Hofi ekipe 60 okw’igana z’okuhindula ebitabu birhu omu lundi lulimi zinakakolera omu biro bihamagalwa RTO ci arhali oku Beteli. Bulya gurhi ogo mupango guba gwa bulagirire? Bikolanwa bihi bene wirhu bahindula ebitabu birhu omu zindi ndimi baba balagirireko lyo bakola bwinja oku e RTO? Gurhi emunda e ekipe elamire ehuma oku bwinja bw’omukolo gw’okuhindula ebitabu birhu omu zindi ndimi?

 E RTO anahashise abahindula ebitabu birhu omu lundi lulimi balame aha bantu banji baganira olo lulimi baba balamire. Mwali wirhu Karin, ohindula ebitabu birhu omu lulimi lw’e bas allemand, ahugwire ntya: “Kurhangira erhi e RTO ehamira e Cuauhtémoc, omu eneo y’e Chihuahua, omu Mexique, ngasi mango rhunaganire olulimi lw’e bas allemand: haguma n’abirhu bahindula ebitabu birhu omu lundi lulimi, omu mahubiri, ciru n’amango rhwakagija ecibuye. Rhukola rhuba rhuzungulusirwe n’abantu baganira olo lulimi lwirhu. Rhukola rhuyumva enderho z’emigani rhurhakagiyumva, n’oko kunarhurhume rhwamanya amajambere gali gajirwa n’olo lulimi.”

 James, okola omu ekipe y’okuhindula ebitabu birhu omu lulimi lw’e Frafra, e Ghana, adesire oku hali amango akagikengera bene wirhu na bali birhu baba oku Beteli. Cikone ayushwire ntya: “Mbansimire bwenene okukola oku RTO. Oko kunampume oku murhima erhi mbona gurhi abantu b’omu eneo bali bayumvirhiza omwanzi mwinja omu lulimi lwabo.”

 Gurhi bene wirhu bahigamwo aha bahira e RTO? Mwene wirhu Joseph, okola omu Biro Biyimangire Omukolo gw’Obubasi gw’Omw’igulu Lyoshi, biba e Warwick, omu Étas Unis, adesire ntya: “Amazibu rhurhimanana nago, kuba kubona oku omu maeneo maguma na maguma omuliro gw’ekura, n’amishi birhabamwo ngasi mango, erhi hali amango e Enternete eyabirwa okurhôla (télécharger) ebi bene wirhu balonzize okuhindula omu lundi lulimi. Co cirhuma embere rhuhige okuhira e RTO hantu halebe, rhunarhang’irhanya bwenene okubiyerekire aha olo lulimi luli lwaganirwa.”

 Kanji-kanji, okuhira e RTO omu Nyumpa y’Entimanano erhi omu Nyumpa y’Entimanano Nkulu erhi omu nyumpa ya ba misionere, kunajirwe duba-duba kurhanahûna bintu binji bulya abahindula ebitabu birhu omu lundi lulimi banabe n’obulyo bw’okuyisha aho duba-duba. Erhi akaba birhahashikini okuja mw’ezo nyumpa, bene wirhu banagula enyumpa n’ebiro abahindula ebitabu birhu omu lundi lulimi bakakoleramo n’okulalamo. Erhi emipango yakashanja okubiyerekire olo lulimi luli lwahindulwa, banaguza ezo nyumpa na buzinda banakolesa ezo nsaranga omu bindi bintu.

 Omu mwaka gw’omukolo gwa 2020, rhwayusize dolare miliyoni 13 lyo e RTO zikola. Bene wirhu bakola oku RTO baba balagirire oku ordinatere, e logiciels zago-zago, n’oku bikolanwa by’okujira e enregistrement, obulyo bw’okuba n’e Enternete n’ebindi n’ebindi. Kwa lwiganyo, ngasi ordinatere bene wirhu bahindula ebitabu birhu omu lundi lulimi bakolesa enagulwe hofi dolare 750. Ezo ordinatere zinahirwemo e logiciels zakarhabala kuli ogo mukolo, na kandi banahiremo e Watchtower Translation System, erhabala bene wirhu bahindula ebitabu birhu omu lundi lulimi lyo bajira ogo mukolo bwinja n’okubarhabala bajire obusagasi.

 Na kandi bene wirhu bahindula ebitabu birhu omu lundi lulimi bajira ebikolanwa bibarhabala okujirira e arejistrema omu biro byabo. Ebyo bikolanwa byabire bya bulagirire bwenene erhi obu bulwala bw’Ekorona burhondera. Bene wirhu bahindula ebitabu birhu omu zindi ndimi bahêka ebyo bikolanwa emwababwe na ntyo bagendekera bajira e arejistrema y’e audio n’evideo z’ebicapo birhu.

 Ba volontere ba mw’eyo eneo banahâne oburhabale bwabo omu kusoma ebitabu byahindwirwe n’okucêsa aha RTO. Cirstin okola aha e RTO y’e Afrikaans e Cap, omu Afrique du Sud, adesire ntya: “Bahubiri banji na ba painiya b’akasanzi koshi banabe n’obulyo bw’okuhâna obwabo burhabale.”

 Abo ba volontere basima okuyish’irhurhabala. Mwali wirhu muguma adesire oku okurhabala oku mikolo y’oku RTO, kuba “nka kuhâbwa ecikombe c’amishi galimw’emboho.” Bene wirhu baguma na baguma nabo banahâne oburhabale bwabo omu kuhâna amazu gabo lyo bajira e arejistrema. Juana, oba oku RTO y’e Totonaque, e Veracruz, omu Mexique, adesire ntya: “Bulya rhukola rhuba hofi n’evile baderhamo olulimi lwirhu, kukola kuba kulembu okukolesa bene wirhu na bali birhu lyo bajira e arejistrema y’e audio n’evideo z’ebicapo birhu.”

 K’okukolera oku RTO kwarhabire okukubûla obwinja bw’okuhindula ebitabu birhu omu lundi lulimi? Bantu banji basoma ebitabu birhu badesire oku kobinali kwarhabire. Cédric, okola omu ekipe ehindula ebitabu birhu omu lulimi lw’Ecikongo, omu République Démocratique du Congo, adesire ntya: “Bene wirhu bagwerhe enkomêdu y’okuderha oku Ecikongo rhuhindula ciba ‘Cikongo c’omu bitabu birhu,’ bulya cirhalishushine n’enderho abantu bakolesa omu kuganira. Cikone muli gano mango, bakola baderha oku ebitabu birhu bikola biba omu lulimi lw’Ecikongo ca buno, omu Cikongo abantu baganira ngasi lusiku.”

 Andile, okola omu ekipe y’okuhindula ebitabu birhu omu lulimi lw’e Xhosa, olama omu Afrique du Sud, naye adesire enderho ziri nk’ezo. Adesire ntya: “Bantu banji banarhubwire oku babwine empindulo omu njira yirhu y’okuhindula ebitabu birhu omu lundi lulimi. Ciru n’abana bakagisima okusoma Ilabiro ly’Akalalizi omu Cingereza, bakola bashagalukira okulisoma omu Xhosa. Baba basimire okusoma e Tafsiri ya Ulimwengu Mupya mpyahya omu lulimi lw’e Xhosa bulya eba nembu okuhugûkwa.”

 Ensaranga zikolesibwa lyo rhurhondeza e RTO, okuyishibirira, n’okushibirira ba volontere bakolako, zoshi zinakarhenga omu burhabale buhânwa omu kulunga okuboko omukolo gw’omw’igulu lyoshi. Obo burhabale bunajirwe kugerera donate.pr418.com.