“Nkola ngwerhe myaka 19 ndi nalinguza ako kantu!” Kantu kaci ako oyo mwene wirhu akagilinguza? Akagilinguza e Tafsiri ya Ulimwengu Mupya ya Maandiko ya Kigiriki g’omu lulimi lwabo lw’e Bengali. Bantu banji badesire ntyo erhi e Tafsiri ya Ulimwengu Mupya ehânwa omu lulimi lwabo. Cikone, k’oyishi bici biba bihûnyirwe lyo bahindula n’okucapisa ezo Bibliya?

 Burhangiriza, ogo mukolo gunahâbwe e ekipe y’okuhindula olulimi idako z’obulongozi bw’Ebiro by’Okucapa by’Embaraza Eri Yalongoza y’Abahamirizi ba Yehova. Kasanzi kanganaci eyo ekipe eyusa eli yahindula eyo Bibliya? Mwene wirhu Nicholas Ahladis, okola omu Biro Biyimangire Omukolo gw’Okuhindula biba e Warwick, omu New York, ahugwîre ntya: “Ogo mukolo guba guhûnyire okujira binji, kwa lwiganyo, bantu banga bahali lyo bajira ogo mukolo gw’okuhindula, bintu bihi byago-byago birimw’olo lulimi, myanzi minganaci abasoma olo lulimi bamanyire lugenda abantu ba mîra baganirirwe omu Bibliya, k’olo lulimi lunakaganirwa lubero kushimbana n’e eneo. Omu kugerera akasanzi e ekipe eyusa yahindula Amandiko g’Ecigiriki g’Ecikristu, binahûne ejire myaka isharhu na kalusha n’okuhindula Ebibliya yoshi binahûne myaka ini erhi kulusha. Okuhindula Ebibliya omu lulimi lw’orhuduma kohe kwanahûna myaka minji bwenene.”

 Arhali abakola omu ekipe y’okuhindula bone baba balagirirweko. Haba n’obulagirire bw’okubona abantu b’okusoma ebyahindwirwe barhagwerhi myaka miguma, na ba eneo erhi bihugo biri lubero. Banasoma ebi abahindulaga bajijire, na buzinda banahâna entanya zabo banajire ntyo buzira kuhâbwa kantu. Entanya bahâna zinarhabale Ebibliya arhabagamwo magosa, owayisoma ayiyumve n’okuyihugûkwa bwinja. Na nk’oku mwene wirhu muguma olama e Afrique du Sud, aderhaga: “Abahindula Ebibliya banabone oku bagwerhe omukolo muzibu embere za Yehova n’embere z’abasoma Akanwa ka Nnâmahanga.”

 Enyuma z’okuyusa omukolo gw’okuhindula, Ebibliya yanacapwa n’okunanika orhurhadasi rhwayo haguma. Ly’oko kuhashikana, abacapa banakolesa “bintu” ikumi mberuluka: orhurhadasi, irangi, akaradasi k’okujira ecijalada, ebintu biri byamarhira, ebintu bya ngasi lubero byakarhabala ecijalada cibe cilembu, akaradasi k’ensaranga, ehitepe erhi rubans, bandeaux, ebintu by’okurhabala Ebibliya ehirwe haguma, n’ebintu by’okuyihumanya haguma. Omu mwaka gwa 2019, dolare miliyoni 20 na kulusha zo zakolesibwe lyo rhugula ebyo bintu by’okurhabala Ebibliya ecapisibwe. Bene wirhu na bali birhu bajijire nsa 300 000 na kulusha lyo bacapa n’okurhuma ezo Bibliya emunda zaja.

 Bulya gurhi rhukolesa ezo nsaranga n’ako kasanzi koshi muli ogo mukolo? Mwene wirhu Joel Blue w’omu Departema y’Okucapa, adesire ntya: “Ebibliya co ciba citabu ca bulagirire omu bitabu byoshi rhuba rhulonzize okucapisa. Co cirhuma rhuba rhulonzize eshushe bwinja ly’ekuza Nnâmahanga rhuharamya enakengese omwanzi rhukayigiriza.”

 Arhali Tafsiri ya Ulimwengu Mupya yone rhucapisa ngasi mango, rhunacapise n’Ebibliya y’abantu basoma bali omu bulagirire bwago-bwago. Kwa lwiganyo, rhunacape e Tafsiri ya Ulimwengu Mupya y’emihurha, eri omu ndimi ikumi. Okucapisa Ebibliya nguma y’emihurha kwanajira nsa munani, n’ebigabi byayo byoshi byanagwarha obuliri bwa metre 2,3. Rhunacipise n’ezindi Bibliya zago-zago enyanya z’abantu bali omu mpamikwa ahantu ebitabu birhagwerhi cijalada cizibu-zibu byone bayemera okuhekamo.

 E Tafsiri ya Ulimwengu Mupya enahume oku kalamo k’abantu bayisoma. Rhuganirire olwiganyo lwa cigamba ciguma c’olulimi lw’e Kiluba, ciba e Tombe, omu République Démocratique du Congo. Egarhi k’e Tombe n’evile nnene y’eco cihugo eba bilometre 1 700, erhi wakagera omw’ibarabara. Abahamirizi ba Yehova b’e Tombe bagwerhe Bibliya nguma yone, yanali omu lulimi lw’e Kiluba lwa mîra bwenene. Bene wirhu bakahânana eyo Bibliya lyo barheganya ebipindi byabo. Cikone kurhonderha omu Mwezi gwa 8, 2018, ngasi muntu w’omu cigamba akola ajira eyage Tafsiri ya Ulimwengu Mupya yoshi.

 Okubiyerekire e Tafsiri ya Ulimwengu Mupya, mwali wirhu muguma oderha Ecialema, adesire ntya: “Ntacicidosa erhi nsome Ebibliya. Cikone nkola nkacidosa, ‘mangaci nsinganine nyisome bwenene.’” Mushwekwa muguma ayandika ntya: “Nahâbirwe e Tafsiri ya Ulimwengu Mupya, yanashanjire akalamo kani. Eyo Bibliya yantabire nahugûkwa bwinja Akanwa ka Nnâmahanga. Nal’ilonzize manye binji okubiyerekire Abahamirizi ba Yehova, n’ebi nsinganine njire lyo mba muguma wa muli bo.”

 Abasoma e Tafsiri ya Ulimwengu Mupya boshi bavuzire omunkwa bwenene oku burhabale bwinyu mwahânyire ly’ecapwa. Obo burhabale bw’okulunga okuboko omukolo gw’omw’igulu lyoshi, bunahânwe kugerera donate.pr418.com. Rhumuvuzire omunkwa mweshi kw’er’iroho linyu ly’okuhâna.