Omu Mwezi gwa 3, 2020, Ikubuliro ly’okushibirira amagala omw’igulu lyoshi lyatangaza oku e COVID-19 buli bulwala bwakuyahukira. Banji barharhanyagya oku obu bulwala bwalerha mazibu manji nsiku nyinji bwenene. Miliyoni minji ya bantu, kuhiramo Abahamirizi ba Yehova, bakwanine balembere amazibu gw’omubiri, g’ekandalala (psychologique) n’okubulirwa n’ensaranga. Burhabale buci Abahamirizi ba Yehova barheganyize muli aga mango gw’oyu nyamanja?

 Idako ly’obulongozi bw’Ekomite y’Abaratibu y’Embaraza Eri Yalongoza y’Abahamirizi ba Yehova, komite zirhalusire 950 z’okuhâna oburhabale (DRC) zajirwa omw’igulu lyoshi lugenda obulwala bw’e COVID-19. Baguma baguma b’omu bene wirhu na bali birhu bahâbwa oburhabale n’ekomite z’okuhâna oburhabale zajiragwa eyo, abandi bahâbwa oburhabale n’eguvernema. E DRC nazo zayishirheganya oburhabale bunene bwenene.

 Rhuganirire olwiganyo lw’e Paraguay. Jurnale nguma edesire oku okubona obu bulwala bw’okuyahukira, “bacikala banji b’e Paraguay barhagwerhe oku bakalyamo.” Cikoki e DRC zahiragwa mw’ebyo bihugo zalikola ziri zagabira abantu emufuku (kits) gulimo eby’obulagirire (ebiryo, n’ebiyerekire obusafi) byakarhabala mugobe muguma oku mulala gwa bantu 4. Ngasi mufuku gugwerhe ibeyi lya dolare 30.

 Bici ba volontaire bw’okujira oku mukolo gw’okuhâna oburhabale bajira lyo bacilanga n’okulanga abandi oku COVID-19? Kuyambala amasque n’okurhayegererana. Banalole erhi ababagulira ebiryo banabigwase ahantu hacîre n’okukenga amahano lugenda amagala nkana. Kwa lwiganyo, ngasi yeshi ohuma oku mufuku (kits) akwanine abe n’eby’okucilanga yenene, akalabe n’okushuka emituga yabo n’obufumu (désinfecter), bashuke n’obufumu aha bagwasa omufuku (kits). Buzinda abahêkera abantu eyo mifuko (kits) bakwanine baje kuli na bene wirhu na bali birhu babihekîre.

 Omu Mwezi gwa 1, 2021, Ekomite y’Abaratibu yayemera oku dolare miliyoni 25 ehânwe ly’ekola oku mukolo gw’okuhâna oburhabale lugenda endwala ya COVID-19. Etawi n’e DRC banakolese bwinja oburhabale omu kujira okwabo koshi lyo balonza aha ibeyi ly’ebiryo liri lisungunu. Kwa lwiganyo omu Chili, bene wirhu bayimangîre omukolo gw’okuhâna oburhabale balilonzize bagule biro 750 bya rhushimbo rhusungu-ngunu (lentilles). Cikoki ibeyi lyayushûka kabirhi muli ogo mwezi muguma gone! Nsa ibirhi zone enyuma z’okuyemera oku bagula kw’er’ibeyi, murhimbuzi muguma ababwira oku hali omuntu wagulaga e lentilles cikone anazigalwire. Muli oko, ahali h’okubaguliza okw’ibeyi bali bamapatanako, oyo muntu abaguliza okw’ibayi agulako mwezi muguma embere zipande!

 Ciru akaba ntyo, erhi bene wirhu bagendirhôla ezo lentilles, oyo muntu alonza okulahira oku arhacibaguliza kw’er’ibeyi bapatanaga, omu kubatumuza oku bajijire akabôlo okubona arhali bantu boshi bahâbirwe oku biryo bajaga bagabira abantu nka kula abandi bahâna oburhabale bajira. Enyuma z’okujira isala ly’omu murhima, mwene wirhu muguma abwira oyo muntu oku ngasi cigamba cali erhi calabirize ebintu lyo balola abantu b’omu cigamba cabo balagirire bwenene okuburhabale. Na kandi bashubimuhugûlira oku omu kubona abantu bahâbwa obo burhabale boshi barhali ba bûko buguma, ngasi mufuku (kits) gunahirwe mwo ebiryo n’ebikolanwa ogo mulala gulya erhi kukolesa. Oku buzinda, babwira oyo muntu oku Abahamirizi ba Yehova banahâne oburhabale bw’ensaranga buzira kusezibwa n’oku banalerhe oburhabale bwabo. Oko kwamuhumako bwenene! Ayemera okubaguliza kw’elyo ibeyi lisungunu, n’erhi bashubigaluka balimugulira ezindi lentilles, abaha biro 400 bya busha.

 Omu Libéria muba mwali wirhu okola mugikulu anaba mukana, izino lyage ye Lusu, aba alamire na bantu barhanu b’omulala gwage. Sezi liguma erhi baba bali banywa ecahi, n’okusoma olwandiko lw’olusiku, mwinjikulu wa Lusu wa myaka 7 ayishibona oku analire ebiryo byoshi bali basigaline. Adosa ntya: “Bici rhwalya?” Lusu ashuza aderha oku anali anasalisire lugenda oko, n’oku ayemire n’obwalagale oku Yehova abaha ebi balagirireko. Ebyo bijingo byo n’ebyo, abagula b’ecigamba ca Lusu bamuhamagala lyo bamubwira oku ayishe arhôle ebiryo. Adesire lugenda ebi mwinjikulu wage amubwizire olo lusiku: “Namabonaga oku Yehova anayumve n’okushuza oku masala bulya anashuzize oku gani.”

 Mukazi muguma omu République Démocratique du Congo aba mulungu w’Abahamirizi ba Yehova. Erhi abona ogo mulala gw’Abahamirizi gw’ahâbwa ebiryo n’ababo bemezi, aderha ntya: “Hano obu bulwala buhwa, nirhu rhwaba Bahamirizi ba Yehova bulya bali bashibirira bene wabo na bali babo muli aka kasanzi kadarhi bwenene.” Iba amudosa ntya: “K’okolaga waba Muhamirizi wa Yehova enyanya z’isaki liguma ly’omucere?” Mukage amushuza: “Arhali oko ko kwarhuma, cikone eryo isaki ly’omucere, ciri cerekane c’obuzigire bw’okuli.”

 Erhi akaba Abahamirizi ba Yehova bahashire okuhikiriza amalagirire ga bene wabo na bali babo muli aga mango gw’obulwala bw’okuyahukira, kwali kugerera oburhabale bahanyire. Rhummuvuzire omunkwa okubona mwakulikire enjira zihunyirwe okukolesibwa lyo muhâna oburhabale bwinyu kugerera donate.pr418.com.