Okubona ebihumbi by’abantu biri byabatizibwa ngasi mwaka, rhulagirire oku Nyumpa nyinji z’Entimanano. Ly’ogo mukolo guhikirizibwa, edepartema y’e LDC y’omw’igulu lyoshi yarhôla emihigo y’okuyubaka n’okukubula Enyumpa z’Entimanano 2 700 na kulusha omu mwaka gw’omukolo gwa 2020. a

 Akantu k’okugayisa kuli kubona oku birhacihashikanaga okuhikiriza eyo mipango enyanya z’Ekorona. Lyo balanga bene wirhu na bali birhu n’okukenga amarhegeko g’ecihugo, Ekomite y’Okucapa y’Embaraza Eri Yalongoza yarhang’iyimanza omukolo gw’obubasi gw’omwigulu lyoshi. Cikone, omu mwaka gw’omukolo gwa 2020, embere obo bulwala burhondere, Nyumpa z’Entimanano 1 700 na kulusha zali zamayubakwa n’okukubulwa. Na kandi nyumpa nnenene hofi 100, zali zamahwa zayubakwa. Rhulole gurhi nyumpa ibirhi za mw’ezo nyumpa nnenene zali zamahwa okuyubakwa zarhabire bene wirhu.

 Etawi y’e Cameroun. Enyumpa y’e Douala etawi yalimo mîra, yali nsungunu, banal’ihûnyirwe eyushulwe. Ekomite y’Okucapa y’Embaraza Eri Yalongoza yahiga oku eyo tawi ekubulwe, cikone ensaranga zakahwerire k’ogo mukolo, zakabire nyinji kulusha ensaranga zayiyubakaga. Bacib’ilola erhi byanahashikana okuyubaka handi-handi erhi kugula ahantu hali enyumpa na buzinda bahakubule bwinja, cikone byoshi birhahashikanaga.

 Muli ako kasanzi, babwira bene wirhu b’e nord y’e Douala oku eguvernema ekola yalonza okuyubaka ibarabara aha burhambi bw’Enyumpa yirhu y’Entimanano Nkulu. Eryo ibarabara lyali lyarhuma kwakaba kulembu okuhika hw’eyo Nyumpa y’Entimanano Nkulu, na kandi lyakarhumire haba ha bulagirire. Ntyo ko n’etawi yal’ilonzize. Omu ntyo Embaraza Eri Yalongoza yayemera oku ebiro bihyahya by’etawi biyubakwe omu ngo y’Enyumpa y’Entimanano Nkulu.

 Abahamirizi n’abandi bantu b’okulipwa bakola haguma lyo bayubaka. N’oko kwarhuma rhurhakolesagya nsaranga nyinji. Okuhikiriza ogo mukolo kwayusize dolare miliyoni ibirhi na kulusha, nsungunu bwenene kulusha oku rhwal’irhanyize! Omulala gw’Ebeteli gwahamira mw’eyo nyumpa mpyahya embere obulwala bw’Ekorona burhondere.

 Babetelite b’e Cameroun baba n’enyumpa nyinja z’okulamamo n’ahantu hinja h’okukolera. Bakola bakabona oku eyo tawi guli mugisho gwarhenga emwa Yehova. Mwene wirhu muguma na mukage badesire ntya: “Rhulonzize rhukole bwenene lyo rhuyerekana oku eyi nyumpa eri ngalo ya bulagirire bwenene.”

 Ebiro by’Okuhindula Olulimi lw’Ecitojolabal, omu Mexique. Hagezire myaka minji e ekipe y’okuhindula olulimi eri yakolera oku tawi y’e Amérique Central, omu Vile y’e Mexique. Cikone, olulimi lw’Ecitojolabal lunakaganirwa bwenene omu eneo y’e Altamirano n’e Las Margaritas​—oku bilometre 1 000 n’etawi! Oko kwarhuma abahindula olulimi bayabirwa okumanya amajambere olulimi lwabo luli lwajira. Etawi yakajira okwayo koshi ly’ebona bene wirhu na bali birhu b’omu eneo ziri hofi lyo barhabala okuhindula n’okujira e enregistrement omu lulimi lw’Ecitojolabal.

 Ebyo byarhuma, Ekomite y’Obwandisi y’Embaraza Eri Yalongoza yahiga oku e ekipe y’okuhindula olulimi lw’Ecitojolabal ehamire omu eneo baluderhamo. Lyo bahikiriza ogo muhigo, etawi yahiga okugula nyumpa ndebe n’okuyikubula. Okujira ntyo kwal’ihûnyire nsaranga nsungunu kulusha okugula erhi okupanga enyumpa.

 Muntu muguma wa mw’eyo ekipe, adesire ntya: “Omu myaka ikumi yoshi nayusize oku tawi ndi nahindula olo lulimi, ntamango narhimanine ciru na mulala muguma gwakag’iganira olo lulimi nakag’ihindula. Ene ebiro birhu bikola biba omu eneo olulimi lw’Ecitojolabal luderhwamo. Nkola nkaganiza abantu baderha Ecitojolabal ngasi lusiku. Oko kwarhumire namanya nderho nyinji nankola nkajira omukolo gwani bwinja kulusha.”

 Bikahashikana, omu mwaka gw’omukolo gwa 2021, hali omuhigo gw’okuyubaka biro 75 by’okuhindula endimi, n’ezindi nyumpa z’okujiriramo amasomo g’Ebibliya. Emikolo yagendekera oku tawi nnenene munani, kuhiramo omukolo gw’okuyubaka e Ramapo, omu New York, n’okuhamisa etawi y’e Argentine n’ey’e Italie. Na kandi, hali obulagirire bw’okuyubaka Nyumpa z’Entimanano 1 000 na kulusha, hali n’obulagirire bw’okukubula hantu 6 000 na kulusha h’okujirira entimanano n’ezindi Nyumpa z’Entimanano 4 000 zihûnyirwe okukubulwa.

 Ngahi ensaranga z’okujira eyo mikolo yoshi zarhengaga? Mwene wirhu Lázaro González, w’omu Komite y’Etawi y’e Amérique Central, ahânyire ishuzo kw’er’idoso erhi ali aganirira omupango gw’okuhamisa ebiro by’okuhindula olulimi lw’Ecitojolabal. Aderha ntya: “Bene wirhu na bali birhu b’omu eneo y’etawi yirhu baba bakenyi. Buzira burhabale bwa bene wirhu na bali birhu b’omw’igulu lyoshi, rhurhakahashir’iyubaka ebiro by’okuhindula endimi bene wirhu na bali birhu b’eno munda baderha. Oburhabale bwa bene wirhu na bali birhu b’omw’igulu lyoshi, bo bwarhuhashisize okuhamisa abahindula ezo ndimi lyo bagendilama haguma n’abantu baderha ezo ndimi. Rhuvuzire bene wirhu na bali birhu omunkwa oku burhabale bwabo bahâna n’obulonza.” Kobinali, eyo mikolo yoshi y’obubasi enahashikane okujirwa kugerera oburhabale muhâna lyo mulunga okuboko omukolo gw’omw’igulu lyoshi. Burhabale bunji bunahânwe kugerera donate.pr418.com.