Omw’igulu lyoshi, guvernema nyinji zahanza abantu okukayegerana, zanahanza entimanano z’abantu banji. Abahamirizi ba Yehova bahiga okukenga ago marhegeko, cikone banagendekera bajira entimanano buzira kucihira omu buhanya. Lyo bajira ntyo, ebigamba byarhondera okukolesa Zoom lyo bijira entimanano kugerera e vidéoconférence.

 Ly’entimanano zikajirwa ngasi mango, Embaraza Eri Yalongoza yayemera oku oburhabale rhuhâna bukolesibwe lyo bagulira ebigamba ekonte ya Zoom. Oko kwarhabire bigamba biguma na biguma birhagwerhe buhashe bw’okucilipira ekonte y’e vidéoconférence eba ehûnyire okulipa egarhi ka dolare 15 na 20 erhi kulusha. Ebyo bigamba byali bikomire okukolesa eprograme zirhal’ihûnyire okuhâna ensaranga, zirhanakag’ihashisa bantu banji bashimbulire entimanano, zirhanakag’irhabala entimanano ejirikane omu hali nyinja. Ebigamba byoshi biri byakolesa ekonte ya Zoom y’ikubuliro bigwerhe bunguke bunji, bulya bene wirhu na bali birhu banakayikolesa buzira mazibu na bantu banji banacilunga haguma n’ecigamba ciri cayikolesa. Ene, bigamba bilushire 65 000 by’omu bihugo bilushire 170 biri byakolesa ekonte za ntyo.

 Ecigamba c’e Kairagi e Manado, e Nord y’e Sulawesi, omu Indonésie, caleka okukolesa eprograme y’e vidéoconférence erhal’ihûnyire okulipira ensaranga, carhondera okukolesa ekonte ya Zoom y’ikubuliro. Mwene wirhu Hadi Santoso, ahugwîre ntya: “Muli gano mango, ciru na bene wirhu na bali birhu barhaba bakomire okukolesa ebyombo by’ecielektronike bali bashagalukira entimanano, bulya birhacitwika na ntyo birhacihûna mpu baje bacikonekté ngasi kasanzi.”

 Mugula muguma w’omu Cigamba c’e Guayacanes Oeste e Guayaquil omu Équateur, ohamagalwa Lester Jijón, adesire ntya: “Bulya bene wirhu na bali birhu banji baba bakenyi, kwali kwaba kuzibu kuli bigamba biguma na biguma okulipira ekonte Zoom yakarhabire ecigamba coshi cijire entimanano haguma. Ene, kugerera oburhabale bw’ikubuliro rhugwerhe ekonte ya Zoom na bantu banji banacilunga haguma na nirhu. Na ntyo rhurhakaciyoboha okulalika bantu banji oku ntimanano mpu bulya rhwarhalusa abantu bahûnyirwe okuja oku Zoom.”

 Mugula muguma w’omu Cigamba c’e Ngwerere Nord, e Lusaka omu Zambie, ohamagalwa Johnson Mwanza, ayandisire ntya: “Ngasi mango bene wirhu na bali birhu banji banakaderha ntya: ‘okukolesa ekonte Zoom y’ikubuliro kwarhurhabire rhuciyumve oku rhuli hofi na bene wirhu na bali birhu na kandi kwarhurhabire rhuciyumve oku Yehova aba rhuzigire ananaba arhushibirire.’”

 Ikubuliro lyakolesize ensaranga zikolesibwa amango g’obuhanya lyo ligula ezo konte za Zoom. Ezo nsaranga zinarhenge omu burhabale abantu bahâna n’obulonza lyo balunga okuboko omukolo gw’omw’igulu lyoshi. Burhabale bunji bwa muli bo bunahânwe kugerera donate.pr418.com. Rhumuvuzire omunkwa oku burhabale muhâna n’obulonza, bukolesibwa kandi omu kurhabala bene wirhu na bali birhu bahikirwe n’obuhanya.​—2 Abakorinti 8:14.