Ong-Li ali Muhamirizi w’omu cihugu c’e Bulgarie. Arhabire omukazi ociri musole ohamagalwa Zlatka okucifunza Ebibliya, cikone nta lusiku iba ajîre kw’er’ifunzo. Ong-Li adesire ntya: “Erhi rhuganirira ebiyerekire omulala, nasegeza obulagirire bw’okubwira abalume birhu n’abana birhu oku rhubazigire. Zlatka agaya okuyumva ntyo, aderha oku nta mango azigibwira iba erhi omwali wa myaka 9 oku abasimire!”

 Zlatka ahugwîre ntya: “Nyemire oku nanabajirira ngasi kantu, cikoki, ntakababwira ezo nderho.” Kandi ayushûla ntya: “Nta mango nyama ambwizire oku ansimire, na nta mango mugâka abwizire nyama oku amusimire.” Muli oko Ong-Li ayereka Zlatka oku Yehova abwizize Yezu oku amuzigire, n’oku izu amubwiragamo ntyo lyayumvikine n’abantu. (Mateyo 3:17) Buzinda amuha omurhima ashenge Yehova lugenda ako kanga n’okucihiriraho omuhigo gw’okubwira iba n’omwali oku abazigire.

 Ong-Li adesire ntya: “Nsiku ibirhi enyuma z’aho, Zlatka ampamagala anashagalusire bwenene, ambwira oku anasalisire Yehova amurhabale. Erhi iba agaluka, amubwira oku omu kuyiga Ebibliya anaciyigirizize oku kuli kwa bulagirire omukazi akabwira iba oku amusimire anamukenzire. N’enyuma z’okuba nk’ahulika hitya, amubwira oku anasimire bwenene. N’oku enyuma z’omwali okugaluka, Zlatka amuhobera n’okumubwira oku amusimire bwenene! Zlatka adesire ntya: ‘Nciyumvirhe bwinja! Mw’eyi myaka yoshi, ntakahashire okuderha oku ndi naciyumva, cikoki kuhika buno, kugerera oburhabale bwa Yehova, nahikîre aha nabwira omulala gwani oku ngusimire.’

 Mugobe muguma enyuma z’aho, Ong-Li ayushwire oku abugana iba wa Zlatka, amubwira ntya: ‘Bantu banji bambwira oku mukanie arhalishinganine okuyiga Ebibliya na ninyu. Cikoki bibonekine bwinja oku okujira ntyo kwalerhire omulala gwani obunguke. Rhukola rhuba rhuyegerine rhunagwerhe omwishingo.’”