Abahamirizi ba Yehova banakolese mpindulo nyinji z’Ebibliya omw’ifunzo lyabo ly’Ebibliya. Cikoki, bwenene bashagalukira okukolesa e Tafsiri ya Ulimwengu Mupya erhi akaba eri omu lulimi lwabo bulya enakolese izino lya Nnâmahanga, eba y’okuli enaba ndembu okuhugûkwa.

•   Okukolesa izino lya Nnâmahanga. Bandisi baguma baguma b’Ebibliya, barhakengesagya owayitungaga. Kwa lwiganyo, empindulo y’Ebibliya eganirire mazino 70 g’abantu bakolesisbagwa okuyandika Ebibliya. Akantu gw’okugayisa kuli kubona oku Bibliya nguma nguma zayibagire izino ly’owayiyandikisagya, Yehova Nnâmahanga!

   E Tafsiri ya Ulimwengu Mupya yagalwire izino lya Nnâmahanga ngasi hoshi lyanali omu mandishi ga mîra. Abantu bâli omu komite ya hindulaga eyo Bibliya, barhaderhaga amazino gabo.

•   Eba y’Okuli. Empindûlo zoshi zirhahâna emyanzi y’Ebibliya nk’oku yanali oku murhondero. Mpindûlo nguma y’Ebibliya yahindwire ezi nderho za Yezu ziri omu Mateyo 16:24, ntya: “Owalonzi nshimba acilahire yenene, abarhule omusalaba gwage, anshimbe.” Myaka minji embere Kristu ayishe hanw’igulu, abapagani bakagikolesa omusalaba nka cimanyiso c’idîni omu nterekêro yabo. Omu karne ka 3 Mwakano Kasanzi Kirhu (K.K.K.), amadîni garhondera gakolesa eco cimanyiso mpu go musalaba gwa Yezu Kristu. Byanahashikana abo bahinduzi bakolesize oluderho “musalaba” bulya baliyemire oku Yezu afâga oku musalaba. Ciru akaba ntyo, oluderho lukolesibwe omu mandishi ga mîra luli luderho “murhi” ci arhali “musalaba.” Eco co cirhumire lugenda olo lwandiko, e Tafsiri ya Ulimwengu Mupya edesire ntya: “Owalonzi nshimba acilahire yenene anabarhule omurhi gwani gw’amalibuko n’okunshimba ensiku zoshi.”

•   Enaba ndembu okuhugûkwa. Empidûlo nyinja enshinganine okuba ndembu okuhugûkwa. Orhanye kw’olu lwiganyo luguma. Omu lwandiko lwa Mateyo 5:3, Yezu aderha ezi nderho “Iragi lyabo abakenyi omu murhima.” Okubona ezo nderho zirhagwerhi mana goshi-goshi omu Cingereza ca buno, e Tafsiri ya Ulimwengu Mupya ekolesize endero ndembu okuhugûkwa muli ogo mulongo. Muli ogo mulongo eyo mpindulo edesire ntya: “Ab’obushagaluke bo balya babà bayemire oku bakenîrwe n’ebintu by’ekiroho.”

 Okubona oku ekolesize izino lya Nnâmahanga, eba y’okuli enaba ndembu okuhugûkwa, e Tafsiri ya Ulimwengu Mupya eba lubero bwenene n’ezindi mpindulo z’Ebibliya: Wanaba nayo buzira kuhâna ensaranga. Na kugerera obo bulyo emiliyoni y’abantu banahasha basoma Ebibliya omu ndimi zabo, ciru na balya barhagwerhi buhashe bakagulamo Ebibliya.