Ecimanyiso c’Irangi Lidukula n’erya Kasi

YEREKANA

Maud aba alamire e France ananakole oku masomo gw’okurhabala abana b’ebirema amango bali aha masomo. Omu nsiku zigezire banafunzi b’omw’isomo liguma bakayiga isomo liganirire akambi k’Abanazi n’Enterekêro. Abo bashwekwa bakagiyambala emishangi eriko ebimanyiso bya ngasi lubero. Ngasi cimanyiso n’irangi lyaco byakagiyerekana bulya gurhi omuntu ali mushweke.

Erhi aganirira ecimanyiso c’irangi lidukula n’erya kasi (erhi triangle violet omu Cinfaransa), mwalimu aderha ntya: “Ntanyize oku abakagiyambala eco cimanyiso bali balume bayanka ababo.” Enyuma z’amasomo, Maud aganiza oyo mwalimu n’okumuhugûlira oku abakagiyambala emishangi y’irangi ly’e triangle violet bali Bahamirizi ba Yehova. * Amulaganya oku amulerhera abitabu bihugwîre bwinja ogo mwanzi. Mwalimu ayemera oku amulerhere ebyo bitabu anamubwira oku ayishiganirira abanafunzi ogo mwanzi.

Omu lind’isomo, owundi mwalimu aganirira ogo mwanzi go n’ogo, ayerekana etablo eyerekine ebimanyiso abashwekwa bakagiyambala. Eyo tablo yayerekana n’obwalagale oku abakagiyambala emishangi y’irangi ly’e triangle violet bali Bahamirizi ba Yehova. Enyuma z’amasomo, kandi Maud aha oyo mwalimu naye amahugûlo okubiyerekire ogo mwanzi. Oyo mwalimu ayemera anamubwira oku aganirire abanafunzi ogo mwanzi.

Maud agwerhe ebitabu akolesagya

Erhi Maud aja omw’isomo lya burhanzi arhanya oku ajira miniti 15 yone ly’ahugûla ogo mwanzi, cikone erhi eyo miniti 15 ehika, bamubwira ntya: “Ongendekeze, rhukuhire nsa nguma yoshi.” Maud arhangiyerekana evideo eganirire gurhi Abahamirizi ba Yehova balibuzibagwa n’Abanazi. Erhi eyo video ehika aha bayerekine gurhi Abanazi barhôlaga bana 800 b’Abahamirizi ba Yehova babashwekera kuli n’ababusi babo, Maud ayiyimanza buzinda asoma ebi bana basharhu ba mw’abo bana bacibwinire. Enyuma z’okuyerekana eyo video, Maud ashwinja ogo mwanzi omu kusoma amaruba Muhamirizi muguma w’e Autriche wakagihamagalwa Gerhard Steinacher, waligwerhe myaka 19 ayandikiraga ababusi bage omu mwaka gwa 1940, nsa nsungunu embere Abanazi bamunige. *

Maud ayishiganirira ogo mwanzi go n’ogo omw’isomo lwakabirhi. Kugerera oburhwali Maud ayerekanaga, abo balimu bombi erhi bakanaciyigirizagya lugenda abantu balibuzibagwa n’Abanazi, banaganirire n’ebyahikiraga Abahamirizi ba Yehova.

^ Omu mango g’Ivita Lyakabirhi ly’omw’Igulu lyoshi, Abahamirizi ba Yehova b’e Allemagne, bakagilugihamagalwa Bibelforscher (Banafunzi b’Ebibliya), babahira omu mpamikwa mpu bulya balahire okulunga Abanazi okuboko.

^ Abanazi baderha oku Gerhard Steinacher anigwe bulya amalahira oku arhaja busoda omo cihugo c’e Allemagne. Mw’ago maruba g’okusengeruka ababusi bage, ayandika ntya: “Nciri mwana, cikone erhi Nnawirhu akampa emisi ntalahire obuyemere bwani, na ntyo ko ndi namushenga.” Baniga Gerhard omu sezi ly’olusiku lwakulikiraga. Oku nshinda yage bayandika ko ntya: “Bamunigaga enyanya z’okukenga Nnamahanga.”