Akaba oli Muhamirizi wa Yehova, gurhi obwine okuhubiri nyumpa oku yindi onalusibwe n’abapolisi? Oko kwahikire Joseph omu 2017, amango ali omu kampanye kago-kago k’amahubiri oku cirhwa ciba kuli e Micronésie.

 Aha midi y’omûshi, abo Bahamirizi ba Yehova bani bahika oku hirhwa hisingunu hyaliko hofi bantu 600. Omukulu w’eco cirhwa ayisha ali bayegereza analusîbwe. Joseph aganirire ebyabire enyuma z’aho, ntya: “Omukulu aderha oku omutuga gw’abapolisi gukwanine gurhuluse oku ngasi nyumpa. Rhwasomerwa okuyumva ntyo, cikoki, rhwalahira n’obukenge boshi. Rhwalilonzize rhulambagirire abantu nyumpa oku yindi nk’oku rhunayorha rhujira.”

 Abo bahubiri barhondera balambagira banahizire okuganiza bantu banji bwenene kulusha. Abo Bahamirizi badesire ntya: “Abantu barhuyegereza banalisimire bwenene okuyumva emyanzi rhubalerhîre. Muli oko rhwayusa kasanzi kanji omu ngasi nyumpa kulusha oku rhwalirhegayize.”

 Enyuma z’olo lusiku, omutuga gw’abapolisi gwarhaluka Joseph kabirhi koshi cikoki obwa kasharhu gwayimanga. Mupolisi muguma adosa Joseph erhi amuhêke omu mutuga lyahika omu nyumpa arhalicihikamo. Joseph adesire ntya: “Nalahira. Cikoki lero muli ako kasanzi basegeza bwenene bampêke omu kuderha ntya: ‘Osigaline kasanzi kasungunu embere orhenge kwa cino cirhwa, muli oko rhwakuhêka ebwa nyumpa zisigîre.’ Ntakacihashir’ilahira bulya nacirisigaline nyumpa nyinji z’okujamo. Erhi rhukayegerera ngasi nyumpa, abo bapolisi bakambwira izino ly’omulala n’okumbwira oku erhi akaba ntaye oyishiriyigula omulango, bone bashurha e claxo lyo nna nyumpa ayishiyigula.

 “Muli ako kasanzi, rhwahikira aha rhwalambagirira enyumpa zoshi olo lusiku. Rhwalekera abantu bicapo binji n’okujira emipango y’okugalukira abantu balisimisibwe.”

 Abo abapolisi babwira Joseph oku “bashagalusire bwenene okuyaliza mwanzi mwinja mulebe.” Erhi abo Bahamirizi bagenda, izuba lyahorha, abapolisi bali oku plaje bakabalamusa banali bamwemwerhwa erhi banafumbire ebicapo by’Ebibliya omu nfune.