Bahamirizi ba Yehova babirhi Madián na Marcela bakagilama akalamo kinja e Medellín omu Colombie. Madián agwerhe akaza kinja na kamushahara mwinja, banalilamire omu nyumpa nyinja. Cikoki kantu kaguma kabashumya balole erhi kobinali Yehova ye bali bagwasa oku nafasi ntanzi erhi birugu bya mubiri. Bahugwire ntya: “Omu mwaka gwa 2006, rhwaja oku ntimanano yago-yago ya lusiku luguma yali desire ntya: ‘Mube n’Isu Lilembu.’ Mahotuba manji gajiragwa, gasegeza obulagirire bw’okulama akalamo karhahunyiri bintu binji lyo rhusimisa Nnâmahanga,” ayushwire ntya: “Erhi rhukola rhuli rhwagaluka, rhwabona oku rhwehe rhurhalamiri nk’oku ezo hotuba zajaga za segeza. Lubero n’oko rhwakagigula bintu binji buzira kurhanya n’oko kwarhugwasa omu madeni manji.”

 Enyuma z’okuhugûkwa akalamo kabo, Madián na Marcela barhonderha balama akalamo karhahunyiri bintu binji. Badesire ntya: “Rhwarhondera rhwanyihya oku madepanse girhu. Rhwahamira omu nyumpa nsungunu, rhwaguza omutuga gwirhu gw’ibeyi lyo rhugula ecikumi.” Bahiga okurhacikaja omu bibuye ngasi mango lyo barhagishumibwa okugula ebintu barhalirheganyize oku bagula. Barhondera bageza kasanzi kanji omu mukolo gw’okuganirira abandi oku Bibliya. Na kandi bacijirira abîra bakolera Yehova n’obushiru, nka ba painia bapekee. *

 Lyo bajira binji omu mukolo gwa Yehova, Madián na Marcela bahiga okuhamira omu cigamba ciguma cisungunu calimw’obulagirire bw’abahubiri. Muli oko, Madián aleka akazi kage kinja. Cikoki omukazi wali yimangire ako kazi, alahika oku arharhenga. Madián amubwira ntya: “Onakamarhe nsaranga nyinji, cikoki, ka zinakulerhere omwishingo?” Oyo mukazi alahira bulya mpu agwerhe mazibu manji arhakahashiriyusa. Madián, amubwiraga ntya: “Akantu k’obulagirire omu kalamo, arhali nsarhang’inga omuntu akamarha, cikoki kuli kuba n’akantu kakarhulerhera omwishingo gw’okunali. Amuyeresa akantu kabalerhire omwishingo ye na mukage. Rhunalonzize rhube n’omwishingo bwenene kulusha omu kugendijira kasanzi kanji omu mukolo gwa Nnâmahanga.”

 Madián na Marcela bagwerhe mwishingo munji omu kuhira omukolo gwa Yehova oku nafasi ntanzi omu kalamo kabo. Hakola hali myaka 13 bali bakola omu bigamba birimw’obulagirire bw’abahubiri by’e nord-ouest by’e Colombie. Na ntya, bakola bagwerhe omwishingo gw’okukola nka bapainia bapekee.