Muhamirizi muguma wa Yehova ohamagalwa Danielle, olama omu Afrique du Sud, abona esakoshi y’omukiliya wabo analekaga omu cafétéria. Mw’eyo sakoshi mwali ehindi hisakoshi hisungu hyalimw’ensaranga n’amakarte g’ebanke. Danielle ahiga okugalulira oyo mulume esakoshi yage, byahûna amulongereze bwenene, alonza amanye ah’alama, alonza e nimero yage y’etelefone, cikoki, arhabonaga e adresse erhi nimero y’etelefone; kantu kaguma kone amanyire kuli ye lyali izino lyage. Alonza ciru okubona kugerera ebanke abikamw’ensaranga zage, cikone wapi, arhamubonaga. Buzinda, ayishibona resi nguma y’emwa munganga yali kw’e nimero y’etelefone, Danielle ahamagala, cikoki omwandishi erhi sekretere w’e hopitali oyo mulume abukisibwamwo ye wamushuzize n’oyo sekretere ye wahire Danielle e nimero y’oyo mulume.

 Oyo mulume asomerwa bwenene okubona sekretere w’e hopitali ye mubwizire oku Danielle abwine e sakoshi yage n’oku alonzinze amuhe yo. Erhi ayishirhola eyo sakoshi yage, Danielle n’ishe bo bamuyegerezize. Muli ako kasanzi babona obulyo bukumuhugûlira bulya gurhi bajijire okwabo koshi lyo bamulonza. Bamuhugûlira oku bali Bahamirizi ba Yehova bananacihangane okulama nk’oku amakanuni g’Ebibliya ganadesire. N’eco co carhumire banajire okwabo koshi lyo babà bikubagirwa omu ngasi kantu.​—Abahabraniya 13:18.

 Nsa nsungunu enyuma z’aho, oyo mulume arhumira Danielle n’ishe e mesaje y’okubavuga omunkwa okubona bamugalulire esakoshi yago na ngasi kantu kalimo. Ayandika ntya: “Nvuzire omunkwa okubona mwajijire okwinyu koshi lyo munonza. Nashagalusire bwenene okummubugana na ntya ntakayibagira okumwanyegerezagya n’omwishingo n’obwîra. Nonzize muhe oluhembo lw’okummuvuga omunkwa. Manyire oku muli mwajira okwinyu koshi lyo muhikiriza ebi Nnamahanga amuhunyire mujire. Ebijiro bya Danielle biyerekine muli bantu baci: Bikubagirwa na bakulangalirwa, nshubirimmuvuga omunkwa, na Nnamahanga agishe omukolo gwinyu gw’amahubiri.”

 Enyuma za myenzi ndarhu, ishe wa Danielle ashubiganira haguma n’oyo mulume, oyo mulume amubwira oku erhi naye aba ali alambagira, abona e porte-monnaie okw’idaho. Mpu erhi abona n’eyo porte-monnaie n’okumuha yo, amuhugûlira ecarhumaga ajira ntyo, amubwira ntya: Omu nsiku zigezire muntu muguma anjirire ecijiro c’obwikubagirwa ciri nk’eci. Aderha ntya: “Ecijiro cisungunu c’obwikubagirwa cinalerhe ecindi, n’oko ko kurhabala akalamo kirhu rhweshi kabe kinja.”