Naburhagwa omu mulala gw’abakenyi e Tirana, kapitale kakulu k’e Albanie. Larha ali mulume mwikubagirwa ananakagikola bwenene ly’ahikiriza amalagirire girhu. Cikone rhurhagwerhe nfaranga nyinji z’okurhurhabala okuhikiriza amalagirire girhu. Erhi mba ndi mwana wa mushûko nakaciyumva kubi lugenda obukenyi nalilamiremo. Ecigabi cinji c’akalamo kani k’eburho ntagwerhe birata ntanagwerhe biryo binji.

 Narhonderaga nazimba erhi nanciri murho. Nakacibwira oku omu kujira ntyo ndi narhabala omulala gwani. Buzinda, abapolisi bangwarha. Muli oko, omu mwaka gwa 1988, erhi ngwerhe myaka 14, larha ampêka oku masomo gw’okushanja olugenzi. Nalama eyo myaka ibirhi nanaciyigiriza omukolo gwa soudeur. Enyuma z’aho nalonza ntondere okulonza ebyani birugu omu bwikubagirwa, cikoki ntabonaga kazi. E Albanie, bantu banji barhagwerhe kazi erhi politike ya cihugo erhuma. Okuvunika omurhima kwarhuma nashubigalukira akalamo kani ka mira, na ntyo nacibirhondera nazimba. Buzinda, nie n’abîra bani rhwagwarhwa rhwanatwirwa myaka isharhu ya prizo.

 Erhi ntega omu prizo, nagendekera n’omukolo gwani gw’obushumûsi. Hali amango obuhirhi bw’ecihugo bwanyihaga n’ecihugo coshi caja omu mazibu bwenene. Muli ago mango mazibu, napata nfaranga nyinji kugerera omukolo gurhal’iyemirwe omu cihugo. Enyuma z’okucizimba n’amabunduki, babirhi egarhi k’abarhwakajira nabo ogo mukolo bagwarhwa, nayaka ecihugo cani lyo ndekishwekwa myaka minji. Ago mango nalikola njira omukazi, Julinda, rhwanalikola rhugwerhe omwanarhabana.

 Rhwajilama e Angleterre. Nagwerhe irala ly’okurhondera akalamo kahyahya nie na mukanie na mugala wirhu, cikoki kwali kuzibu okushanja akalamo kani ka mira. Nashubirhondera akalamo k’obushumûsi, lero ago mango narhondera narhimbula amafumu g’okucilalusa erhi cimoge​—enfaranga zakazidoha omu maboko gani, k’okuderha oku napata nfaranga nyinji.

 Gurhi Julinda akagirhanya lugenda ogo mukolo gwani? Leki yene arhubwire: “Nakuliraga e Albanie, nakagilôrha oku nakacirhenza omu bukenyi. Nalitayari okujira ngasi kantu lyo mba nakalamo kinja. Nakagirhanya oku enfaranga zanarhulerhera omwishingo, nakayemerera Artan okunywerha, okuzimba n’okurhimbûla amafumu g’okucilalusa bulya oko kwakagirhuha enfaranga.”

 Buzinda, omu 2002, akalamo kirhu kashanja, n’obulangalire bwirhu n’ebilôrho birhu byahwa. Nagwarhwa erhi ngwerhe oburhimbûzi bwani bw’amafumu g’okucilalusa na buzinda nashubicibugana omu prizo.

 Ebibliya yarhondera yashumya akalamo kani ntanamanyiri. Omu 2000, Julinda abuganana n’Abahamirizi ba Yehova ananarhondera ayiga Ebibliya haguma nabo. Okuganira eby’Ebibliya kurhakagintôla akasanzi, bulya nakagibona oku biri byakurhamya konene. Cikoki Julinda yehe akakushagalukira bwenene. Ahugwire ntya: “Naburhagwa omu mulala gwakagisîma eb’idîni bwenene, k’okuderha oku nakagishagalukira Ebibliya bwenene nanakagiyikenga bwenene. Kurhenga mira nakagilonza okumanya bici Ebibliya eyigiriza, na muli oko nashagaluka bwenene okuyiyiga haguma n’Abahamirizi ba Yehova. Nakabona oku nyigirizo nyinji z’Ebibliya zishinganine. Ebi naciyigirizagya byantabala nshanje akalamo kani, cikoki zirhashanjaga oku nakagibona enfaranga kuhika amango Artan agwarhagwa n’okushwekwa. Naciyumva kubi bwenene. Ho n’aho nahugûkwa oku ebi Yehova adesire okubiyerekire enfaranga biri by’okuli. Rhwajijire okwirhu koshi lyo rhugala, cikoki oko kurharhulerheraga bushagaluke. Nahugûkwa oku bihunyire okurhumikira enyigirizo za Yehova zoshi.”

 Omu 2004, erhi ntenga omu prizo, nalonza oku nakacibija omu burhimbûzi bw’amafumu gw’okucilalusa. Cikoki Julinda akabona ebintu lubero n’oko anambwira akantu kantabire ntanye bwenene: “Ntacilonzizi enfaranga zawe. Ndonzize omulume wani n’ishe w’abana bani.” Oko kwampumako, nanabona oku adesire okuli. Nagezize myaka minji kuli n’omulala gwani. Nalilonzize mbe mugale kugerera omukolo gurhaligo, gwananderhera malumwa manji. Muli oko nahiga okushanja akalamo kani n’okutwa olushangi haguma n’abîra bani ba mîra.

 Nahumwa oku murhima bwenene erhi ndusa mukanie n’abana bani oku ntimanano y’Abahamirizi ba Yehova. Nahumwako bwenene erhi mbona obwira n’obwikubagirwa bw’abantu nabonaga. Na buzinda narhondera okuyiga Ebibliya.

 Naciyigiriza omu Bibliya oku “abalonza (abazigira) okugala banahirimire omu marhangulo n’amarala manji g’obuhwinja . . . Bulya okusima enfaranga kwo kulerha ngasi mabi.” (1 Timoteyo 6:9, 10) Akalamo nal’ilamire kone kantabire okubona oku ezo nderho ziri z’okuli. Naciganya bwenene lugenda ebyahikîre akalamo kani k’embere n’amazibu kalesire omu mulala gwani (Abagalasiya 6:7) Erhi nyiga oku Yehova n’omugala Yezu barhuzigire, narhondera nashanje olugenzi lwani. Naleka okukacirhanyiza okurhalusire olugero n’okurhondera narhanyiza abandi, omu kugeza kasanzi kanji haguma n’omulala gwani.

 Nayungusire omu kushimba er’ihano ly’Ebibliya: “Mumanye okusîma enfaranga kwakamurhambula omu bijiro binyu. Mushagalukire ebi mugwerhe.” (Abahabraniya 13:5, Mashi Bible) Nkola njira omurhûla omu bukengere n’ezamiri yani ekola eba ecîre. Oko kwanderhire bushagaluke bunji ntalizigiyumva embere. Obuhya bwani bukola buba bwinja bwenene n’omulala gwani muli obumvikane.

 Mango mira nakagirhanya oku erhi rhwakabire na nfaranga nyinji lyo rhwakabire n’obushagaluke. Bibonekine bwinja oku obudambye n’okusîma enfaranga kwanderhire malumwa manji. Rhurhali bagale, cikoki nciyumvire oku rhwabwine akantu k’engulo ndarhi omu kalamo kirhu—obwira haguma na Yehova Nnâmahanga. Okumuharamya haguma omu mulala kwarhulerhire bushagaluke bunji bwenene.