Nanga, arhali ntyo kobiri. Lubero n’oko, erhi rhwakabona oku obuyemere bwirhu buli lubero n’ebi Ebibliya edesire, rhunabukubûle.

 Myaka Minji embere rhurhondere okucapisa Ebibliya Tafsiri ya Ulimwengu Mupya omu mwaka gwa 1950, rhwarhangikakolesa ezindi mpindulo zahali kurhenga mîra. Oomu ntyo, obuyemere bwirhu bwali buyimangire kw’ezo mpindulo. Alaga buyemere buguma buguma Abahamirizi ba Yehova bajira kurhangira mîra, onacilolere wene erhi buba bupatine n’ebi Ebibliya eyigiriza.

1.   Ebi rhuba rhuyemire: Nnâmahanga arhaba busharhu. Rhusomire ntya omu Phare de la Tour de Sion y’omu mwezi gwa 7, 1982, yalidesire ntya: “Abasoma ebitabu birhu babà bamanyire oku, ciru akaba rhuba rhuyemire Yehova na Yezu, n’iroho litagatifu, rhurhabarhuyemiri enyigirizo ziba zidesire oku haba ba Nnâmahanga basharhu muli muntu muguma, erhi na nk’oku abandi bantu baderha, Nnâmahanga muguma omu bantu basharhu bulya ezo zirhaba nyigirizo za Bibliya.”

     Bici Ebibliya edesire: “Nyamuzinda Nnâmahanga wirhu, aba Nyamuzinda muguma yene.” (Olushika 6:4, Mashi Bible) “kwone kuli rhwe rhwene hali Nyamuzinda muguma yene, ye Larha, ye na cisisi c’ebintu byoshi, ye mwanalemeragwa, na Nyakasane muguma yene, ye Yezu Kristu, orhuma byoshi bihabâ, onarhuma rhuhabâ.” (1 Abakorinti 8:6, Verbum Bible) Yezu yene adarha erhi: “Larha ye mukulu kundusha.”​—Mashi Bible.

2.   Ebi rhuba rhuyemire: Harhaba engulumira y’omuliro gw’ensiku n’ango. Omu kulonza okugalukira olwandiko lwa Abaroma 6:23 omu King James Version, egazeti Zion’s y’omu mwezi gwa Ndarhu 1882 yaligwerhe ecirhwe calidesire ntya: “Omushahara gw’Ecaha luli Lufu,” lyanalidesire ntya: “Ezo nderho ziyumvikine bwinja zinali ndebu okuhugûkwa. Bisomerine okubona abanji baderha mpu bayemire oku Ebibliya kaba Kanwa ka Nnâmahanga bagendekire bapinga ezi nderho z’okuli omu kuderha mpu; Ebibliya eyigirizize oku omushahara gw’ecaha buli buzine bw’ensiku n’amango omu malibuko.”

     Bici Ebibliya edesire: “Owajijire ecaha ye wankanafa.” (Ezekiyeli 18:4, 20, King James Version) Obuhane Nnâmahanga ayishiha balya boshi bamupinga kurhakaba kulibuzibwa ensiku n’amango, cikoki buhane “bw’okukagwa n’okuhererekera ensiku n’amango.”​—2 Abatesalonika 1:9, Mashi Bible.

3.   Ebi rhuba rhuyemire: Obwami bwa Nnâmahanga buba burhegesi erhi guvernema y’okunali ci erhali hali y’omurhima. Egazeti Zion’s y’omu mwezi gwa 12, 1881 yalidesire ntya: “Embere obo Bwami burhangire bwarhambula, bwanashereze amami goshi g’igulu.”

     Bici Ebibliya edesire: “Omu nsiku z’abola bami Nyamuzinda w’empingu, ayishiyimanza obundi Bwami bulya burhakacishabwa ciru n’eriguma na oburhegesi bwabo burhakacihâbwa oku lundi lubaga. Bwavunyungula bunashandaze agola gandi mami, nabo bône bwayorha ensiku n’amango.”​—Daniyeli 2:44, Verbum Bible.

 Nanga, bulya erhi rhuba rhuli rhwahubiri abantu rhunakolese ezindi mpindulo z’Ebibliya. Kandi, ciru akaba rhunahe abantu Ebibliya Tafsiri ya Ulimwengu Mupya, buzira kubahuna ensaranga lyo rhuhikiriza omukolo gwirhu gw’okuyigiriza abantu Ebibliya busha, rhunashagalukire okuyigiriza na balya bagwerhe ezindi mpindulo z’Ebibliya.