Naburhagwa omu vile y’e Calgary omu Alberta, e Canada. Erhi nciri murho, ababusi bani bazaza obuhya bwabo, na nie na nyâma rhwaj’ilama emwa shakulwe oburha nyâma. Shakulwe na mugaka bal’inzigire banal’izigire nyâma, nanali mwana wa bushagaluke bunji. Nancikengere ogo murhûla n’obuzigire bunji bakag’inyeresa omu myaka yani y’oburho.

 Erhi ngwerhe myaka nda, akalamo kani kaba kabi bwenene erhi larha na nyâma bacib’irhôlana n’okuhamira e St. Louis, Missouri, omu États-Unis. Kasanzi kasungunu enyuma z’aho navumbula oku larha ali muminya bwenene. Kwa lwiganyo, olusiku lurhanzi erhi ngaluka aha kâ narhenga emasomo, ayumva oku banyagazize cikone ntalwire. Agaya ananshurha bwenene kulusha oku abanafunzi banshurhaga emasomo! Oko kwampa isomo nanarhondera nalwa n’abandi bana erhi nancigwerhe myaka nda yone.

 Nyâma agaya bwenene anaheza obushagaluke, enyanya z’obukali bunji bwa larha n’oko kwakarhuma barhayumvikana. Erhi mba na myaka 11 narhondera nakolesa amafumu g’okucilalusa n’okunywa amamvu okurhalusire olugero. Naba muhalazi bwenene na kanji-kanji nakalwisa abantu omu mabarabara. Nayusize amasomo g’enyanya erhi nkola mba muntu muminya bwenene.

 Erhi mba na myaka 18, naciyandikisa omu Murhwe gw’Abasoda Balwira omu Nyanja b’e États-Unis. Eyo munda bankomereza okukaniga abantu. Enyuma za myaka irhanu, naleka eby’ecisoda nanarhondera nayiga epsikoloji bulya nal’igwerhe obulangalire oku napata akazi omu FBI (le Bureau fédéral d’enquêtes aux États-Unis). Narhonderera amasomo g’e université e États-Unis n’erhi ntengayo nagagendekereza omu Canada.

 Oku université nakag’ivunika omurhima bwenene enyanya z’oku nakag’ibona abantu boshi bayosire. Abantu bakabonekana bali bakucikaliza bwenene, ngasi kantu oku igulu kakabonekana kali ka busha, n’amazibu ga bene bantu gakabonekana nka garhakahwa. Obulangalire nal’igwerhe kuli bene bantu oku banajira igulu libe hantu hinja bwenene bwahwa.

 Bulya nta muhigo nagwerhe omu kalamo, narhondera okukanywa amamvu bwenene n’okukolesa amafumu g’ocikulalusa n’okulongereza bwenene ensaranga n’okujira eby’enshonyi. Ebi nakag’irhanyako byone lyali idinye lihi najako na mukazi ohi najira obugonyi haguma naye. Okukomerezibwa kwani omu by’ecisoda kwakag’irhuma naba wa kucilangalira bwenene, n’oko kwakarhuma nakalwa kanji-kanji. Narhanya oku niene nakacihirireho amarhegeko lugenda ebinja n’ebibi n’oku nakalwisize ngasi muntu nakag’irhanya oku ali abonerera abandi. Okuderha okuli, nal’ikola mba mujà w’obuminya bwenene.

 Lusiku luguma nie n’omwîra wani rhwali omu mwani erhi rhwalalusire bwenene enyanya z’edroge rhwanakag’icirheganya okugeza efrode y’ibangi lyo rhuliguza, omwîra wani andosa erhi nal’iyemire Nnâmahanga. Nashuza erhi: “Erhi akaba Nnâmahanga ye olerha aga malibuko goshi gali omu igulu, ntankalonza mmumanye!” Olusiku lwakulikiraga, ko kuderha olusiku lurhanzi najaga ebwa kazi kani kahyahya, owirhu munya-kazi wali muhamirizi wa Yehova andosa ntya: “K’orhanyize oku Nnâmahanga ye olerha amalibuko gali omu igulu?” Nasomerwa enyanya z’ebi naderhaga olusiku lw’embere zaho, nalonza okumanya binji. Omu miezi ndarhu yakulikiraga rhwajira nshambalo nyinji bwenene, ananyeresa amashuzo g’Ebibliya oku madoso gani maguma na maguma mazibu bwenene nakag’icidosa lugenda akalamo.

 Omunyere nakag’isheba nal’ilamire naye omu mwani mwago mango, arhakag’ilonza muganirire ebi nakag’iyiga. Lw’Iyinga luguma namubwira oku nalalisire Abahamirizi ba Yehova aha mwirhu lyo bakarhuyigiriza Ebibliya. Olusiku lwakulikiraga, erhi ntenga ebwa kazi narhimana anahêsire ngasi kantu kali omu nyumpa anandeka. Naja embuga nanarhondera nalaka. Na kandi nashenga Nnâmahanga, nakamuhûna oburhabale. Obo bo bwali burhanzi nakolesa izino lya Nnâmahanga, ko kuderha izino Yehova, omu isala.​—Ennanga 83:18.

 Nsiku ibirhi enyuma z’aho narhondera okuyiga Ebibliya oburhangiriza haguma n’Abahamirizi ba Yehova, ko kuderha mulume muguma na mukage. Erhi bagenda nagendekera nasoma ecitabu c’okuyiga Unaweza Kuishi Milele Katika Paradiso Duniani, nanaciyusa mw’obo budufu. a Ebi nayigaga lugenda Yehova Nnâmahanga n’Omugala Yezu Kristu, byampuma oku murhima. Nabona oku Yehova aba wa bonjo ananaciyumve kubi erhi rhulibuka. (Izaya 63:9) Ci bwenene obuzigire bwa Nnâmahanga kuli nie n’enterêkero Omugala ahânyire oku bunguke bwani byampuma oku murhima. (1 Yowane 4:10) Nayemera oku Yehova akag’inembera “kulya kuba arhalonza hajire owahera, ci alonza boshi baciyunjuze.” (2 Petro 3:9) Naciyumva oku Yehova al’ilonzize mbe mwîra wage.​—Yowane 6:44.

 Ogo mugobe go n’ogo narhondera okuja oku ntimanano z’ecigamba. Nal’igwerhe emviri ndîri, nal’iyambirhe ebisikiyo, nanakag’ibonekana ndi muntu wa kuyobohya, cikone Abahamirizi ba Yehova banjirira nka muntu w’omu mulala gwabo wagwerhe nsiku nyinji ahezire. Ebijiro byabo byali bya Bakristu b’okuli. Naciyumva nka namagaluka aha kâ haguma na shakulwe na mugaka, ciru omu hantu hinja kulusha.

 Buzira kulegama, ebintu nakag’iyiga omu Bibliya byarhondera okushanja akalamo kani. Namôma emviri zani, naleka olugenzi lw’okujira eby’enshonyi, nanaleka okukolesa amafumu g’okulalusa n’okunywa amamvu okurhalusire olugero. (1 Abakorinti 6:9, 10; 11:14) Nal’ilonzize nshagaluse Yehova. Co cirhumire erhi nakayizire oku aba ashombire kantu kalebe nakag’ijira, ntacikag’ihalira ciru n’ehitya olugenzi lwani. Lubero n’oko, nakag’iciyumva kubi bwenene omu murhima. Nakag’icibwira erhi: ‘ntakacishubirira najira ntyo ciru n’eliguma.’ Na buzira kurhindira, nakag’ishanja entanya zani n’ebijiro byani. Enyanya z’oko, narhondera nabona duba-duba obunguke bw’okujira ebintu nk’oku Yehova alonzize. Omu nsiku 29/7/1989, ko kuderha myezi ndarhu enyuma z’okurhondera nayiga Ebibliya, nabatizibwa n’okuba Muhamirizi wa Yehova.

 Ebibliya yantabire okushanja obumuntu bwani. Omu mango gageraga, kanji-kanji nakag’ikola n’obuminya erhi nakarhimanine n’omuntu mukali. Cikone ene, nkola njira oku nakanahasha koshi lyo mba “n’omurhûla n’abantu boshi.” (Abaroma 12:18) Ntabona oku nshinganine okukungwa enyanya z’oko cikone namvuge Yehova omunkwa enyanya z’obuhashe bw’okushanja akalamo bw’Akanwa kage n’obw’iroho lyage litagatifu.​—Abagalasiya 5:22, 23; Abahabraniya 4:12.

 Ahali h’okuba mujà w’amafumu g’okucilalusa, obuminya, n’amarala g’okujira eby’enshonyi, nkola ncihangana okushagalusa Yehova Nnâmahanga n’okumuha ebintu byani binja bwenene. Oko kuhiziremwo okurhabala abandi bahikire aha bamumanya. Myaka misungunu enyuma z’okubatizibwa, nahamira omu yindi eneo ly’ontabala okuhubiri omu maeneo gagwerhe bulagirire bunji bwenene bw’abahubiri. Omu myaka minji, nabire n’omwishingo gw’okuyigiriza bantu banji n’okubona gurhi Ebibliya yakubwîre akalamo kabo nabo. Na kandi nshagalusire bwenene okubona nyâma naye ahikire okuba Muhamirizi wa Yehova​—egarhi k’ebyamushumize kwali kubona empindulo nyinja najijire omu kalamo kani n’omu lugenzi lwani.

 Omu mwaka gwa 1999, e El Salvador, nahâbwa ediplome y’oku masomo gakola gahamagalwa ene Masomo g’Abaeneza Injili b’Obwami. Ago masomo gankomerezize n’okumpa ebi ndagirireko lyo ncihâna bwenene omu mukolo gw’amahubiri, okuyigiriza n’okushibirira ebibuzi omu cigamba. Enyuma z’aho mw’ogo mwaka, narhôla mukanie muzigirwa, Eugenia. Rhuli rhwakola haguma nka bahubiri b’akasanzi koshi omu Guatemala.

 Ene, ahali h’okuvunika omurhima lugenda akalamo, nkola mba nshagalusire bwenene. Okukolesa enyigirizo z’Ebibliya kwankuzire omu bujà bw’olugenzi lw’eby’enshonyi n’obuminya kwanampa akalamo kayunjwire buzigire bw’okunali n’omurhûla.