Enyuma z’okubatizibwa n’okuba Muhamirizi wa Yehova, Zarina agaluka emwabo e Aise omu Russie anahizire okulera bali bage babirhi omu buyemere bw’okuli. Muli oko arhagwerhe nsaranga nyinji, akagilama omu nyumpa yagwerhe cumpa ciguma n’ababusi bage, mwene wabo na mukage. Ababusi bage bamubwira oku irhondo arhahira ayigiriza abana bage na mukage okuli kw’Ebibliya. Kandi abwira abali oku barhahira bakaganiza nnina lugenda okuli kw’Ebibliya.

 Zarina arhanya buzibu-zibu gurhi akarhabala abali bacifunze lugenda Yehova. (Emigani 1:8) Kandi asalira emwa Yehova n’obushiru, amuhûna obulongozi n’obwenge. Buzinda Zarina ajira nk’oku anakagishenga omu kucilambagiza haguma n’abali anali abayeresa ebirhangazo by’obulemi. Oko kucitembeza kwarhabala abali bakuze obuzigire bwabo muli Lulema.

 Kandi, Zarina alonza obundi bulenga bw’okuyigiriza abana bage omu kukolesa ecitabu Biblia Inafundisha Kabisa Nini? * Ayandika oku karadasi ebifungo n’amandiko g’eco citabu. Akagwasamo amahugûlo musungunu-ngunu gakarhabire abali bahugûkwe eyo myanzi bwinja. Buzinda akafulika orho rhuradasi n’ekrayo omu dushe idako ly’amashini g’okufula emishangi. Erhi abali bakajîre mw’eco cumpa, bakagisoma ebyo bifungo n’okuyandika agabo mashuzo.

 Kugerera obo bulenga Zarina arhabala abali bamanye okuli kwa bigabi bibirhi by’ecitabu Biblia Inafundisha Kabisa Nini?. Kasanzi kasungunu ye n’abali bahamira handi-handi. Zarina abona oluhuma lw’okuyigiriza abana bage nk’oku analilonzize. Omu mwezi gwa 10, 2016, abo bali bage babatizibwa. Bashagaluka bwenene okubona nnina akolesize obwenge n’okuba wakucikema ly’abayigiriza okuli lugenda Nnâmahanga.