Entimanano y’eneo y’omwaka gwa 2020, yali yago-yago; bo bwali burhanzi entimanano yirhu y’eneo yaba enregistrer na buzinda yahirwa oku enternete lyo bene wirhu na bali birhu b’omw’igulu lyoshi bayirholerako! Cikone, e Malawi n’e Mozambique, bene wirhu na bali birhu banji barhakulikiraga eyo ntimanano kugerera e enternete. Gurhigi bayikulikiragamwo?

 Ekomite y’Abaratibu n’Ekomite y’Okuyigiriza y’Embaraza Eri Yalongoza zayemera oku bene wirhu na bali birhu b’e Malawi n’ab’e Mozambique bakulikire eyo ntimanano kugerera iradiyo n’eteviziyo. Bulya gurhi abo bene wirhu bayemereragwa okujira ntyo? E Malawi, birhaba bilembu okupata e enternete bulya eba y’ibeyi linene bwenene kulusha ahandi hantu hoshi omw’igulu, n’oko kunarhume Bahamirizi ba Yehova banji barhaba n’obulyo bw’okuja oku enternete. Ntyo ko mwene wirhu William Chumbi, muguma w’omu Komite y’Etawi y’e Malawi ahugwîre, adesire ntya: “Iradiyo n’eteleviziyo, yone njira rhwakakolesize lyo rhuha bene wirhu na bali birhu ebyo biryo by’ekiroho.” Mwene wirhu Luka Sibeko, naye w’omu Komite y’Etawi y’e Malawi, ayushwire ntya: “Nka rhurhagerezagya entimanano y’e eneo okw’iradiyo n’oku televiziyo, bene wirhu na bali birhu banji b’omu eneo y’etawi yirhu barhakayikulikire.” N’e Mozambique, bene wirhu basungunu bwenene bone bakabîre n’ebikolanwa by’ecielektronike n’enternete, bulya eba y’ibeyi linji bwenene eyo munda nayo.

 Chaînes nguma na nguma z’amaradiyo n’eteleviziyo zalikola zigeza entimanano zirhu ngasi mugobe enyenye z’obu bulwala bw’Ekorona. a Bene wirhu bagend’ihûna oluhusa kw’ago maradiyo lyo bayish’igerezako entimanano y’e eneo.

 Bene wirhu b’e Malawi, barhimanana n’amazibu. E chaînes z’eradiyo n’eteleviziyo z’eyo munda zinajire nsa 1 yone bulya banayobohe oku erhi eprograme yakaba ndiri abantu banarhama. Cikoki bene wirhu babahugûlira oku omukolo gwirhu guba gwakubwira abantu boshi emyanzi. Ciru n’omu kasanzi k’e konfinema, rhugendekire rhwaha abantu omwanzi mwinja gw’oburhulirize kurhenga omu Bibliya, n’oko kunabarhabale okuba bacikala binja, n’okuba n’akalamo k’omulala k’omwishingo. Oko kwabayemeza. Na muli oko rhwaba n’obulyo bw’okukola n’agandi ma antene manji.

 Omu Malawi, entimanano y’e eneo yajirirwe oku chaîne nguma y’eteleviziyo na station nguma y’eradiyo miliyoni minji ya bacikala b’eyo bayumvirhiza omu cihugo coshi. E Mozambike, entimanano y’e eneo yajirirwe oku chaîne nguma ya televiziyo n’oku station 85 z’eradiyo.

 Mw’ebyo bihugo byombi, rhwayusize dolare 28 227 b ly’entimanano y’e eneo egera oku televiziyo na dolare hofi 20 000 ly’egera oku radiyo. Oku maradiyo gageza emyanzi omu eneo nguma y’ecihugo, rhwakahâna dolare 15 oku ngasi radiyo, n’oku maradiyo gamanyikine bwenene erhi agahâna emyazi omu cihugo coshi, rhwakayusa dolare 2 777.

 Bene wirhu bacihangana okukolesa bwinja emicango. Kwa lwiganyo omu Malawi, bayinginga babapungulize ibeyi, bayemera okubapunguliza ibeyi oku 30/100, oko kwarhabala okubîka eburhambi dolare 1 711. E Mozambike, station nyinji za radiyo zayemera okupunguza ibeyi bulya Abahamirizi ba Yehova baba bantu bikubagirwa, barhanacerwa okulipa.

 Bene wirhu bashagalusire bwenene okubona bagerize entimanano y’e eneo oku radiyo erhi oku televiziyo. Mugula muguma w’e Mozambike ohamagalwa Patrick adesire ntya: “Rhuvuzire Embaraza Eri Yalongoza omunkwa oku byoshi eri yarhujirira muli aka kasanzi k’obulwala.” Isaac, naye w’e Malawi adesire ntya: “Iradiyo lyone rhujira, muli oko rhuvuzire ikubuliro lya Yehova omunkwa okubona lyarhurhabire okujirira entimanano y’e eneo okw’iradiyo. Kugerera eyi njira omulala gwani gwayungusire n’entimanano yoshi y’e eneo. Rhwehe rhubwine oku eyi mipango ciri cerekane c’obuzigire bwa Yehova oku lubaga lwage.”

 Entimanano y’e Eneo ya 2020 yo yali ntanzi muhubiri muguma w’e Mozambike ajagako. Adesire ntya: “Byoshi byajijirwe ly’eyi ntimanano ejirwa kugerera eyi njira kunyeresire oku Yehova aba Nnâmahanga Ogala Byoshi. Obulwala bw’okuyahukira burhahanzagya Yehova okuha abakozi bage ebiryo by’ekiroho. Kuli nie, oko kuyerekine oku abakozi bage baba bazigirine bwenene. Oku kunyemezize n’obwalagale oku eri l’idîni ly’okuli.”

 Mugula muguma ohamagalwa Wyson adesire ntya: “Ndonzize okuvuga Embaraza Eri Yalongoza omunkwa okubona egendekire yarhushibirira n’obuzigire ciru na muli kano kasanzi kw’obulwala bw’okuyahukira. Rhuba rhulamire omu eneo nkenyi bwenene y’omw’igulu, n’omupango gwajijirwe lyo rhushimba entimanano y’e eneo kugerera eradiyo n’eteleviziyo, yarhabire banji ba muli rhwe barhagwerhi lusaranga bayunguke bwinja n’eprograme.”

 Okubiyerekire entimanano y’e eneo y’omwaka gwa 2021, Ekomite y’Abaratibu n’Ekomite y’Okuyigiriza yashubiyemera oku oko kushubijirwa omu kuderha oku; entimanano y’e eneo yajirirwa oku televiziyo n’oku radiyo omu eneo nguma na nguma. Ngahi olugesha lw’okuyigerezako lwakarhenzire? Kugerera oburhabale (micango) bujirirwa akazi kw’omw’igulu lyoshi oku donate.pr418.com. Rhummuvuzire omunkwa oku buhânyi bwinyu.