Omu mwaka gw’omukolo gwa 2021, a igulu lyoshi lyagendekire lyalibuka n’endwala y’Ekorona. Nk’oku bihugwîrwe omu mwanzi gudesire “Okuhâna Oburhabale Omw’Igulu Lyoshi Lugenda Obulwala bw’Okuyahukira,” rhwakolesize emiliyoni y’edolare b lyo rhurhabala bene wirhu omu kasanzi k’obu bulwala bw’okuyahukira rhwanajira Komite z’Okuhâna Oburhabale 950 na kulusha.

 Omu mango eyi ndwala yakag’ilibuza abantu, obundi buhanya bw’igulu n’obwalerhagwa na bene bantu, bwahuma kuli bene wirhu na bali birhu b’omw’igulu lyoshi. Lyo rhushibirira bene wirhu na bali birhu bahikirwe n’obuhanya 200 na kulusha, Ekomite y’Abaratibu y’Embaraza Eri Yalongoza yayemera okukolesa zindi dolare miliyoni 8 lyo ziyushuka oku burhabale bwal’irheganyizibwe omu kasanzi k’Ekorona. Olole gurhi oburhabale bwawe bwakolesibwe omukurhabala abacizind’ihikirwa n’obuhanya.

 Omu nsiku 22/5/2021, Evolka Nyiragongo, yatomboka omu République Démocratique du Congo. Elave y’Evolka yashereza enyumpa, amasomo, n’amatanki g’amishi. Cikone elave arhali bone buhanya Evolka yalesire. Bulya nsiku nsungunu enyuma z’okutomboka kw’Evolka, akatulo kalimo sumu kayerera omu vile y’e Goma n’emisisi misungunu-ngunu yakagera. Bantu balushire makumi arhanu okw’igana b’omu vile y’e Goma babwirwa oku bayake. Amagana g’ebihumbi by’abantu gabunga, n’abandi bayakira e Rwanda.

 Egarhi k’abo bayakaga, mwali Bahamirizi ba Yehova hofi 5 000. Baguma na baguma bahezize enyumpa zabo erhi Evolka etomboka; abandi baheza ebirugu byabo erhi bayaka Evolka. Ekomite z’okuhâna oburhabale z’omu cihugo c’e Rwanda n’omu République Démocratique du Congo zalongoza omukolo gw’okuhâna oburhabale. Lugenda komite nguma y’okuhâna oburhabale, etawi y’e Congo (Kinshasa) edesire ntya: “Ciru akaba akanga kali kazibu omu vile, ciru n’embere z’abantu okubwirwa oku bayake Evolka, eyo komite yarhondera okugabira bene wirhu na bali birhu ebiryo, amishi, emishangi n’eby’okucibwika.” Omu vile nguma bene wirhu na bali birhu 2 000 na kulusha barhimananagamo, ekomite y’okuhâna oburhabale yayubakira abo bene wirhu amahema, yabaha amamaske, banabahugûlira gurhi bakacilanga lyo barhag’iyahukirwa n’ekorona n’ekolera.

 Omu myezi isharhu obo buhanya bwayusize, bene wirhu bahânyire tone zirhalusire ndarhu za mucere, tone ndarhu z’enshano y’ebigonji, tone isharhu z’amavurha g’okuyenda nago na tone isharhu z’amishi. Lyo ensaranga zikolesibwa bwinja, etawi yapanga okugulira ebiryo aha abantu bakag’iba bali ahali h’okubigulira handi-handi.

 Mwali wirhu muguma enyumpa yage mpyahya yasherezibagwa n’Evolka adesire ntya: “Rhwakag’iciyumva kubi bwenene rhwanal’ivunisire omurhima bwenene.” Cikone omulala gwage gwahâbwa oburhabale bw’omubiri n’obw’ekiroho. Acibir’idera ntya: “Kugerera oburhabale bwa Yehova, rhucigwerhe ebi rhulagirireko. Rhwacibwinire oku Yehova anakashibirira emizigo yirhu n’okuyijira ebe milembu okubarhula.”

 Ecihugo c’e Venezuela cigwerhe nsiku nyinji ciri calwisa amazibu g’okubula ensaranga. Bene wirhu na bali birhu b’eyo munda bali balama akalamo kazibu bwenene k’okubulirwa n’ebiryo n’okuyushuka k’obunizi. Cikone, ikubuliro lya Yehova lirhalekeriri bene wirhu na bali birhu.

 Omu mwaka gw’omukolo gwageraga, dolare muliyoni muguma n’enusu zakolesibwe omukugula n’okurhumira bene wirhu na bali birhu bali omu bulagirire ebiryo n’ensabuni. Etawi y’e Venezuela edesire ntya: “Kurhaba kulembu okuhisa tone 130 z’ebiryo omu cihugo coshi ngasi mwezi n’okubigabira bene wirhu na bali birhu bali omu bulagirire.” Ly’ebiryo birhag’ibola, bene wirhu na bali birhu banakarhuma ebiryo byakayusa nsiku nyinji buzira kubola. Etawi eyushwire ntya: “Rhunakagula biryo binji omu kasanzi k’okusarula bulya ibeyi liba lisungunu. Buzinda rhwanabirhumira bene wirhu omukukolesa enjira erhahûne nsaranga nyinji.”

 Mwene wirhu muguma okola omu Komite y’okuhâna Oburhable y’e Venezuela, ohamagalwa Leonel, aba azigire omukolo gwage bwenene. Adesire ntya: “Omukolo gw’okuhâna oburhabale guba gwago-gwago. Okujira ogo mukolo kwanzibuhize kurhenga mukanie afîre enyanya z’Ekorona. Ngendekire naba na binji byakujira, nanshagalusire bwenene okurhabala bene wirhu na bali birhu bali omu bulagirire. Nacibwinire kunganaci Yehova ahikiriza eciragane cage c’okurhalikirira abakozi bage.”

 Mwene wirhu muguma wahâbagwa oburhabale, wakag’ikola omu komite y’okuhâna oburhabale omu myaka yageraga, adesire ntya: “Nie nalikola ndagirire oku burhabale. Oburhabale rhwahâbagwa, burhali bwa mubiri bone. Bene wirhu bantabire nie na mukanie rhugendekere rhwaba bakurhulirira. Barhushibirire, barhurhuliriza, banarhuha omurhima.”

 Buhanya buguma na buguma bunahikire buzira kulaliza. Ciru akaba ntyo, ngasi mango ikubuliro lya Yehova linacihangane okuhâna oburhabale duba-duba kugerera oburhabale muli mwahâna lyo mulunga okuboko omukolo gw’omw’igulu lyoshi. Njira nguma na nguma z’okuhânamwo oburhabale ziganirirwe oku donate.pr418.com. Rhumuvuzire omunkwa kuli obo buhânyi bwinyu.