“Byanahashikana bantu banji basoma ebitabu birhu bayishi abantu barhabona,” ntyo ko Ilabiro ly’Akalalizi ly’omu Lusiku 1/6/1912 lyaderhaga. “Banahâbwa emyanzi y’okusoma buzira kuhûnwa kantu koshi-koshi . . . . Ebyo bitatu by’emihurha byacapirwe omu njira yakarhabala bwinja emihurha ebisome. Ilabiro ly’Akalizi lyayushûla ntya: “Bantu banji barhacibona banavuge omunkwa bwenene lugenda emyanzi basoma ebayeresire oku olusiku lw’emigisho minja omw’igulu luyiruka.”

 Erhi ezo nderho ziyandikwa, esisteme elengerire y’okusoma e braille y’ecingereza yakakolesibwa oku ngasi muntu omw’igulu lyoshi erhahali. Muli oko Abahamirizi ba Yehova, bâli erhi barhondîre okuha abantu okuli kw’Ebibliya “kugerera esisteme elengerire” y’okusoma e braille. Rhunagendekire rhwajira ntyo! Kuhika buno rhugwerhe bitabu binji by’e braille omu ndimi 50 na kulusha. Gurhi bijirwa?

 Akantu karhanzi okubiyerekire okutula e braille kuli kuyandika emyandiko omu namna y’e braille. Michael Millen, okola haguma n’e Text Processing Services e Patterson, New York ahugwire ntya: “Omu mango gageraga rhwakagikolesa e logiciels z’abarhimbuzi lyo rhuyandika e braille, cikoki ezo logiciels zirhakagihasha okujira ogo mukolo omu ndimi rhwalilagirireko.” “Kuhika buno rhunakolese obulenga bw’okuhindula ebitabu omu zindi ndimi buhamagalwa Watchtower Translation System, egwerhe obuhashe bw’okuyandika emyandiko y’e braille omu ndimi nyinji z’omw’igulu lyoshi. Nyemire oku ntahandi obo bulenga bwantyo buba omw’igulu lyoshi.”

 Ebitabu by’e braille birhaba mwo amandishi g’ecitabu gone ci n’amahugûlo g’enfoto zikolesibwe. Kwa lwiganyo, enfoto eba oku cijalada c’ecitabu Oshagalukire Akalamo Ensiku n’Amango! omu braille ehugwirwe ntya: “Mulume muguma amarhondera okulambagira omu njira y’ebinzongo-nzongo ezungulusirwe n’emirhi minjinja, n’entôndo.” Jamshed, murhabazi w’abagula na painiya orhabano adesire ntya: “Amahugûlo g’enfoto gali gabulagire bwenene kuli nie.”

 Enyuma z’emyandiko, e fichiers zinakarhumwa oku biro by’emyandiko mirhule y’e braille. Ebyo bitabu binarhulirwe oku karadasi kazibu-zibu karhakaharibika omu mango bali bakarhula, karhakanakunja ciru bakakakolesa kanji-kanji. Enyuma z’aho, obukurasa bunagushwe, okuhirwa haguma n’okurhumwa nk’oku banarhuma ebitabu omu bigamba erhi kurhumwa nka “nyigirizo z’emihurha” erhi akaba ebiro by’okurhuma ebyo bitabu binajire ogo mukolo. Nka bihashikine, etawi zinajire omupango gw’okurhuma ebyo bitabu buzira kuhusa lyo bene wirhu na bali birhu barhabona baba n’ebitabu balagirireko lugenda entimanano z’ecigamba.

 Ogo mukolo goshi guhunyire akasanzi n’ensaranga. E imprimerie yirhu y’e Wallkill, New York, enatule Bibliya zakawaida 50 000 omu kasanzi kasungunu, cikone mw’ako kasanzi ko n’ako rhunarhule Bibliya 2 z’e braille zone. Ngasi Bibliya y’omwaka gwa kabirhi y’olulimi lw’e braille y’Ecingereza eba ya volime 25, n’ebikolesibwa by’ago ma volime biba b’ibeyi kali 123 kulusha ebi rhukolesa lyo rhutula Ebibliya a yakawaida. Okubiyerekire ebijalada bihizirwe haguma bya volime 25, binagulwe dolare hofi 150!

 Bici abarhabala okujira ebitabu omu lulimi lw’e braille barhanya lugenda ogo mukolo? Mwali wirhu Nadia okola oku Tawi y’e Afrique du Sud adesire ntya: “Ntanyize oku bene wirhu na bali birhu baba mihurha bajira amazibu g’okubona, muli oko nambone oku guli mugisho bwenene okujira kantu kalebe lyo mbarhabala. Bibonekine bwinja oku Yehova abazigire bwenene.”

 Gurhi byakaba erhi omuntu orhabona akaba arhamanyirisoma e braille? Hakola hali myaka milebe rhwarhumaga omwanzi gwa Ociyigirize Okusoma e Braille; muli eyo clasere mwali ecitabu c’e braille n’amandishi macapise. Gajijirwe ly’omuntu obana bwinja n’omuhurha bombi bahashigakolesa. Ebroshuwa eri egarhi g’ecibaho n’akalamu kw’okujira ogo mukolo. Oli wayiga e braille anakolese ebyo bikolanwa ly’arhula ngasi mandiko g’omuntu alonzize omu braille kuli ye yene. Oko kujira ntyo kunarhabale oli wayiga abîke omu bwenge bwage oyo muntu anacapaga n’okumurhabala amuhugûkwe kugerera okuhuma.

 Gurhi bene wirhu na bali birhu barhabona bayungusiremo n’ebyo bicapo? Ernst, w’e Haiti agwerhe enkomedu y’okuja oku ntimanano z’ecigamba cikone arhagwerhe bitabu omu braille. Muli oko byahuna akakolesa obukengere bwage ly’akageza ebipindi byage n’okuhâna ishuzo amango g’ecipindi c’amadoso n’amashuzo. Adesire ntya: “Kuhika buno, nanahiraga okuboko enyanya n’okuhâna ishuzo buzira mazibu. Nciyumvirhe oku ndi muguma wa muli bene wirhu na bali birhu. Biryo bya kiroho biguma rhweshi rhuhâbwa!”

 Jan adesire ntya: “Ebicapo birhu byo biba binja bwenene kulusha ebicapo by’e braille namakasoma.” Mugula muguma w’omu Autriche orhabona, ananalongoze Ilabiro ly’Akalalizi n’Ifunzo ly’Ebibliya ly’Ecigamba adesire ntya: “Rhujira obukurasa, amahugûlo g’idako biri bilembu okupata n’amahugûlo g’enfoto gashinganine.”

 Mwali wirhu Seon-ok, painiya w’e Corée du Sud, orhabona arhanayumva. Omu nsiku zageraga, akagiyunguka n’entimanano kugerera elulimi luhamagalwa omu cingereza tactile signing (kuganira omu kukolesa enfune) amango g’entimanano, cikone kuhika buno akola ayishisoma yenene, n’oko kunamurhabale amango g’ifunzo ly’Ebibliya omu braille. Adesire ntya: “Ebindi bitabu by’e braille byanayabirana okusoma bulya birhagwerhi nugta, erhi bulya emistari ehengemire erhi bulya akaradasi bakolesize kali kanyinyi.” Ayushwire ntya: “Cikone Abahamirizi ba Yehova banakolese akaradasi kinja bwenene karhabala enugta zibonekane bwinja, n’oko kunandembuhize okusoma.” Ashubiriyushûla ntya: “Omu mango gageraga, ntakahashire nacifunza ebicapo by’Ebibliya buzira burhabale bwa bandi bantu. Kuhika buno, nanahashaga naciyigiriza niene. Oko kunanderhere obushagaluke bunji, okubona nanahashaga narheganya niene entimanano zirhu z’Ecikristu za ngasi mugobe, n’okuhâna amashuzo. Nasomire ebitabu birhu byoshi by’e braille. Nanaderha oku mba ‘nsimire ebyo bitabu bwenene.’”

 Ak’ebitabu birhu bicape, ebicapo birhu omu braille bijira ezi nderho: “Eci citabu cirhali ca kuguza. Okuyandikwa kw’eci citabu, ciri cigabi c’omukolo gw’okuyigiriza Ebibliya omw’igulu lyoshi; ogo mukolo guli gwajirwa kugerera oku burhabale bw’abantu bagwerhe obulonza bwinja.” Rhuvuzire omunkwa okubona mwahânyire obo burhabale kugerera enjira ziganirirwe oku donate.pr418.com. Obuhânyi bwawe bunarhabale okuhisako abantu boshi ebiryo by’ekiroho, ciru n’oku bantu barhabona erhi mihurha.