Isala lya Mukazi Muguma Muhurha Lyashuzibwa
Yanmei aba Muhamirizi wa Yehova oba olamire e Asie. Lusiku luguma abwira Mingjie, * oku amurhabale okuyikira ibarabara. Mingjie amushuza erhi: “Koko bwenene. Nnâmahanga akugishe!” Erhi Yanmei ayumva ezo nderho, adosa oyo mukazi erhi anasima lusiku luguma ayishe baganire naye lugenda Ebibliya. Buzinda bw’aho, Mingjie abwira mwali wirhu oku elyo lir’ishuzo oku masala gage. Mingjie adesire oku ngasi lusiku, anakahûna Nnâmahanga amulongoze abone idîni linja. Cikoki, bulya gurhi akagijira er’isala?
^ Mingjie ahugwire oku omu mwaka gwa 2008, mwîra wage muguma amulalika oku bajiyumva oku nyigirizo z’idîni liguma lirhabala ebirema. Enyuma z’enyigirizo agend’idosa mupe citabu cihi anakagisomamwo. Erhi amubwira oku mwali omu Kanwa ka Nnâmahanga Bibliya, ho n’aho Mingjie ayumva irala ly’okusoma Ebibliya. Ahikara aha aba n’Ebibliya y’Emihurha y’omu lulimi lw’Ecishinwa, na ntyo, ahikira aha asoma bitabu 32 omu myezi 6. Omu busomi bwage bw’Ebibliya, Mingjie ahugûkwa bwinja oku enyigirizo z’obusharhu butagatifu, zirhali nyigirizo za Bibliya, ananahikira ah’ahugûkwa okw’izino lya Nnâmahanga ye Yehova.
Cikoki kandi, abantu bw’omw’idîni lya Mingjie bamuvuna omurhima. Ayishibandana oku barhakolesa ebiba omu Bibliya omu kalomo kabo. Kwa lwiganyo, bakagiha ebiryo biyende olo lusiku lo n’olo oku bantu bali babona, cikoki ebyalalaga byo bakagiha emihurha. Obo bubule bw’obushinganyanya bwamugayisa bwenene, kuhika arhonderha alonza erind’idîni. N’oko ko kwamushumyagya asalire Nnâmahanga ly’amurhabala amuyerese idîni ly’okuli.
Okubona ecijiro cinja ca Yanmei camuhumireko bwenene, Mingjie ayemera oku oyo mwali wirhu amuyigirize Ebibliya. Buzinda ayishiyisha oku ntimanano z’Abahamirizi ba Yehova. Mingjie adesire ntya: “Ntakayibagira eyo ntimanano ntanzi najagako. Bene wirhu na bali birhu bakayishindamusa n’obushagaluke bunji. Oko kwampumako. Ciru akaba ndi muhurha, cikoki nakaciyumviza niene oku nta kabôlo, ngasi muntu asimire ngashi yeshi.”
Mingjie agendekire aciyigiriza binji lugenda Yehova ananagendekire acihangana okuja oku ntimanano ngasi mango. Bwenene asima okuimba enyimbo oku ntimanano ciru akaba kurhali kulembu kuli ye bulya ecitabu c’enyimbo omu lulimi lw’emihurha cirhali cihaba omu lulimi lwage. Cikoki ciru akaba ntyo, ecigamba camurhabala ly’ayandika ecage citabu c’enyimbo yenene. Ajijire nsa 22 ly’ayandika omu lulimi lw’emihurha nyimbo 151! Omu mwezi gwa 4, 2018, Mingjie aba muhubiri, ananarhondera ageza nsa 30 ngasi mwezi omu mahubiri.
Okuyandika ecitabu c’emihurha guba mukolo muzibu
Lyo Yanmei arhabala Mingjie acirheganye bwinja oku madoso gw’obubatizo, a arejistre ecigabi c’ah’amadoso n’amashuzo g’amandiko g’Ebibliya gaba omu citabu Tengenezo Lenye Kufanya Mapenzi ya Yehova. Omu mwezi gwa 7, 2018, Mingjie abatizibwa. Adesire ntya: “Nashagalukire bwenene obuzigire bene wirhu na bali birhu banyeresire kw’eyo ntimanano nabatizibagwako. Nalaka bwenene erhi bushagaluke bw’okubona nkola ndi omw’idîni ly’okuli burhuma.” (Yowane 13:34, 35) Mingjie akola aba muhubiri w’akasanzi koshi bulya abwine obuzigire ayeresirwe, naye ahiga okuhâ abandi kw’ebi ashobwire.
Mazino maguma na maguma gashanjire.