mwene wirhu muguma w’e Brésil ohamagalwa Juscelino, adesire ntya: “Ntahugûkagwa ciru! Nakarhanya gurhi Embaraza Eri Yalongoza eri yarhuyeresa obuzigire, rhwe bihuli, na kunganaci elonzize rhugendekere rhwajira amajambere g’ekiroho ak’abantu bayumva. Nashagaluka bwenene, n’eyo application yanshumya ngendekere nayiga Ebibliya bwenene.”

 Mwa gano mango, rhuli rhwajira evideo zoshi omu ndimi z’orhuduma n’okuzigabira abazilagirireko omukuzihira oku site yirhu y’e Enternete n’oku application ya JW Library Sign Language. Oko kuli kwarhuma ebicapo by’omu ndimi z’orhuduma byahindulwa, byaba arejistre, n’okuhânwa omu nsiku nsungunu ahali h’okuyusa emyezi erhi emyaka nk’oku byali embere. Bicapo binji by’omu ndimi nyinji z’orhuduma biri byarhengera liguma n’ebicapo by’endimi ziderhwa.

 Olole ebi bene wirhu na bali birhu baguma na baguma baba bihuli badesire lugenda ezo mpindûlo. Mwali wirhu muguma ohamagalwa Klízia adesire ntya: “Nta lindi ikubuliro lishibirira ebihuli bwenene n’okukolesa enjira nnembu y’okubiha ebiryo by’ekiroho bilagirireko. Nta kantu kali mw’er’igulu rhwakagerera kw’ebi ikuliro lya Yehova liri lyarhujirira.” Vladimir adesire ntya: “Evideo zinanyerese oku Yehova aba ashibirire ebihuli bwenene nk’oku anashibirira abantu bayumva.”

 Kanji-kanji evideo zirhu z’omu ndimi z’orhuduma zijira omusemwa gukulikire: “Okuhânwa kw’eci cicapo, ciri cigabi c’omukolo gw’okuyigiriza Ebibliya omw’igulu lyoshi; ogo mukolo guli gwajirwa kugerera oku burhabale bw’abantu bagwerhe obulonza bwinja.” Rhuvuzire omunkwa okubona muli mwahâna oburhabale kugerera enjira ziganirirwe oku donate.pr418.com. Obo burhabale buli bwarhurhabala rhucapise Ebibliya n’ebindi bicapo biyimangire oku Bibliya bihiziremo ebicapo by’endimi z’emihurha n’okubigabira abantu boshi.