Abahamirizi ba Yehova banakashibirira ababo bemêzi. (1 Petro 2:17) Banji muli rhwe banaciyumve aka mwali wirhu Tannis olama omu cihugo c’e Kenya. Adesire ntya: “Nnashagalukire okumanya ebiri byahikira bene wirhu na bali birhu bazigirwa omw’igulu lyoshi.” Gurhi Tannis n’eyindi miliyoni y’Abahamirizi ba Yehova bahikakw’eyo myanzi? Kurhondera omu mwaka gwa 2013, rhwarhangira rhwahâbwa eyo myanzi kugerera ecigabi c’emyanzi oku site yirhu ya jw.org.

 Eco cigabi c’emyanzi cinahâne emyanzi y’okucikubagira lugenda Abahamirizi ba Yehova. Eyo myanzi enaganirire okuhânwa kw’Ebibliya, omukolo gw’okuhâna oburhabale amango g’obuhanya, lugenda obubasi, n’eyindi myanzi y’obulagirire. Cibamwo emyanzi lugenda bene wirhu na bali birhu bahizirwe omu mpamikwa erhi buyemere bwabo burhuma. Eco cigabi cibamwo emyanzi y’okuhâna omurhima lugenda akampanye k’okuhubiri n’Okukengera olufû lwa Yezu. Bandi bo bajira obusagasi bw’eyo myanzi na gurhi eyo myanzi erheganywa?

 Ecigabi c’emyanzi cinarheganyizibwe n’ebiro bihamagalwa omu cifaransa service des relations publiques (SRP). Ebyo biro Biba oku biro bikulu by’omw’igulu lyoshi by’Abahamirizi ba Yehova idako ly’obulongozi bw’Ekomite y’Abaratibu y’Embaraza Eri Yalongoza. Bene wirhu na bali birhu 100 na kulusha bo bakola mw’eyo service des relations publiques (SRP). Banji ba muli bo barhalama omu beteli—bahiziremwo abandisi, abasagasi, ab’okucapa, abahindula emyanzi omu zindi ndimi. Baguma ba muli bo banashibirire ebiyerekire leta, muba abasomi, n’abandisi by’emyanzi (journalistes). Eyo SRP enarhabalwe na bindi biro 80 na kulusha biba omu tawi z’omw’igulu lyoshi bihamagalwa omu cifaransa bureaux des relations publiques (BRP).

 Lyo barheganya emyanzi, e SRP enajire akazi haguma n’e BRP. Erhi abo bene wirhu bapata omwanzi gushinganine, banajire obusagasi n’okushubûza emyanzi. Banajira ntyo omu kudosa abantu amadoso n’okuganîra n’abalenga. Enyuma z’okushubûza emyanzi ekwanine, banarhondera okuyandika, okuzabûla, okusomolola ebyayandisirwe, okukolesa enfoto z’okuyerekana ebintu bwinja, na buzinda ogo mwanzi gwanarhumwa oku Komite y’Abaratibu lyo guyemerwa.

 Gurhi abirhu Bahamirizi baciyumva lugenda eyo myanzi? Mwali wirhu Cheryl olama omu cihugo c’e Philippines adesire ntya: “Nnanshagalukire okurhondera omulegerege omu kusoma myanzi milebe eyerekire ikubuliro lya Yehova n’abantu ba Yehova.”

 Basomi banji banaderhe oku hali olubero egarhi k’emyanzi ya jw.org n’eyindi myanzi erhenga handi-handi. Tatiana olama e Kazakhstan, adesire ntya: “Nvuzire omunkwa bwenene okubona nanahasha nayemera emyanzi eri oku jw.org. Eri myanzi yakucikubagira, enanali y’okuli.” Mwali wirhu Alma olama omu cihugo c’e Mexique adesire ntya: “Emyanzi ehânwa kugerera ebyombo by’okuhâna emyanzi eba yakugayisa bwenene, cikoki emyanzi y’oku site yirhu eba yakuhâna omurhima bwenene.”

 Aha nyuma n’okuba myanzi yakucikubagira, emyanzi kurhenga oku site yirhu enazibuhye obuyemere. Bernard, olama omu cihugo c’e Kenya, adesire ntya: “Ecigabi c’okuhâna emyanzi cantabire okukabona bene wirhu na bali birhu b’omw’igulu lyoshi nka mulala gwani, babe balamire ngahi. Nnanahasha naderha omu masala gani amazino gabo n’akanga bali bageramo.” Mwali wirhu ohamagalwa Bybron, naye olama e Kenya, adesire ntya: “Ngasi mango erhi mbona omwanzi lugenda okuhânwa kw’Ebibliya omu zindi ndimi, nnashagaluke bwenene! Eyo myanzi enankengeze oku Yehova arhajira kabôlo.”

 Emyanzi lugenda amalibuko ga bene wirhu na balirhu nayo yanakuha omurhima. Jackline, olama omu cihugo c’e Kenya adesire ntya: “Okurhanya oku burhwali bene wirhu na bali birhu bali bayerekana, kunazibuhye obuyemere bwani. Ensiku zoshi nnandoze okumanya bici bibarhabala bagendekere balembera. Naciyigirizize oku ebintu bibonekana bisungunu—nk’okusalira, okusoma Ebibliya, ciru n’okuyimba—byarhabire bene wirhu na bali birhu bagendekera bazibuha.”

 Mwali wirhu olama omu cihugo c’e Costa Rica ohamagalwa Beatriz avuzire omunkwa okubiyerekire emyanzi y’abahikirwe n’obuhanya. Adesire ntya: “Ecigabi c’emyanzi cinantabale okubona okw’ikubuliro lirhu lihikiriza amalagirire ga bene wirhu na bali birhu duba-duba, omu butaratibu n’omu buzigire. Oko kunanyemeze n’obwalagale oku eri lir’ikubuliro lya Yehova.”

 Rhuvuzire omunkwa bwenene okupata emyanzi mihyahya lugenda bene wirhu na bali birhu omw’igulu lyoshi. Oko kurhakahashikana buzira burhabale bujirirwa akazi k’omw’igulu lyoshi buhânwa kugerera donate.pr418.com. Rhummuvuzire omunkwa oku murhima gwinyu mwinja gw’okuhâna.