Yehova aba azigire okuyigiriza abantu bage. Enyanya z’oko, ikubuliro lyage lyahizireho masomo manji g’okukomereza abanafunzi lyo bahash’ikahikiriza emikolo bahâbirwe bajire omu kazi ka Yehova. Maguma ga mw’ago masomo gali Masomo g’Abaeneza Injili b’Obwami (MAIO). Omu myaka ecizind’igera, ikubuliro lya Nnâmahanga lyasegize obwenge oku kukubûla arhali eprogramme y’ago masomo yone cikone kandi n’enyumpa ago amasomo gajirirwamwo. Omuhigo g’obulagirire kuli kulembuhiza abalimu omukolo gw’okuyigiriza n’abanafunzi ogw’okuyiga. Gurhi oburhabale bwinyu buli bwarhurhabalamwo lyo rhuhikiriza ogo muhigo?

 Omu myaka minji amasomo g’eciteokrasi gakag’ijirirwa omu Nyumpa z’Obwami n’omu Nyumpa z’Entimanano Nkulu. Bulya gurhigi omu nsiku zicizind’igera rhwayubasire erhi kukubûla nyumpa nyinji ziri zakolesibwa oku masomo g’eciteokrasi gone? Rhuganirire birhumire bisharhu.

 Obulagirire bunji bwenene. Christopher Mavor, murhabazi w’Ekomite y’Omukolo y’Embaraza Eri Yalongoza adesire oku “ebiro by’etawi byahânyire eraporo ziyerekine oku hali bulagirire bunji bwa bene wirhu na bali birhu b’okurhabala omu maeneo. Kwa lwiganyo omu mwaka gwa 2019, etawi y’e Brésil yayerekine oku bal’ilagirireko bandi bantu 7 600 barhenga oku Masomo g’Abaeneza Injili b’Obwami lyo bashibirira amalagirire gali omu eneo y’etawi yabo.” Etawi y’e États-Unis yahânyire eraporo eyerekine oku bagwerhe bulagirire bunji bwenene bwa bapainia bagwerhe obulenga bakakomereza abandi okuhubiri aha nafasi y’abantu banji omu vile nnenene, okuhubiri omu port, n’okuhubiri omu prizo. Na kandi hali obulagirire bwa bene wirhu b’okukola omu Departema y’e Service Local de Développement-Construction (LDC) n’omu Komite Zijira Olushangi Haguma n’Ehopitali. Abasomire amasomo g’Abaeneza Injili b’Obwami banarhabala okujira ebyo bintu.

 Omubale munji gw’abanafunzi. Tawi nyinji zapasire fomu nyinji bwenene za banafunzi banji zirhalusire omubale gw’aba bakahasha okulalika. Kwa lwiganyo, omu Brésil, etawi yayankirire fomu 2 500 ntya omu mwaka muguma gone z’abantu balonzize okusoma Amasomo g’Abaeneza Injili b’Obwami. Cikone enyanya z’okuba enyumpa z’amasomo zali nsungunu, ebiro by’etawi byakalalisire banafunzi 950 bone.

 Ahantu hinja bwenene h’okuhanda. Erhi abanafunzi baja oku masomo aha Nyumpa y’Obwami erhi aha Nyumpa y’Entimanano Nkulu, kanji-kanji banahandisibwe aha mwa bene wirhu na bali birhu. Ogo mupango gunakole bwinja omu maeneo garhajirwamwo masomo manji g’eciteokrasi ngasi mwaka. Cikone omu maeneo gajirirwamwo masomo manji, kwanaba kuzibu oku bahubiri okuhandisa abanafunzi myezi minji omu mwaka. Co cirhumire enyumpa nyinja z’abanafunzi ziri zakayubakwa hofi n’enyumpa yamasomo.

 Enafasi erimwo isomo liguma, kuhiramwo n’enyumpa y’abalimu n’eyakahandamwo banafunzi 30 ntya, haguma n’efasi y’okujirira eyindi mikolo y’obulagirire y’abanafunzi n’abalimu, yanayusa miliyoni minji y’edolare, kushimbana n’e eneo n’ebindi bintu.

 Kanji-kanji amasomo ganayubakwe ahali akahwenyenye embuga z’evile nnenene cikone hofi n’ahantu haba etransporo y’abantu banji. Amaeneo gacishogwa kanji-kanji ganabe gagwerhe bahubiri banji bakarhabala oku mikolo lugenda ago masomo n’okushibirira enyumpa n’ebintu by’okukolesa.

 Ezo nyumpa zijira amabîkiro (bibliothèques), enafasi z’okuyigira, amaordinatere, amashini gw’okucapa, n’ebindi bintu. Kanji-kanji, haba ecumpa c’okulira, abanafunzi baliramwo haguma n’abalimu. Na kandi haba enafasi nnene y’okujirira esporo n’okucishagalula.

 Kandi rhunapange bwinja isomo omu njira yago-yago. Troy okola haguma n’Edepartema y’e Service Local de Développement-Construction y’omu Igulu lyoshi e Warwick, e New York ahugwîre ntya: “Rhwaganire n’Edepartema y’Amasomo g’Eciteokrasi ly’erhurhabala rhurheganye bwinja enyumpa z’amasomo zakajijire kube kulembu bwenene oku banafunzi okuyiga. Bene wirhu barhuha obulongozi lugenda obunene bw’enyumpa z’amasomo, oku zishinganine zipangwe na lugenda obulangashane n’ebikolanwa by’e audio-video.” Okubiyerekire ebikolanwa by’e audio-video, Zoltán, mwalimu oku Masomo g’Abaeneza Injili b’Obwami omu cihugo c’e Hongrie, adesire ntya: “Embere, rhurhagwerhe micro ciru n’enguma, enyanya z’oko, kasanzi oku kandi rhwakag’ikengeza abanafunzi baje baderha n’izu linene. Cikone bunola ago mazibu garhacihali bulya hakola hakaba emikro oku ngasi cirhi!”

 Malehe gahi enyumpa nkubûle zabire nago oku balimu n’oku banafunzi? Angela wajaga oku Masomo g’Abaeneza Injili b’Obwami omu Palm Coast, e Floride omu États-Unis adesire ntya: “Haba hantu harhûlirire bwenene. Ngasi kantu kaba kapange bwinja, kuhiramwo n’amasomo n’ebyumpa birhu, lyo rhuhash’isegeza obwenge oku kusoma n’okuyiga.” Csaba, mwalimu muguma oku Masomo g’Abaeneza Injili b’Obwami omu cihugo c’e Hongrie, anashagalukire okuba n’obulyo bw’okulya haguma n’abanafunzi. Adesire ntya lugenda ako kasanzi: “kanji-kanji abanafunzi banarhubwire binji oku bibayerekire n’ebintu byabahikire omu kalamo. Mw’eyo njira rhunahikire okubamanya bwinja bwenene. Enyanya z’oko, rhunahikire okukolesa bwinja eprograme y’amasomo kushimbana n’amalagirire gabo.”

 Abanafunzi n’abalimu banabone ezo nyumpa z’amasomo nkubûle nka mugisho kurhenga emw’‘Omwigiriza wirhu Mukulu,’ Yehova. (Izaya 30:20, 21, NWT) Mwali wirhu muguma w’omu cihugo c’e Philippines wajaga oku Masomo g’Abaeneza Injili b’Obwami omu nafasi yahindulagwa masomo adesire ntya: “Oku enafasi y’amasomo yal’iyosire kwarhukengezize oku rhurhali banafunzi kone cikone rhuli bigolo byago-byago bya Yehova. Aba alonzize rhube n’obushagaluke amango rhuli rhwayiga n’obushiru Akanwa kage.”

 Enyumpa z’amasomo ziri zayubakwa, ziri zakubûlwa, n’okushibirirwa enyanya z’oburhabale bwinyu, burhabale bunji bwahânyirwe kugerera donate.pr418.com. Koko bwenene oku buhânyi bwinyu.