Ebibliya yali erhi yalebire oku omu mango girhu hakabire amavita, emisisi y’idaho, endwala z’okuyahukira “n’eby’okuyobohya.” (Luka 21:10, 11) Ezo nderho z’obulebi zagendekire zahikirira omu mwaka gw’omukolo gwa 2022. a Kwa lwiganyo, ivita liri e Ukraine lyagendekire lyaba lidarhi, lyanarhuma emiliyoni y’abantu yaheza obuzine bwabo. Bantu banji omw’igulu bacikag’ilwisa amazibu g’endwala y’e COVID-19. Na kandi, bantu banji bahikirwe n’obuhanya bucilerha bone nk’emisisi y’idaho yageraga e Haïti na bakalemera bageraga omu Amérique Central, e Philippines, n’omu maeneo g’e sud-est y’e Afrique. Gurhi Abahamirizi ba Yehova barhabiremwo abahikirwe n’obo buhanya?

 Omu mwaka gw’omukolo gwa 2022, ikubuliro lirhu lyahânyire oburhabale oku bantu bahikirwe na mahanya hofi 200! Rhwakolesize hofi dolare miliyoni 12, lyo rhuhâna obo burhable. b Olole gurhi oburhabale buhânwa bwakolesibwe lyo rhurhabala abantu amango mahanya abirhi gahikiraga.

 Omu Nsiku 14/8/2021, omusisi gw’idaho gwa magnitude 7.2 gwagera omu cihugo c’e Haïti. Akantu k’okugayisa Bahamirizi basharhu ba Yehova bafâ; bahiziremwo bali birhu babirhi na mwene wirhu muguma. Abafulumusire bahikirwa n’amazibu g’omubiri n’ag’ekandalala galerhagwa n’ogo musisi. Mwene wirhu muguma ohamagalwa Stephane adesire ntya: “Abantu bakag’ifâ omu vile yoshi n’oko kwarhuma hagera emyezi elushire ibiri ebiriyo biri byaba ngasi mugobe.” Owundi mwene wirhu ohamagalwa Éliézer, adesire ntya: “Bahamirizi banji barhacigwerhe nyumpa, mishangi, birato erhi ebindi bintu by’obulagirire. Hagezire myezi minji abantu bali bayoboha enyanya z’emisisi misungunu-ngunu yacikag’igera.”

 Ikubuliro lirhu lyahâna oburhabale ho n’aho. Etawi y’e Haïti yahâna oburhable bwa tone zirhalusire 53 z’ebiryo, amahema, amabashe, amamatela n’amapano g’okusharje etelefone. Na kandi, omu mwaka gw’omukolo gwa 2022, nyumpa zirhalusire 100 zacibir’iyubakwa buhyahya erhi kukubûlwa. Rhwakolesize dolare zirhalusire muliyoni muguma lyo rhuhâna obo burhabale.

 Bene wirhu na bali birhu bavuzire omunkwa bwenene. Lorette adesire ntya: “Omusisi gw’idaho gwasherezize loshi enyumpa yirhu n’oburhunzi bwirhu. Nta kantu ka kulya rhwagwerhe. Cikone ikubuliro lya Yehova lyarhurhabala omu kurhuha ngasi kantu rhwal’ilagirireko.” Micheline adesire ntya: “Omusisi gw’idaho gwasherezize enyumpa nie na bagala bani babirhi rhwal’ilamiremwo. Nta kantu najijire ahanyuma n’okushenga, na Yehova anshuza kugerera ikubuliro lyage. Rhukola rhugwerhe enyumpa nyinja bwenene rhulamiremwo. Nahizire okujira ebi nakanahasha byoshi lyo nyeresa Yehova oku mvuzire omunkwa.”

 Abakulu b’ecihugo bacibwinire obushiru bwirhu bw’okuhâna oburhabale. Omwimangizi w’e mairie y’e L’Asile adesire ntya: “Muvuzire omunkwa bwenene okubona mwabire babidu okuyish’ihâna oburhabale. Ndi namukunga bwenene okubona mwayerekine oku mukenzire abakulu b’ecihugo. Nshagalusire bwenene okubona oku ensaranga zirhamuhêka obwenge. Lubero n’oko, muba mulonzize okurhabala abantu. Obuzigire bunakashumya ebijiro binyu.”

 Omu nsiku 24/1/2022, Kalemera mudarhi ohamagalwa Ana agera omu cihugo c’e Mozambique n’enyuma z’aho ashurha amaeneo g’e ouest omu Malawi. Oyo kalemera alerha enkuba ndarhi n’empusi mbi bwenene byakag’igenda bilometre 100 omu nsa nguma (100km/h). Oyo kalemera ashereza amapoto g’omuliro (courant) n’ebilalo, anarhuma haba okuyunjulira bwenene kw’amishi.

 Oyo kalemera ahumireko Bahamirizi barhalusire 30 000 b’omu cihugo c’e Malawi n’ec’e Mozambique. Mwene wirhu muguma ohamagalwa Charles, walungaga okuboko omukolo gw’okuhâna oburhabale adesire ntya: “Erhi mbona kunganaci bene wirhu bali balibuka n’okubona bintu binji bahezize, naciyumva kubi bwenene na nabona oku ntaco nakahash’ijira lyo mbarhabala.” Akanga kaba kabi bwenene bulya ebiryo bisungunu byakag’ibarhabala n’emburho zabo, byasherezibwa loshi. Banji bahezize enyumpa zabo. Akantu k’okugayisa, mwene wirhu muguma aheza mukage na bali bage babirhi erhi ebote y’okubayokola eciyubika omu mishi.

 Oyo kalemera ali wa kuyobohya bwenene. Aha nsa 7:00 z’obudufu, e Nchalo, omu cihugo c’e Malawi, omulala gwa Sengeredo gwayumva olubi lwa mishi manji bwenene. Nyishi ibirhi zali zamayunjulira! Mwene wirhu Sengeredo ahiga oku bashinganine bayake ahamwabo. Ogo gwali muhigo gw’obwenge bulya enyuma za kasanzi kasungunu ago mashi gashaba enyumpa yabo. Ebirugu byabo byasherera erhi kuhêkwa n’amashi. Ogo mulala gwahiga okuyakira ebwa Nyumpa y’Obwami, hantu bal’ishinganine balambagire miniti 30. Cikone olo lusiku byahûna okulambagira nsa ibirhi zoshi. Bahisire erhi barhamire banalobire bwenene, cikone bayokoka.

 Etawi y’e Malawi n’ey’e Mozambique zarhondera duba-duba okuhâna oburhable. Baha abangalizi b’emizunguko n’abagula obulongozi bw’okulabiriza ebi abo bene wirhu na bali birhu balagirireko n’okubaha oburhabale bw’ekiroho n’obw’ekandalala. Komite nyinji z’Okuhâna Oburhabale omu Mango g’Obuhanya zahirwaho lyo zilongoza omukolo gw’okuhâna oburhable, n’ezo komite zarhondera duba-duba okurhabala bene wirhu na bali birhu lyo bapata ebiryo n’ebindi bintu by’obulagirire. Rhwakolesize dolare zirhalusire 33 000 lyo rhuhâna oburhabale, rhwanakolesa dolare zirhalusire 300,000 lyo rhukubûla erhi kuyubaka buhyahya enyumpa zashereraga.

 Ekomite z’Okuhâna Oburhabale omu Mango g’Obuhanya zakolesize ensaranga n’obwenge, n’okujira ntyo kwali kwa bulagirire bwenene bulya ebintu byali byapanzire ibeyi. Kwa lwiganyo, omu myezi nda mirhanzi y’okuhâna oburhabale, ibeyi ly’enshano y’ebigonji, elug’ikolesibwa e Malawi, lyayushûka kali 70 oku igana (70%). Ibeyi ly’ekarbira nalyo lyayushûka. Lyo rhurhag’ikolesa nsaranga nyinji, bene wirhu bakagulira ebiryo n’ebintu by’okuyubaka eyo munda, banakagula binji caligumiza. Ntyo bakabanyihiza okw’ibeyi, na ntyo barhabilipiraga nsaranga nyinji z’itike.

 Omukolo gw’okuhâna oburhabale gwahumire oku mirhima y’abakozi ba Yehova. Mwene wirhu muguma w’e Mozambique ohamagalwa Felisberto, adesire ntya: “Ntazig’ibona elindi ikubuliro lyahâna bintu binji ntya: ebintu by’okuyubaka, itike, abubasi, ebiryo, n’obulongozi bw’obuzigire. Obu burharhabale buyerekine n’obwalagale obuzigire Yezu aganiriraga, buli omu Yowane 13:34, 35.” Mukana muguma w’e Malawi enyumpa yage yashereraga ohamagalwa Ester, adesire ntya: “Ntacigwerhe bulangalire bulya ntagwerhe nsaranga nyinji z’okuciyubakira enyumpa. Ntyo, erhi bene wirhu bayisha n’okucib’inyubakira enyumpa, naciyumva nka nkola ndi omu Paradizo.”

 Okuba rhuyegerire igulu lihyahya, rhumanyire oku rhwacibona buhanya bunji. (Mateyo 24:7, 8) Ciru akaba ntyo, kugerera oburhabale muhâna buzira kusezibwa, rhulangalire oku abakozi ba Yehova bakahâbwa oburhabale balagirireko. Enjira z’okuhâna oburhabale ziganirirwe omu donate.pr418.com. Koko bwenene oku buhânyi bwinyu.