Omwaka gwa 2020 gwalimo buhanya bunji bwadwirhwe n’obulwala bw’Ekorona. Gurhi Abahamirizi ba Yehova bajijire lyo barhabala abahikirwe n’obo buhanya?

 Omu mwaka gw’omukolo gwa 2020, a Ekomite y’Abaratibu y’Embaraza Eri Yalongoza yayemera oku rhukolese dolare miliyoni 28 b lyo rhurhabala abahikirwe n’obuhanya. Ezo nsaranga zarhabala abantu bahumirweko na buhanya 200, kuhiramo obwadwirhe n’e cyclones tropicaux, ecihonzi caniyaga omu Afrique, okubula ebiryo kwabaga e Vénézuela n’ecanda cago-cago cabaga e Zimbabwe. Oburhabale bwahânyirwe bwarhuhashisize okuha abalihumirweko n’obo buhanya ebiryo, amishi, enyumpa, emishangi, amafumu, eby’okucesa aha balilamire, n’eby’okuyubaka n’okukubula. Rhulolage nyiganyo nguma na nguma z’emikolo yajijirwe lyo rhuhâna oburhabale.

 EKORONA. Omw’igulu lyoshi, obulwala bw’ekorona bwahumire kuli bene wirhu omu hali y’omubiri, akandalala n’okubiyerekire okuba n’esaranga. Lyo rhubarhabala, Ekomite z’Okuhâna Oburhabale 800 na kulusha zarhondezibwa omw’igulu lyoshi. Ebyo biro byalola obulagirire bwa bene wirhu na ho n’aho babwira Ebiro by’Ekomite y’Abaratibu ly’elola bici byakajirwa lyo bahâna oburhabale.

 Mw’ogo mwaka goshi, ezo komite z’okuhâna oburhabale zarhabire bantu banji babe n’ebiryo, amishi, n’amafumu. Omu maeneo maguma na maguma, ezo komite zakola haguma n’abagula b’eyo lyo barhabala bene wirhu bahâbwe oburhabale bwakagihânwa n’eguvernema.

 Ciru n’abarhali Bahamirizi bahâbirwe kw’obo burhabale. Kwa lwiganyo, Field Simwinga, mukulu w’ezone y’e Nakonde, omu Zambie, abwira bene wirhu ntya: “Rhumuvuzire omunkwa bwenene kuli obo burhabale mwadwirhe omu kasanzi kinja oku milala ehikirwe n’obuhanya.”

 Okubula ebiryo omu cihugo c’e Angola. Enyanya z’obulwala bw’Ekorona, e Angola erhaciba biryo binji n’ibeyi lyayushusire bwenene. Oko kwarhuma kwaba kuzibu kuli bene wirhu na bali birhu okubona ebiryo by’okugula.

 Babwira bene wirhu b’etawi y’e Brésil oku barhumire bene wirhu b’e Angola ebiryo. Lyo bene wirhu bakolesa bwinja oburhabale, barhanya gurhi bakagulamw’ebiryo okw’ibeyi linja n’okubirhuma. Bahiga okugula ebiryo caligumiza. Oku dolare 22, bene wirhu bagula hofi biro 20 by’ebiryo omu ngasi isaki, byalimo omucere, ebishimbo n’amavurha g’okuyenda. Muli olo lusiku, bene wirhu bagula masaki 33 544 banagarhuma, ebyo biro byakahisire toni 654. Ebyo biryo bahâga bene wirhu n’ebindi bene wirhu b’eyo munda barhumaga byalisa bantu 50 000 na kulusha!

 Gurhi bene wirhu na bali birhu b’eyo munda baciyumvirhe enyanya z’obo burhabale bahâbagwa? Alexandre, oba olamire omu eneo ya kuli y’e Angola, aderha ntya: “Nabwine oku eco ciri cimanyiso ciyerekine oku Yehova aba anzigire n’oku ntali niene. Nabwine oku ikubuliro lya Yehova linanshibirire!” Muzire muguma olera abana bage yene, ohamagalwa Mariza, adesire ntya: “Yehova anayumvirhe isala lyani. Nvuzire Yehova n’ikubuliro lyage omunkwa!”

 Ecanda cago-cago caba e Zimbabwe. Omu kasanzi kw’omwaka gw’omukolo gwa 2020, e Zimbabwe yaja ecanda cago-cago, n’emiliyoni y’abantu yalibuka enyanya z’ishali linji bwenene. Miliyoni minji y’Abahamirizi ba Yehova erhacikagibona gurhi yakabamwo n’ebiryo.

 Komite irhanu z’okuhâna oburhabale zajirwa lyo ziha bene wirhu na bali birhu ebiryo. Amagana g’abahubiri gacihangana okuhâna oburhabale omukurheganya amasaki gajamo ebiryo n’okubihiramo. c Omu mwaka gw’omukolo gwa 2020, dolare 691 561, zakolesibwe lyo baha bantu 22 700 na kulusha ebiryo!

 Erhi obo burhabale buhika, milala minji yali erhi yayusize ebiryo bagwerhe. Bene wirhu bavuga Yehova omunkwa bwenene. Ciru hali na baguma ba mulibo bayimbire enyimbo zirhu.

 Omu eneo nguma, bali birhu babirhi bakana baja omu ntimanano nguma yajiragwa n’ecikundi c’okuhâna oburhabale bw’ebiryo. Cikone muli eyo ntimanano barhondera okuganirira eby’epolitike. Lyo baha bali birhu kuli obo burhabale, babawira oku barhangiyemera bintu bilebe birhayemerirwi Omukristu. Bali birhu balahira. Erhi barhenga muli eyo ntimanano, abantu babaha oloho banababwira ntya: “Mumanye mwakaciyish’iderha mpu rhumuhe oku biryo!” Cikone enyuma za migobe ibirhi, bene wirhu bayisha badwirhire bali birhu ebiryo, embere bwenene erhi ciru eco cikundi c’okurhabala abantu cirhacilerhera bacikala ebiryo!

 Okuhâna oburhabale amango g’obuhanya kwahânyire obuhamirizi. Kwa lwiganyo, rhulole ebi Prisca, olama emu lugo lusungunu adesire. Ciru ankaba amazibu abuganine nago enyanya z’eco canda cabaga eyo munda, akaja omu mahubiri ngasi lwa kasharhu na ngasi lwa karhanu, ciru n’omu kasanzi k’okucib’ihinga. Abantu b’omu lugo lwage bakamushekera, n’okumubwira ntya: “Orhangileka amahubiri oje wahinga. Omulala gwawe gwahungumuka n’ishali.” Prisca akabashuza ntya: “Yehova arhakalekerera ciru n’ehitya abakozi bage.” Hisanzi hisungu enyuma z’aho, kugerera omupango g’okuhâna oburhabale, bamuha ebintu al’ilagirireko. Balungu bage baguma na baguma basomerwa bwenene buzinda bamubwira ntya: “Nnâmahanga wawe arhakulekereraga. Oko kwamarhuha irala ly’okulonza okumanya binji kuli ye.” Balungu bage nda bakola bakakulikira entimanano zirhu zikagera oku radiyo.

 Oku rhwagendekera rhwayegerera obuzinda, ko rhwanagendekera rhwarhimanana n’obuhanya. (Mateyo 24:3, 7) Rhumuvuzire omunkwa oku burhabale boshi muhâna kugerera donate.pr418.com. Obo burhabale bunarhuhashise okuhâna oburhabale omu kasanzi k’obuhanya.