“Nta nderho ngwerhe z’okuyerekana obushagaluke omuntu aba nabo omu kujikolera ahali obulagirire bunji bw’abahubiri!” Ntyo ko Joshua olama e États-Unis aderhaga, cikoki wakolire kasanzi kalebe omu Guyana. Bahamirizi ba Yehova banji bahubiri mw’eco cihugo ciba mwo bantu banji basima okuli, nabo banaciyumve ntyo. * Isomo lihi barhuyigirizize? Erhi akaba ohizire okucikolera ahali obulagirire bunji bw’abahubiri, ebi bacibwinîre byanakurhabala ocirheganye bwija.

 Embere rhuhamire e Guyana, mwene wirhu ohamagalwa Linel akagihubiri omu eneo y’emwabo e États-Unis erhakagilugijibwamo n’abahubiri. “Ecikundi c’abantu 20 egarhi kirhu barhumwa omu cigabi ciguma c’e eneo y’e Virginie-Orientale. Adesire ntya: “Amahubiri n’ecinyabuguma nabwine mw’eyo migobe byashanja akalamo kani! Nahiga oku nakolera Yehova kasanzi kanji.”

 Mulume muguma na mukage bahamagalwa Garth na Erica barhondera okurhanya oku bankajir’ikolera omu cihugo c’emahanga, na muli oko bacishoga Guyana. Bici byabashumagya? Erica ahugwîre ntya: “Nie n’ibanie rhwalimanyire owundi mulume na mukage bajaga eyo.” “Omwishingo gwabo n’obuzigire bwabo lugenda ebi bajijire byarhushumya nirhu rhuhamire eyo.” Erica na Garth bagezize myaka isharhu y’obushagaluke bahamagire, “mukolo muzigirwa.” Garth adesire ntya: “Rhwalabwire okukolera erhali emwirhu k’okuderha gurhi, rhwanabona oku kwali kwinja.” Buzinda ye na mukage bayishihamagalwa oku Gileadi na ntya bali bakolera omu Bolivie.

 Ebibliya erhuhunyire rhulame akalamo karhahunyiri binji. (Abahabraniya 13:5) Kandi erhuhunyire okurhanya bwinja embere z’okurhola emihigo y’obulagirire omu kalamo. (Luka 14:26-33) Amango rhulonzize okuhamira omu cihugo ca bene, ago makanuni gakwanine gakole! Garth ayandisire ntya: “Embere rhuje e Guyana, nie na Erica, rhwalama akalamo karhahunyiri binji. Rhwaguza oburhimbuzi bwirhu, enyumpa yirhu na ngasi kantu karhali ka bulagirire omu mwirhu. Oko kwajijire myaka milebe. Ago mango go n’ago, irala lirhu ly’okucikolera e Guyana lyayushûka omu kugendekera rhwasegeza obwenge bwirhu oku muhigo gwirhu gw’okulambagirira eco cihugo ngasi mwaka.”

 Hali akandi kantu bihunyire okusegeza: Okubona olusaranga. Omu bindi bihugo, abahubiri “bagend’irhabala” banayemererwe okukola. Abandi bahubiri banagaluke emwabo kasanzi kaguma kaguma lyo bacijira akazi. Oko kwabarhabala okukolera e Guyana myaka 18 y’obushagaluke, kuhiramo yindi myaka 7 enyuma za mwali wabo okuburhwa.

 Olwandiko lwa Ennanga 37:5 ludesire ntya: “Olagîse Nyakasane [Yehova, NWT) enjira zawe, onacîkubagireye, wabona ebi akola.” Christopher na Lorissa kurhenga e États-Unis bakagisalira ngasi mango lugenda omuhigo gwabo gw’okugendikolera omu cindi cihugo. Kandi, amango g’enterekêro yabo y’omulala bakagilug’ilabiriza ebintu bakakajira, lyo bahama omu kujira eliste y’obunguke n’amazibu. Okubona olulimi lw’okuganira lwali lwabulagirire, bacishoga e Guyana bulya Ecingereza lo lulimi baganira eyo.

 Buzinda bajira nk’oku akanuni ka Emigani 15:22 kadesire: “Ahali abahanûzi banji, emihigo kuyunjula eyunjula.” Bayandikira ebiro by’etawi eyimangire omukolo omu cihugo c’e Guyana amaruba. * Muli ago maruba bayandika akansanzi kabo n’emyanzi ebayekerire bonene. Ako kasanzi ko n’ako, badosa amadoso gayerekire amagala nkana, e clima n’ekomedu z’eco cihugo. E Beteli yashuza oku madoso gabo n’okubaha e nimero y’omuratibu w’embaraza y’abagula y’e eneo balirheganyize okujamo.

 Linel, rhwaganiriraga embere akola aba mwangalizi w’omuzunguko eyo munda e Guyana. Embere aj’ilama mw’eco cihugo, naye arhanyize oku kanuni kali omu Emigani 15:22. Adesire ntya: “Aha nyuma n’okubîka olusaranga eburhambi, naganirira abandi bahubiri bali bamakakolera omu mahanga ga bene omuhigo gwani. Nabiganirirako mwangalizi wirhu w’omuzunguko naye. Na kandi nasoma ngasi mwanzi nabonaga omu bicapo birhu okubiyerekire amahubiri omu eneo zibamo bulagirire bunji bw’abahubiri.”

 Embere z’okuhamira omu cindi cihugo, bahubiri banji banahige okurhangilambagirira eco cihugo. Joseph na Christina, mulume na mukage bakristu badesire ntya: “Erhi rhuja e Guyana oburhangiriza, rhwajirayo myezi isharhu. Eyo myezi yarhurhabala rhumanye gurhi ebintu biyorha eyo. Buzinda rhwagaluka emwirhu lyo rhugendishana ebirugu byalisigire n’okuhamira eno.”

 Lyo bakolera Yehova bwinja omu mahanga ga bene, abahubiri bakwanine baciyime n’okuba babidu okukomera akalamo n’enkomedu mpyahya. Kwa lwiganyo, abahamira omu bihugo bibamo idûrhu linji n’obo emunda barhenga eba emboho bwenene, banabone enyuma yabo mpyaha ekola erimo ebiruru bya ngasi lubero. Joshua rhwaganirire enyanya adesire ntya: “Ntalizigibona ebiruru binji ntya.” Eno Guyana, ebyo biruru byakagibonekana binenene! Cikoki nabona oku byanahashikana oku bipunguza erhi omuntu akajira oku akanahasha ly’aleka enyumpa yage ecîre, nk’okukoropa, okurhaleka ensahani zicafwire n’okugendi kabulira obucafu (pubele).

 Okulama omu cihugo cihyahya, kuhunyire okucikomereza ebiryo bihyahya n’okuyiga oku biyendwa. Joshua akengire ntya: “Owurhu rhwalihanzire naye rhwahûna bene wirhu na bali birhu barhuyigirize okubadeka biryo biguma na biguma by’eyo. Enyuma z’okumanya gurhi biyendwa, rhwakayegereza emwirhu bahubiri baguma na baguma b’omu cigamba cirhu bayishe bashangîre haguma na nirhu ebiryo. Oko nako kwali kwinja bulya kwarhurhabala okumanyirira bene wirhu na bali birhu n’okujira obwira huguma nabo.”

 Okubiyerekire okucikomereza enkomedu z’eyo, Paul na Kathleen bakengire ntya: “Rhwalikwanine rhujire ebi rhurhalisagijira; kushanja okurhulama, n’okushanja oku rhuyambala. Byalihunyire rhucirhohye n’okushanje buzira kugokeza amakanuni g’Ebibliya. Okucikomereza enkomedu z’eyo kwarhurhabala rhuyegerere ecigamba n’oko kwaligwerhe bunguke bunji oku mukolo gwirhu gw’amahubiri.

 Banji bayemire ezi nderho za Joseph na Christina baderhaga ntya: “Emigisho erhalusire amazibu. Okurhenga oha mwirhu kunarhurhabale rhumanye ebi rhubwine bya bulagirire omu kalamo kirhu. Ebintu byakagibonekana bya bulagire kuli rhwe embere birhaciba bya bulagirire kuhika buno. Ebi rhwalamire byazibuhize omuhigo gwirhu gw’okujirira Yehova ngasi oku rhwakanahasha koshi. Rhushagalusire rhunarhimusire.”

 Erica rhwaganirire ahugwire ntya: “Okukolera ahali obulagirire bunji bw’abahubiri kwantabire nie n’ibanie rhuhugûkwe okucikubagira Yehova kw’okuderha gurhi. Rhwabwine kunganaci ali arhurhabala kulusha agandi mango goshi. Okubona nie n’ibanie rhwalamire ako kasanzi koshi haguma, oko kwazibuhya obuhya bwirhu.”