Olwimbo eba ngalo kurhenga emwa Yehova. Lwanahuma oku ntanya zirhu, lwanashanje oku rhuli rhwaciyumva n’okurhushumya. Ntyo ko enyimbo zirhu zago-zago ziyorha. Ezo nyimbo zanajira binji kulusha ebyo: zanarhurhabala rhuyegerere Yehova.

 Kurhangira omu mwaka gwa 2014, nyimbo zago-zago 70 na kulusha zo zamakajirwa, na kuhika buno, hanaba lwimbo luguma lwago-lwago omu hofi ndimi 500! Cikoki nkaba wanacidosa ntya: ‘Bandi bajira ezo nyimbo na gurhi zijirwa wani?’

 Enyimbo zago-zago zinakajirwa n’e ekipe y’omuziki y’ebiro by’e Audio/Video, bikola idako ly’obulongozi bw’Ekomite y’Okuyigiriza y’Embaraza Eri Yalongoza. E ekipe y’omuziki eba ejijirwe na bene wirhu na bali birhu 13 ba compositeurs, abalenga b’emiziki, ab’okurheganya ebyajirwa n’okurhabala oku yindi mikolo y’obulagirire. Kandi, e Komite y’Okuyigiriza yayemerire abandi bene wirhu na bali birhu omw’igulu lyoshi bakakolera kuli ligumaliguma lyo barhabala kw’ogo mukolo, kuhiramo ba compositeurs (kurheganya omuziki n’enderho z’olwimbo), abazihi (musiciens) n’abimbiza (chanteurs). Abo bene wirhu na bali birhu banakolese n’obwirhohye obulenga bwabo buzira kulonza bamanyikane oku bo bajiraga ogo mukolo.

 Gurhi olwimbo lwago-lwago lujirwa? Burhangiriza, Ekomite y’Okuyigiriza enahige amandiko g’Ebibliya olwimbo luyimangireko na gurhi abayishiluyumva bayishikaciyumva. Enyuma z’aho e ekipe y’omuziki yanarhodera omukolo gw’okurheganya omuziki n’okuyandika enderho. E arejistrema y’okulola gurhi omuziki gwayishiyorha yanajirwa. Ekomite y’Okuyigiriza yanayumvirhiza bwinja bwinja eyo arejistrema n’okuhâna obundi bulongozi. Enyuza z’aho, e ekipe y’omuziki yanakubûla olwimbo, buzinda yanajira e arejistrema nzinda. Ezo nyimbo zinakaba arejistre kushimbana n’okuli kw’omu eneo ndebe, oburhabale bw’etawi n’enyumpa z’okuyimbiramo (home studios).

 Lyo bayandika n’okuarejistre enyimbo zago-zago, bene wirhu banakolese e stations z’omukolo gw’e audio numérique, e programe y’e notation musicale n’amabikiro g’e audio. Ogo mukolo guba guhunyire okukolesa ebikolanwa nk’ebyombo by’omuziki, e consoles z’emixaje, e amplificatere, ebyombo by’okuyushûla izu n’emikrofone. Ibeyi ly’emikrofone lirhangirire oku dolare 100 kuhika dolare 1 000. Omu mwaka gwa 2020, rhwayusize dolare 116 000 oku byombo by’oku arejistre omuziki.

 Bwihangane bunganaci bwajijirwe lyo rhuba nka rhwanonera olusaranga? Ahali h’okuba n’e ekipe nnenene oku beteli, bene wirhu na bali banji bw’okucihâna okukolera kuli kasanzi kaguma kaguma banarhabale bwenene. Kandi, ahali h’okuhamagala bantu banji bayishiyimba, bene wirhu banaka composé emiziki kugerera eprograme y’e ordinatere yakahasha yajira izu lya byombo binji bya muziki.

 Bene wirhu na bali birhu banji banashagalukire okuyumvirhiza emiziki yago-yago. Tara, olama e Allemagne adesire ntya: “Enyimbo zinantabale nciyumve bwinja amango ndi naciyumva kubi. Okuziyumvirhiza omu lulimi lwani lw’akaburhano ko kunali nka kula Yehova akaba ali ampobera omu cifuba.” Mwene wirhu w’e Kazakhstan ohamagalwa Dmitry adesire ntya: “Bwenene nsîma okuyumvirhiza eyi miziki buzira kulonza okumanya erhi epatine n’amakanuni g’Ebibliya erhi nanga. Na kandi eyi miziki enantabale nsegeze obwenge bwani oku bintu by’ekiroho.”

 Delia, w’omu Afrique du Sud aganirire oku aciyumva okubiyerekire enyimbo zago-zago ntya: “Ezi nyimbo zinali nka combo c’okuntabala ndekizika omu hali y’ekiroho. Erhi nyumva ntamire, na ndi omu mazibu manji, nambone olwimbo lulinganine n’akanga ndimo. Agandi mango, okuyumvirhiza omuziki hisanzi hisungunu kone, kunantabale nshanje oku ndi naciyumva!”

 Hali nyimbo ziguma ziguma bene wirhu na bali birhu bashagalukire bwenene. Lerato naye w’e Afrique du Sud adesire ntya: “Enyimbo ‘Iko Karibu Sana’ na ‘Dunia Mupya Yenye Kuja’ ‘zinakampêka omu kasanzi nayishiyegereza’ nyama nakagizigira bwenene. Ngasi mango erhi nyumva ezo nyimbo, nambone gurhi ayishimpobera omu cifuba.”

 Lwimbo luguma lwali lwago-lwago kuli mwananyere muguma w’omushûko omu Sri Lanka. Adesire ntya: “Mwalimu wani w’esiyanse ankalihira kudarhi-darhi embere z’abirhu banafunzi boshi bulya ndi muguma w’omu Bahamirizi ba Yehova. Nayoboha bwenene nanahaba bici nakaderha. Erhi ngaluka eka, nyama ampa omurhima nyumverheze olwimbo, ‘Étudier rend fort.’ Olo lwimbo lwantabala mbone obulagirire bw’okujira obusagasi n’okurheganya ishuzo. Olusiku lwakulikiraga, naganira na mwalimu wani. Anyumvirhiza anambwira kuganaci ashagalukire obuyemere bw’Abahamirizi ba Yehova. Nvuzire ikubuliro lya Yehova omunkwa okubona lyarhuhirireho enyimbo z’okurhuliriza bwenene.”

 Ngahi ensaranga z’okugendereza ezi nyimbo zirhenga? Kugerera oburhabale bujirirwa omukolo gw’omw’igulu lyoshi, buhânwa kugerera donate.pr418.com. Rhummuvuzire omunkwa oku murhima gwinyu mwinja gw’obuhânyi.