Omu 2011, mubunga (réfugié) muguma w’e Érythrée ahika e Norvège. Lusiku luguma, Abahamirizi ba Yehova bamulambagirira lyo bamuganiza lugenda Ebibliya. Ababwira oku al’imanyine n’Abamirizi ba Yehova b’omu cihugo cage. Abahugûlira oku erhi ali musoda, abona oku Abahamirizi ba Yehova bali bashweke erhi buyemere bwabo burhuma, barhakalahira obuyemere bwabo mpu bulya bali babaseza baje omu cisoda na ciru akaba bakagibalibuza.

 Kugerera ebi arhalicirheganyizeko, oyo mulume akwêbwa omu mpamikwa. Abugana akola ali haguma na Bahamirizi ba Yehova basharhu—Paulos Eyasu, Negede Teklemariam, na Isaac Mogos. Abo Bahamirizi bashwekagwa erhi buyemere bwabo burhuma omu mwaka gwa 1994.

 Omu mpamikwa, oyo mulume acibonera n’amasu gage yenene oku Abahamirizi ba Yehova balama ebi bayigiriza. Abona oku Abahamirizi bali bashweke bali bikubagirwa bananakagishangira ebiryo n’abandi bashweke. Abona oku bali bayiga Ebibliya haguma boshi ngasi lusiku n’oku bakagiyegereza abandi bacilunge nabo. Erhi bababwira oku babashwekula bakasinye akaradasi kayerekine oku balahire obuyemere bwabo, balahira.

 Oyo mulume asomerwa bwenene n’olugenzi lw’abo Bahamirizi. Enyuma z’okuhamira e Norvège, alonza okumanya bulya gurhi Abahamirizi ba Yehova bajira obuyemere busezire ntyo. Muli oko, erhi Omuhamirizi wa Yehova amulambagirira, arharhindiraga arhondera ayiga Ebibliya haguma nabo n’okuja oku ntimanano zabo.

 Omu mwezi gwa 9, 2018, abatizibwa aba muguma w’omu Bahamirizi ba Yehova, Agwerhe oluhya lw’okubwira abantu balamire omu Érythrée n’omu Soudan okuli kw’Ebibliya. Anakabaha omurhima bagendekere bayiga Ebibliya n’okuba n’obuyemere busezire.