Lusiku luguma hâli e neje na mpusi nnene bwenene omu lugo lwa Alberta omu cihugo c’e Canada, Bob akagitembeza omutuga gwage omu kujira bilometra 100 oku nsa nguma, buzinda ipine ly’ebwa kuboko kulembe ly’omutuga gwage lyabasha. Bob arhamanyaga bici byabire, muli oko agendekera atembeza omutuga gwage, hali hasigire bilometre birhanu byone ahike aha mwage.

 Omu maruba arhumaga aha nyumpa y’Entimanano y’Abahamirizi ba Yehova y’omu eneo yage, Bob ahugûla ebyabire enyuma z’aho. Ayandika ntya: “Misole irhanu yali omu mutuga yaisha aha burhambi bw’omutuga gwani bahonya eciyo c’omutuga gwabo. Bambwira oku epine ly’omutuga gwani lyabashire. Rhwayimanza emituga yirhu oku burhambi bw’ibarabara, n’eyo misole yacihâna ly’eshanja ely’ipine lyani lyabashaga. Ciru ntalimanyire erhi ngwerhe ipine erhi cikolanwa coshi-coshi c’okusosa omutuga lyo ipine lishanjwa. Erhi ntamala oku citi cani c’ebirema aha burhambi bw’ibarabara, baja idako ly’omutuga gwani, babona ipine n’ecikolanwa c’okuyinamula omutuga, muli oko bashanja elyo ipine lyaliberesire. Hâli neje nyinji na mpusi nyinji. Bali yambirhe emishangi minja, cikoki balibabidu okujira ako kazi na ntyo bantabala mpike emunda nal’inyerekire. Ntakahashire najira ako kazi niene.

 “Nvuzire abo Bahamirizi ba Yehova barhanu omunkwa okubona bantabire. Bakagijihubiri abantu b’eyo eneo. Okuderha okuli, eyo misole elamire ebi ekayigiriza. Bantabire omu kanga kazibu bwenene kakampezîze kasanzi kanji, nvuzire omunkwa kuli oko. Okuderha okuli, eyo misole ko yanali nka malahika Nnâmahanga antumire olo lusiku.”