Lusiku luguma, erhi Eliso, Muhamirizi wa Yehova aba ali acifunza Ebibliya na mukazi muguma walisimisibwe, oyo mukazi apata ebigolo arhalicirheganyizeko. Ali mukulu muguma w’idîni na mukage, na Eliso ayumva oku omwana wabo muguma yene acizindigifâ.

 Erhi Eliso ababwira oku olufû lw’omwana wabo lwamugayisize bwenene, oyo mukulu w’idîni na mukage barhondera balaka bwenene. Buzinda oyo mukulu w’idîni aderha ntya n’oburhe: “Ntamanyiri bulya gurhi Nnâmahanga ayemire elyo irhangulo limpikire! Bulya gurhi ayemire omwana wani muguma afê? Namakakolera Nnâmahanga myaka 28, nancihangane okujira ebintu binja, lolaga amalipo ampire! Bulya gurhi Nnâmahanga anizire mugala wani?”

 Eliso abahugûlira oku arhali Nnâmahanga ye wanizire omwana wabo. Buzinda aganirira engombôlo ya Yezu Kristu, obufûke n’ebirhuma Nnâmahanga aleka ebintu bibi birhuhikire. Oyo mukulu w’idîni na mukage babwira Eliso oku amabashuza oku madoso bakagishenga Nnâmahanga.

 Omugobe gwakulikiraga, oyo mukulu w’idîni na mukage bagaluka emw’olya mukazi bulya balisimire baje bayumvirhiza amango Eliso ali amuyigiriza Ebibliya. Eliso n’oyo mukazi bakagicifunza ecigabi cidesire: “Tumaini la Kweli juu ya Watu Tuliowapenda aliokufa,” omu citabu Biblia Inafundisha Kabisa Nini? Oyo mukulu w’idîni na mukage bashangira kw’ezo nganîro.

 Buzinda bombi baja oku ntimanano yago-yago y’Abahamirizi ba Yahova yajiragwa e Tbilisi, omu Géorgie, banahâbwa omurhima bwenene okubona oku Abahamirizi Ba Yehova bazigirana n’okulama omu cinyabuguma cisezire bwenene. Bajijire kasanzi kanji lyo barhabala abantu b’omw’idîni lyabo babe n’ago morhere, cikone byayabirana.