Muhamirizi muguma wa Yehova olama e Guatémala, ohamagalwa Marta, akayiga olulimi luhamagalwa Kekchi lyo aba n’obulyo b’okuganirira abaderha olo lulimi emwanzi eri omu Bibliya. Lusiku luguma alangira mulume muguma warhenga oku hopitali. Erhi abona oku ayambirhe ahugûkwa ho n’aho oku oyo mulume ashushire abantu balama omu eneo y’oku ntôndo ya mw’eco cihugo, n’Abahamirizi ba Yehova barhalugija eyo munda. Amuyegera na buzinda amuganiza omu kukolesa nderho nguma na nguma ali amaciyigiriza z’omu lulimi lw’eci Kekchi.

 Marta arhondeza ifunzo ly’Ebibliya haguma n’oyo mulume. Oyo mulume ayemera n’obushagaluke, cikone amubwirha oku arhagwerhi nsaranga alipira el’ifunzo. Marta amuhugûlira oku Abahamirizi ba Yehova barhahûna kantu koshi-koshi mpu lyo bayigiriza omuntu Ebibliya. Amubwira oku akacifunza kugerera e telefone n’oku omulala gwage nago gwanalishimba. Oyo mulume ayemera. Bulya alimanyirisoma eci Espagnol, Marta amuha e Biblia​—Tafsiri ya Ulimwengu Mpya y’omu ci Espagnol. Na kandi amuha ecitabu Bici Ebibliya erhuyigiriza? c’omu lulimi lw’eci Kekchi. Omugobe gwakulikiraga, oyo mulume, mukage, n’abana babo babirhi barhondera bayiga Ebibliya na Marta kugerera etelefone. Bakayiga Ebibliya kabirhi omu mugobe. Marta ahugwîre ntya: “Bulya ntalimanyiriderha eci Kekchi, rhwagayiga haguma nabo omu ci Espagnol, n’oyo mulume akahugûlira mukage omu ci Kekchi. Abana bohe bakagiyumva eci Espagnol.”

 Oyo mulume ali pastere omu kanisa kage. Arhondera okuyigiriza abemezi b’omu kanisa kage ebi ali ayiga. Abemezi b’omu kanisa kage bashagalukira ebi akagibayigiriza bamudosa ngahi ali akula ebyo ali abayigiriza. Erhi ababwira oku ali ayiga Ebibliya, boshi nabo bakakulikira er’ifunzo. Ho n’aho bantu 15 barhondera okuyiga Ebibliya kugerera etelefone haguma na Marta ngasi mugobe. Lyo boshi bajabayumva, bahira emikro aha burhambi bw’etelefone.

 Erhi Marta abwira abagula lugenda eco cigamba cage c’ifunzo ly’Ebibliya, mugula muguma aja omu lugo abo banafunzi b’Ebibliya balilamire. Abayegereza oku bayishe bayumvirhize ehotuba y’abantu boshi yayishijirwa na mwangalizi w’omuzunguko * omu lundi lugo lw’eyo mwabo. Ly’omuntu ahika eyo munda byalihûnyire okujira nsa nguma ali omu mutuga, na buzinda acibijira ns’ibirhi ali alambagira n’amagulu. Abo banafunzi bayemera oku bayisha bayumvirhize eyo hotuba, banayishiyisha, boshi haguma bahikira 17.

 Migobe misungunu enyuma z’aho, mwangalizi w’omuzunguko n’abandi Bahamirizi ba Yehova baja eyo munda bajira nsiku ini haguma n’abo banafunzi. Ngasi sezi bakagilola evideo y’omu lulimi lw’eci Kekchi eri oku jw.org n’okuyiga ebroshua Bandi bali bajira obulonza bwa Yehova ene? Ngasi nyuma z’emidi bakagilola eprograme ya JW Télédiffusion. Mwangalizi w’omuzunguko apanga oku bihûnyire ngasi mwanafunzi abe n’owage mwalimu.

 Omu kasanzi k’ezo nsiku ini, abo Bahamirizi bakayigiriza omu lundi lugo lwali eyo munda lwakagiderha eci Kekchi banakayegereza abantu oku ntimanano yago-yago. Omu kasanzi k’eyo ntimanano, bene wirhu babwira bantu 47 bali oku ntimanano oku kuli kwa bulagirire ngasi muntu abe n’elyage ifunzo ly’Ebibliya. Milala 11 yayemera okujira ntyo.

 Enyuma za myezi misungunu, abagula barhôla emipago y’okugendikajira entimanano ngasi okubuzinda b’omugobe aha m’oyo mulume wali murhanzi okuyiga Ebibliya. Kuhika buno bantu hofi 40 bali baja oku ntimanano ngasi mango. N’erhi bene wirhu bajirira olusiku l’Okukengera olufû lwa Yezu mw’olo lugo, bayegereza n’obushagaluke bantu 91.

 Marta erhi akakengera gurhi ebintu byarhonderaga na ngahi byahika, anaderhe ntya: “Nvuzire Yehova omunkwa. Hali amango ntanya oku ntabyo nakahashijira. Cikone rhuli bikolanwa biri omu maboko ga Nnâmahanga. Alimanyire ebyali omu murhima g’wabo bantu bamw’olo lugo, abakulula baje omu lubaga lwage. Yehova aba abazigire.”