Nakuliraga omu mulala gw’Abakatoliki e Rochester, omu New York. Ababusi bani balekanaga erhi ngwerhe myaka munani. Muli oko, omu nsiku z’omu kagarhi k’omugobe nakagilama na nyama omu nyumpa z’abantu bakenyi n’oku buzinda bw’omugobe nakagilama na larha omu eneo y’abantu bagale. Erhi mbona gurhi nyama akagilibuka ly’arhulera rhweshi bana bage ndarhu, narhondera narhanya oku nakabamo mugale lyo ntabala omulala gwirhu.

 Larha akagilonza mbe n’akalamo kinja, muli oko ajira omupango lyo ncilambagirira masomo maguma galengerire bwenene, gakagirhabala abantu babe bimangizi ba hoteli. Nashagalukira ago masoma, ho n’aho naciyandisa n’okurhondera nahasomera. Naliyemire n’obwalagale oku Nnâmahanga anashuzize okw’isala lyani ly’okumushenge mbe mugale n’okuba n’obushagaluke. Naciyigiriza okuba mwimangizi w’e hoteli, naciyigiriza irhegeko ly’oburhimbûzi n’oku nakakolesa enfaranga z’ekompanyi myaka irhanu. Muli ako kasanzi ko n’ako nakagijira akazi omu hoteli y’akazino omu vile y’e Las Vegas, Nevada.

 Erhi nyeneza myaka 22, naba vice-président w’e hoteli y’akazino. Nakabonekana mugale, ogwerhe akalamo kinja na kasanzi kanji nakagishagalukira ebiryo binja n’amamvu g’ibeyi likali. Abîra bani rhwakagijira nabo oburhimbûzi bakagimbwira ntya: “Lonza enfaranga we mulume, nk’orhagwerhi nfaranga mw’er’iguli erhi oli wabusha.” Bakagibona oku enfaranga zo zilerhera omuntu omwishingo gw’okunali.

 Akazi kani kalihiziremo okuyendera abagale bagakiyisha oku Las Vegas ebiryo. Ciru akaba bali bagale bwenene, barhagwerhe bushagaluke. Nani narhondera nabula obushagaluke. Okuderha okuli, oku nagendekeraga napata enfaranga ko nanagendekeraga nalonza binji n’okubula iro. Narhondera narhanya okuciyukiza akalamo. Ntabonaga obushagaluke nakagirhanya okuba nabo omu kalamo, muli oko narhodera nadosa Nnâmahanga ntya: “Ngahi nakakula obushagaluke bw’okunali?”

 Ago mango, bali birhu babirhi bâli Bahamirizi ba Yehova bahamira e Las Vegas. Ciru akaba nakagilahira ebicapo byabo, nayemera okuyiga Ebibliya haguma nabo omu kukolesa Ebibliya nalindangalire. Omu Bibliya yani, enderho za Yezu zoshi zalinyandike n’irangi lidukula. Bulya naliyemire ngasi ebi Yezu aderhaga, bali birhu bakolesa enderho za Yezu lyo baganira haguna nani. Kandi nakasoma niene Ebibliya amango ndi niene.

 Bintu binji nasomaga omu Bibliya byansomeza bwenene. Kwa lwiganyo, Yezu aderha ntya: “Kuziga nka mwashenga, murhaderhaga binji nka bapagani, abarhanya mpu okuderha binji kwarhuma bayumvibwa.” (Mateyo 6:7) Cikoki, padiri ampa enfoto ya Yezu anambwira oku erhi nakashenga omu kuyikolesa n’okugalukira isala lya Larha Wirhu na kal’ikumu isala lya Mariya Mutagatifu, Nnâmahanga ampa nsaranga nyinji nalilagirireko. Cikoki nayishifulûla oku okujira ntyo kwalikugalukiragalukira enderho zo na zirya. Kandi, nasoma ezi nderho za Yezu: “Mumanye murhakagibwira ndi mpu ‘Larha’ en’igulu, bulya Sho ali muguma yenene, ye Sho w’empingu.” (Mateyo 23:9) Muli oko nacibicidosa, ‘Bulya gurhi nie n’abirhu Bakatoliki rhuhamagala ba padiri birhu “Larha”?’

 Omu busomi bwani bw’Ebibliya, erhi mpika omu citabu c’Ebibliya ca Yakobo, narhondera okurhanya bwenene lugenda akalamo kani. Omu cigabi ca 4, Yakobo ayandisire ntya: “Ezi ndyalya, ka kuhaba muhabire oku okuyinjibana igulu kuli kushombana na Nnâmahanga? Kwo kuderha oku owalonza okuba mwira w’igulu anacijire mushombanyi wa Nyamuzinda.” (Yakobo 4:4) Omulongo gwa 17 gwampumako bwenene: “Ntyo, omanyire aminja ankajira, akanabula bwagajira, erhi caha ajizire.” Buzinda nahamagala bali birhu oku telefone n’okubabwira oku nkola naleka akazi kani k’ehoteli n’akazino bulya nahizirwe omu bintu ntayemeraga, kuhiramo emicezo y’enfaranga.

 Nalisîmire obwira bwani haguma na Nnâmahanga, ababusi bani, bene wirhu na bali birhu b’omulala bube bwinja. Muli oko nahiga okukolesa akasanzi kani omu kujira akalamo kani karhabagamo izâbyo. Cikoki kurhali kulembu okushanje. Kwa lwiganyo, nahâbwa amakazi n’okupata nfaranga nyinji omu by’oburhimbuzi bw’akazino n’ehoteli. Bandaganya oku ciru bampa mushahara munji kabirhi erhi kasharhu kulusha ogu nakagipata embere. Cikoki, enyuma z’okusalira lugenda oko, nahiga okuleka akalamo ka ntyo. Naleka akazi kani, nahamira omu garage yali oku nyumpa ya nyama n’okurhondera oburhimbûzi busungunu bw’oku plastifier e menus z’erestora.

 Ciru akaba Ebibliya yantabire okucihirira ho emihigo minja, ntalisagija oku ntimanano z’Abahamirizi ba Yehova. Bali birhu bandosa ecimpanzize. Nabashuza ntya: “Nnâmahanga winyu Yehova, agaba omulala gwirhu kabirhi. Akasanzi kaguma ngwerhe kw’okuba haguma n’omulala gaba amango g’idinye lya Noweri n’ely’okuburhwa, n’obu mwehe murhajira ezo nsiku.” Mwali wirhu muguma arhondera alaka n’okundosa: “Ngahi oba omu zindi nsiku zoshi z’omu mwaka? Rhwehe rhusimire okuba nawe ngasi lusiku. Cikone wehe olonzize okayisha amango g’ezo nsiku nkulu zone bulya ko bihunyire okujira ntyo.” Enderho zage zampumako, nani narhondera nalaka haguma naye.

 Erhi manya oku Abahamirizi ba Yehova banasîme emilala yabo, lubero n’oku nakagirhanya, nahiga okuja oku ntimanano nguma aha Nyumpa y’Entimanano. Erhi mba ndi eyo, nabugana Kevin, mwalimu w’Ebibliya w’obulenga warhonderaga okunyigiriza Ebibliya.

 Kevin na mukage bakagilama akalamo karhahunyiri binji lyo bakolesa akasanzi kabo omu kurhabala abandi bamanye Ebibliya. Orhufaranga bagwerhe rhwabarhabala okulambagirira e Afrique n’e Amérique Centrale lyo baciyubaka etawi z’Abahamirizi ba Yehova. Ali mulume na mukage bagwerhe omwishingo munji omu mulala banasimanaga. Bakagilama ‘akalamo nakagilorha okuba nako.’

 Kevin anyereka evideo lugenda obushagaluke bw’omukolo gw’obumisionere, nanahiga oku lusiku luguma nanabe misionere. Omu mwaka gwa 1995, myezi ndarhu enyuma z’okuciyigiriza Ebibliya bwenene, nabatizibwa naba Muhamirizi wa Yehova. Ahali hw’okushenga Nnâmahanga obuhirhi, narhondera nashenga ntya: “Orhampâga bukenyi orhanampâga bugale.”​—Emigani 30:8.

 Kuhika buno nabîre n’obuhirhi bw’okunali, arhali bwa nfaranga, cikone bwa kiroho. Nabuganaga omukazi wani muzigirwa, Nuria omu cihugo c’e Honduras. Rhweshi naye rhuli rhwakolera e Panama n’e Mexique nka ba misionere. Ezi nderho z’Ebibliya ziri z’okuli: “Emigisho ya Yehova yo ejira omuntu abe mugale, arhanayushûla malumwa goshi goshi haguma nayo”!—⁠Emigani 10:22.