Hakola hali myaka ikumi na kulusha, kurhenga eprezantware z’ebicapo zabaga cigabi c’omukolo gwirhu gw’amahubiri ciri cashumya abantu bagusegezeko obwenge. Omu igulu lyoshi, abantu banabone ezo prezantware n’okumanya ziba za ba ndi. Ezo prezantware zirhaba nyinja kone cikone kandi ziba nembu okukolesa. Nkaba wanayemera nawe ebi Asenata mwali wirhu muguma w’omu Pologne aderhaga: “Ezo prezantware zinabonekane zirhajijirwi na bintu binji cikone kandi zinabonekane ziri nyinja bwenene. Ziba nembu okuhirwa aha zakolera n’okuhêkwa.”

 Ka hali amango okola ocidosize gurhi eprezantware zatuzirwe?

 Omu mwaka gwa 2001, Embaraza Eri Yalongoza yayemerera bene wirhu na bali birhu b’e France oku barhondere okukolesa enjira ziri lubero z’okuhubiri aha nafasi y’abantu banji, kuhiramwo n’okukolesa eprezantware. Bapima okukolesa ebintu biri lubero. Kwa lwiganyo, bahindula enshoho z’okubikira emishangi n’ebigapo by’amapine by’omu magazé lyo babikolesa omu kuyerekana ebicapo n’okubîka ebindi. Buzinda, etawi y’e France yacishoga omodele gw’eprezantware abahubiri bakolesize myaka minji.

 Bene wirhu b’e France bashagalukira amalehe minja babire nago kugerera amahubiri g’aha nafasi y’abantu banji bajiraga. Omu mwaka gwa 2011, Embaraza Eri Yalongoza yayemera omupango muhyahya g’okupima amahubiri g’aha nafasi y’abantu banji omu New York City, e États-Unis, omu kukolesa eprezantware n’ameza. Bapainiya bakolaga mw’ogo mupango bahugûkwa duba-duba oku eprezantware zagwerhe bunguke bunji, n’oku zali nembu okuhêka. Na kandi bapainiya bahâna entanya nyinja lugenda okukubûla omodele gw’ezo prezantware. Eprezantware z’embere zatulagwa n’amaboko omu kukolesa empaho zali nzirho, n’oko kwakarhuma kwaba kuzibu okuzisosa n’okuzihonola oku eskaliyé. Na ntyo eprezantware mpyahya zatulagwa zaba nembu bwenene, cikone zirhabaga nembu mpu kuhika zibe zanahêkwa n’empusi. Kandi ezo prezantware mpyahya zal’igwerhe amapine mannenene na mazibu, gakag’irhuma kwaba kulembu okuzitembeza omu njira zirimwo ebikombo-bikombo. Na kandi, ezo prezantware mpyahya zagwerhe ehisanduku hy’okubîkira ebicapo.

 Ogo mupango muhyahya bapimaga gwaba n’amalehe minja! Co cirhumire omu mwaka gwa 2012, Embaraza Eri Yalongoza yayemera okukolesibwa kw’eprezantware z’ebicapo omu igulu lyoshi. Bene wirhu bapata omutuzi wakatuzire prezantware nyinji za ntyo, omu kukolesa ebikolanwa birhali bizirho cikone bya kujira nsiku nyinji.

 Oku emyaka yajaga yagera ezo prezantware zakakubûlwa bunyi-bunyi. Kwa lwiganyo, omu mwaka gwa 2015, akantu k’okubwika eprezantware kali kalangala kakayilanga erhag’iloba kayushulwa embere zayo. Dina, mwali wirhu muguma olama omu cihugo c’e Géorgie, asima bwenene oku yajijirwe. Adesire ntya: “Eyo prezantware egwerhe ‘ikoti lyayo ly’enkuba’ ly’okulanga ebicapo.” Omu mwaka gwa 2017, ebintu by’okubandika biriko e asmako byatengenezibwa omu ndimi nguma na nguma. Tomasz, mwene wirhu muguma w’e Pologne adesire ntya: “Kwakag’iba kuzibu okushanja ebintu by’okubandika rhwagwerhe embere bulya rhwakag’ibinanika n’ekolo. Okulerha ebintu by’okubandika biriko e asmako zali ntanya nyinja bwenene.” Omu mwaka gwa 2019, ezindi mpindulo nyinji zajirwa lugenda ebikolanwa n’okutulwa kw’eprezantware lyo zigendekera zaba za kulama nsiku nyinji bwenene.

 Mutuzi muguma anatule eprezantware z’ebicapo zoshi n’enyuma z’aho zinarhumwe omu bigamba by’omu igulu lyoshi. Mwa gano mango, prezantware nguma eri yafa dolare 43, kukûlamwo etransporo n’ezindi depanse. Kuhika buno, dolare zilushire miliyoni 16 zamakakolesibwa oku prezantware, na prezantware zilushire 420,000 zamakahânwa omu bigamba by’omu igulu lyoshi.

 Lyo rhukolesa bwinja oburhabale bw’ensaranga bwahânyirwe, rhunahûne prezantware nyinji z’ebicapo oku liguma. Na kandi, buno ebigamba byanahûnaga ebigabi by’oku prezantware n’okuyikubûla ahali h’okuhûna eyindi amango yamaharabika.

 Omu igulu lyoshi, abahubiri bali bashagalukira okukolesa eprezantware z’ebicapo. Martina, olama e Ghana, adesire ntya: “Omu bigabi binji by’omukolo gwirhu gw’amahubiri, rhwe rhuyegerera abantu. Ebi nshagalukira lugenda amahubiri g’oku prezantware kuli kuba abantu bo barhuyegerera. Ciru n’abantu bagera kone hofi n’eprezantware banahâbwe obuhamirizi.”

 Omu cindi cihugo c’omu Afrique, mulume muguma ayegerera eprezantware anapata ebicapo by’omu lulimi lwage. Enyuma za mugobe muguma agaluka anaderha ntya: “Nasomire birya bicapo byoshi. Emyanzi emuli eri ya bulagirire bwenene. Naj’iyiganirira abantu b’omu mulala gwani omu lugo lwirhu,” olo lugo lwali oku bilometre 500. Myezi ibirhi enyuma z’aho, agaluka anaderha ntya: “Abantu b’omu lugo lwirhu basomire birya bicapo byoshi, banashagalukire bwenene emyanzi emuli. Balonzize babe Bahamirizi ba Yehova. Cikone bagwerhe amadoso. Kwa lwiganyo, bahugûsirwe oku lyo babatizibwa, bashinganine bayubizibwe omu mishi. Cikone, nta lwishi luba hofi n’olugo lwirhu. Ka bihûnyire rhuyishe eno munda lyo rhubatizibwa?” Abo bahubiri bamurhabala okupata painiya wakag’iganira olulimi lwage bakakaz’iriganira boshi. Kurhangira ago mango, bombi bali bashagalukira enshambalo nyinja bwenene ngasi mango.

 Biri bya kushagalusa okubona eprezantware z’ebicapo ziri zakolesibwa okuhubiri “omw’igulu lyoshi, lyo buba buhamirizi oku bantu b’amashanja goshi.” (Mateyo 24:14, NWT) Gurhi rhulipamwo ly’eprezantware zitulwa? Kugerera oburhabale buhânwa okulunga okubuko omukolo gw’omu igulu lyoshi, burhabale bunji bunahânwe kugerera donate.pr418.com. Koko bwenene oku buhânyi bwinyu.