“Harhacigera nsiku nyinji rhuli rhwacidosa erhi kwanahashikana okulîra ebiryo by’ekiroho kugerera ebyombo by’ecielektroniki.” K’oyemire ezo nderho? Zaderhagwa omu hotuba nguma y’okuhâna omurhima bwenene yajiragwa na mwene wirhu Geoffrey Jackson omu Raporo ya 6 y’Embaraza Eri Yalongoza (2020). Agendekera okuderha ntya: “Nka rhurhagwêrhe ecombo ca JW Library, gurhi rhwakajîre rhwajira? Mw’eyi myaka yoshi, Yehova arhurheganyize lyo rhuba babidu okukolesa ecombo ciri nk’eco.”

 Gurhi Yehova arhurheganyize? Bici bihunyire okurheganya e programe ya JW Library, na bici bihunyirwe ly’eyo programe egendekera yazibuha n’okuba nyinja?

 Omu mwezi gwa 3, 2013, Embaraza Eri Yalongoza yabwira e departema y’eprograme ya MEPS eba oku biro bikulu by’omw’igulu lyoshi by’Abahamirizi ba Yehova, bajire eprograme erimo empindûlu mpyaha ya Tafsiri ya Ulimwengu Mupya. Paul Willies okola mw’eyo departema y’e prorgame ya MEPS aderha ntya: “Kuhikira ako kasanzi, rhurhalicijira eprograme ciru n’enguma yakakola omu telefone erhi tablete. Cikone rhwagusha ekipe nguma n’okurhangihira ezindi proje eburhambi lyo rhukola n’agandi mabiro omu kutula n’okuyololola eyo aplikasyo n’ebyajamo. Rhwakasalira burhahusa, na kugerera oburhabale bwa Yehova, ayo aplikasyo yatangazibwa oku ntimanano nkulu y’omwaka, myezi irhanu enyuma rhurhondere rhwakola kw’eyo aplikasyo!”

 Amazibu gakulikiraga kwali kujira eyo programe libe ibikiro ligwerhe bicapo binji bwenene omu ndimi nyinji bwenene. Kuhika Mwezi gwa 1, 2015, ebicapo binji bya buno omu Cingereza byali bikola biri muli eyo programe, na myezi ndarhu enyuma, abantu balikola bagwerhe obulyo bw’okubona ebyo bicapo omu magana g’ezindi ndimi.

 Kurhangira ago mango, bene wirhu bakubwire eyo programe omu njira ziri lubero, bayushwire evideo, omu kuhira haguma ebicapo n’edokima multimédias y’entimanano, n’okuhashîsa abayikolesa bahashe okuhika oku mareferanse ga Guide de recherche ho n’aho omu lwandiko lulebe lw’Ebibliya.

 Ngasi lusiku JW Library anafungulwe omu byombo miliyoni 8 na ngasi mwezi enafungulwe omu bikolanwa miliyoni 15 na kulusha! Bici rhuba rhulagirireko ly’eyo programe ekola bwinja muli ebyo bikolanwa byoshi? Mwene wirhu Willies ahugwîre ntya: “Nta mango okujirira eprograme y’omu telefone omukolo kwakahwa. Ngasi mango binahûne okuyushûla ebigabi bihyahya n’okuyijira ebe ndembu okukolesibwa. Nk’oku e système d’exploitation z’oburhimbuzi z’ebikolanwa by’ecielektronike zinagendekere zakubulwa buhyahya (mis à jour) rhukwanine rhugendekere rhwakola ly’eyo programe egendekera yakola haguma n’ago ma système. Kandi rhugwasirwe rhugendekere rhwayololola e logiciel y’enternete oku rhwanagendekera rhwahira ebitabu bihyahya n’e aregistrema mpahya oku JW Library.” Kukika buno, endimi zoshi oku JW Library, kuli hofi bicapo 200 000 na ama aregistrema g’e audio n’evideo 600 000

 Lyo rhuyololola eyo aplikasyo, arhali bikolanwa byone rhulagirireko. Bihunyire okugula ama licences g’e logiciels. Licence nguna enagulwe dolare 1 500 oku mwaka. Kandi, okupima erhi e programe yakola bwinja oku ordinatere mpyahya, oku tablete n’oku telefone, ebiro by’eprograme ya MEPS binayuse dolare 10 000 oku mwaka omu kugula ebyombo by’ecilektronike emw’ababitula mberuluka.

 Kugerera JW Library, rhunahire eburhambi ensaranga zakacapisise ebitabu, z’okugwasa ebijalada n’ez’okubalamisa ebyo bitabu. Rhurhole olwiganyo lw’ebroshuwa Tucunguze Maandiko Kila Siku. Rhwacapisize hofi miliyoni 12 z’ezo broshuwa omu mwaka gwa 2013. Cikoki omu 2020, rhwacapisa hofi miliyoni 5 y’eyo broshuwa n’obo rhwayushusireko bahubiri barhalusire 700 000 omw’igulu lyoshi. Gurhi rhwakahugûla eyo mibalè? Bene wirhu na bali birhu banji bakola basomera olwandiko lwabo lw’olusiku oku JW Library. a

 JW Library ali arhabala abayikolesa omu njira ziri lubero. Geneviève olama e Canada adesire oku, kugerera eyo aplikasyo, akola akaciyigiriza ngasi mango. Adesire n’obwalagale ntya: “Okuderha okuli, nka byakahunyire ngushe ebitabu bihunyire okuhira haguma lyo nciyiriza, ntakahashire okuyiga ngasi sezi. Cikoki kugerera eyi aplikasyo, na ntole e tablete yani n’okubona ngasi byoshi ndagirireko. Omu kuciyigiriza ngasi mango, nahikîre aha nazibuhya obuyemere bwani n’okuciyumva ndi hofi na Yehova bwenene kulusha.”

 Eyo aplikasyo yabonekine yabulagirire bwenene kulusha muli gano mango g’e COVID-19. Charlyn, w’omu États-Unis, ahugwîre ntya: “Enyanya z’e COVID-19 yalandîre omw’igulu lyoshi, hakola hali mwaka muguma na kulusha ntabona oku citabu cihyahya c’akaratasi. Cikoki kugerera JW Library rhwagendekire rhwalisibwa bwinja kiroho, na ntyo nvuzire Yehova omunkwa kw’ogo mupango gw’obuzigire.”

 Faye, olama e Philippines, ashwinjire entanya z’abantu banji ntya: “Bisomerine okubona aplikasyo nguma yone, nanayegerera Yehova. Yo ntangiyigula sezi. Yo nyumvirhiza amango ndi najira emikolo y’omu nyumpa. Yo nkolesa lyo nteganya entimanano n’okurheganya amafunzo gani g’Ebibliya. Na ndole evideo amango ngwerhe ehinsanzi. Nansomeko emyanzi erhi Bibliya amango ndi oku mustari nalinga omutuga erhi bindi. Eri ya bulagirire bunji bwenene.”

 Kandi eyo programe yabonekine yabulagirire bwenene omu mukolo gw’amahubiri. Kwa lwiganyo, erhi aba ali omu mahubiri, mwali wirhu muguma w’omu Cameroun alonza okusoma lwandiko lugama owundi mwali wirhu muguma asomaga migobe misungunu embere z’aho. Cikoki, arhaciri lukengire. Ahugwîre ntya: “Akantu kinja kwali kubona oku nalikengire oluderho lw’olo lwandiko. Naja omu Bibliya, buzinda nalonza olo luderho. Ho n’aho nabona olo lwandiko. Kugerera eyo aplikasyo, nanabona mandiko manji nyibagira bwenene.”

 Oburhabale muhâna omu kukulikira enjira ziyerekinwe oku site donate.pr418.com zinarhurhabale rhuyololole, rhukubule n’okuyijihya JW Library kuli bene wirhu na bali birhu b’omw’igulu lyoshi. Rhummuvuzire omunkwa oku murhima gwinyu mwinja gw’okushangîra.

1. Mwezi gwa 10, 2013—Okubaho kw’e aplikasyo erimo e Tafsiri ya Ulimwngu Mupya

2. Mwezi gwa 1, 2015—Okuyushûlwa k’ebindi bitabu omu Cingereza na buzinda omu magana g’ezindi ndimi

3. Mwezi gwa 11, 2015—Okuyushûlwa kw’e fonction y’okusurlinye emyandiko

4. Mwezi gwa 5, 2016—Okuyushûlwa kw’e onglet y’Entimanano

5. Mwezi gwa 5, 2017—Kuhirwako e fonction y’okuyandika amahugûlo

6. Mwezi gwa 12, 2017—Kuhirwako Ebibliya y’Ifunzo

7. Mwezi gwa 3, 2019—Obulyo bw’okurhôla ama aregistrema audio, okulola evideo oku streaming n’okubona ama referanse g’e Guide de Recherche

8. Mwezi gwa 1, 2021—Kuyushûlwa kw’e fonctions mpyahya z’ecitabu Oshagalukire Akalamo Ensiku n’Amango!