Virginia, aba Muhamirizi wa Yehova ananaba alwazire obulwala buhamagalwa locked-in syndrome erhi syndrome d’enfermement. Ab’ahozire enjingo. Anabone ananayumve, anazibe amasu ananagazibûle,ananadunde irhwe hisungunu. Arhankaderha arhakanahashilya. Embere alwale ntyo, aligwerhe amagala nkana ananagwerhe emisi. Cikone oku murhondêro gw’omwaka gwa 1997, ayumva malumwa manji bwenene ebugorho. Iba omuheka oku hopitali, na mw’ebyo bijingo ahola. Enyuma za migobe ibirhi ahembuka enyanya z’okumubuka bwenene, na ntyo enjingo zoshi zali zamahola bamujirira n’ecombo c’okumurhabala okuyisa. Enyuma za nsiku nsungunu, aheza obwenge boshi, ciru arhacijaga amanya kantu koshi-koshi kamuyerekire.

 Virginia ahugwîre ebyakulikire ebyo, adesire ntya: “Obwenge bwani bwacibirhondera bwagaluka bunyi-bunyi. Nashenga Yehova bwenene. Ntalisimire nfê nsige mugala wani wagwerhe myaka mwenda asigale bufuzi. Lyo ncibiba n’oburhwali, naja napima okucikengeza mandiko maguma maguma g’Ebibliya nakahashire okukengera.

 “Enyuma z’aho, bankula omu kafuhero. Enyuma za myezi ndarhu ndi naja oku mahopitali ga ngasi lubero n’oku ma santre g’okucibiyiga okubasoma, nacibigaluka emwirhu. Nieshi nahola enjingo zoshi, na ntabyo nakacicijirire niène. Oko kwamvuna omurhima bwenene! Nakaciyumva nka ntabyo nakacijirira Yehova, ciru n’abandi bantu kone. Na kandi nakaciyumva kubi bulya ntakacishibirire mugala wani.

 “Narhondera okuyiga ebi abandi Bahamirizi ba Yehova balilwazire endwala eri nk’eyani bajira, nashagaluka bwenene erhi mbona oku bajirire Yehova ebi bakanahasha. N’oko kwarhuma nakasegeza obwenge bwani oku bintu nakahasha okujira. Embere ndwale, ntagwerhe kasanzi kanji k’okujira ebintu by’ekiroho. Cikone muli gano mango nkola njira akasanzi koshi k’omulegerege, n’ensiku zoshi. Na ntyo ahali nsegeze obwenge bwani oku bintu byakamvuna omurhima, na nkabusegeza oku bwîra bwani haguma na Yehova.

 “Nacifunza okukolesa e ordinatere. Nankolese eprograme y’e ordinatere ekola kugerera irhwe lyani. Okujira ntyo kunantamye bwenene, cikone kunantabale nsome Ebibliya na kandi kunantabale okumanyisa abandi obulangalire bwani kugerera amaruba n’emesaje. Lyo nganiza abantu b’omu mulala gwani, nankolese etablo eri k’olufabe aha nyanya. Omuntu oli aha burhambi bwani anaje anyereka ngasi herufi oku yindi. Nk’akahuma oku herufi y’ebi ntalonzizi okumubwira; nanzibule amasu bwenene, n’erhi akahuma oku herufi y’ebi ndonzize okumubwira, nanzibe. Rhunakolese eyo njira ya ntyo kuhika rhuyeneze omusemwa n’enderho. Bali birhu baguma na baguma bakalugindanga bakola bahugûkwa duba-duba bici nalonza okuderha. Na kanji-kanji, erhi bakabula kuhugûkwa omusemwa nalonza okuderha, rhunasheke bwenene.

 “Nanshagaluke bwenene okujira mikolo miguma na miguma y’omu cigamba. Na nkashimba entimanano ngasi mango kugerera e enternete, na kuhika buno ndi nayishimba kugerera evidéoconférence. Nanyandike amashuzo nahâna, na muntu mulebe anabisome amango g’okudosa amadoso n’amashuzo. Na kandi nanshimbe haguma n’ecikundi cani c’amahubiri eprograme ya ngasi mwezi ya JW Télédiffusion. *

 “Hakola hali myaka 23 ndwazire obu bulwala bw’e syndrome d’enfermement. Hali amango ngaya bwenene. Cikone nancibiciyumva bwinja erhi nsalira, n’erhi ngeza akasanzi haguma na bene wirhu na bali birhu n’erhi mba n’obushiru omu bintu by’ekiroho. Kugerera oburhabale bwa bene wirhu b’omu cigamba, nkola ngwerhe myaka ndarhu ndi painiya murhabazi. Najira okwani koshi lyo nyereka mugala wani Alessandro olwiganyo lwinja. Na kuhika buno ajîre omu buhya anali mugula; ye na mukage, bali ba painiya b’akasanzi koshi.

 “Nankarhanya kw’ebi nayishihash’ijira omu paradizo. Okantu karhanzi nkacifinja okujira, kuli kuyishikakolesa izu lyani lyo nganiza Yehova. Nayishishagalukira okugera oku lwishi lw’omu lugo lyo nshagalukira obulemi. N’okubona eyi myaka 20 ndi nalamira oku mîshi g’omu sonde gone, ndi nalinguza okuyishitwa e pome erhi itûnda oku murhi na ndikanje-kanje lyoshi. Na bulya mba muburhwa w’e Italie, ndi nalinguza okuyishiyenda n’okulya ebiryo bihamagalwa pizza, bulya abataliyana babisima bwenene!

 “‘Obulangalire bw’obucire’ bwantabire mbe n’obwenge burhulirire. (1 Abatesalonika 5:8) Na nkacibona ndi omw’igulu lihyahya n’oko kunarhume naba n’omwishingo ciru ankaba ntabyo nakacihashijira, na mba nyemire oku obu bulwala bwahwa hano hofi-hofi. Ndi nalinguza okuyishihonja ‘akalamo k’okunali’ Yehova arhulaganyize ayishirhuha omu Bwami bwage.”​—1 Timoteyo 6:19; Mateyo 6:9, 10.