Irma, olama omu cihugo c’e Alemagne, akola agwerhe myaka hofi 90. Amakajira e axida ndarhi kabirhi-kabirhi n’okuberwa kabirhi koshi, muli oko, arhakacihashihubiri nyumpa oku yindi nk’oku byali embere. Kuhika buno, Irma akola ahubiri omu kayandikira abantu b’omulala gwagwe n’abandi bantu amanyire amaruba. Abantu banashagalukire amaruba Irma abayandikira ly’abaha omurhima n’okurhuliriza abafîrirwe, na muli oko, agandi mango banamudose mangaci acibibarhumira agandi maruba. Na kandi anarhumirwe maruba manji abantu bayandisire lyo bamuvuga omunkwa n’okumubwira ashubibarhumira agandi. Irma adesire ntya: “Ebyo byoshi binanderhere omwishingo n’okumpa emisi y’okugendekera okuhubiri.”

 Kandi Irma anayandikire abakola bashosi balama omu nyumpa z’okushibirira abashosi. Adesire ntya: “Mukazi muguma okola mugikulu ampamagala ambwira oku amaruba gani gamurhulirize bwenene erhi iba afâ. Abisîre ago maruba omu Bibliya yage ananajira enkomedu y’okugasoma ngasi bijingo. Owundi mukazi iba azindifâ ahala hofi-hofi adesire oku amaruba gani gamurhabire kulusha ehotuba ya padiri. Agwêrhe madoso manji kuhika andosa erhi nanasima andambagirire.”

 Muntu muguma Irma amanyirire, arhali Muhamirizi, ali erhi ahamîre kuli bwenene, ahûna Irma amurhumire amaruba. Irma adesire ntya: “Oyo mukazi abisîre amaruba gani goshi. Erhi afâ, mwali wage ampamagala oku telefone. Ambwira oku anasomire amaruba goshi nayandikiraga nnina, anadosa erhi naye nanamurhumira amaruba gaganirire emyanzi y’Ebibliya.”

 Bwenene Irma ashagalukira omukolo gw’amahubiri. Adesire ntya: “Nanshenge Yehova agendekere ampa emisi y’okumukolera. Ciru akaba ntakacihashihubiri nyumpa oku yindi, nanjire oku nakanahasha.”