Embaraza Eri Yalongoza ciba cigusho cisungunu c’Abakristu bakuzire kiroho balongoza Abahamirizi ba Yehova b’omw’igulu lyoshi. Omukolo gwabo gujira bigabi bibirhi:

•   Banayimangire omukolo gw’okurheganya enyigirizo ziyimangire oku Bibliya Abahamirizi ba Yehova bahâbwa kugerera ebicapo, entimanano, n’amasomo gabo gali lubero.​—Luka 12:42.

•   Banalongoze omukolo gw’Abahamirizi ba Yehova gw’okuhubiri omw’igulu lyoshi na kandi banalongoze gurhi oburhabale buhânwa bwakolesibwa.

 Embaraza Eri Yalongoza enakulikire olwiganyo lw’“entumwa n’abagula” bali e Yeruzalemu omu myaka igana mirhanzi, bakag’irhôla emihigo y’obulagirire oku bunguke bw’ecigamba c’Ecikristru. (Ebijiro by’Entumwa 15:2) Embaraza Eri Yalongoza enayige olwiganyo lw’abo balume bishwekerezi. Entumwa n’abagula barhali birongozi by’ecigamba c’Ecikristu. Ko n’oko bene wirhu b’omu Mbaraza Eri Yalongoza barhaba birongozi birhu erhi barhambo birhu. Banakulikire obulongozi buli omu Bibliya bananaba bayemire n’obwalagale oku Yehova Mungu ahizireho Yezu ly’aba Irhwe ly’ecigamba.​—1 Abakorinti 11:3; Abefezi 5:23.

 Embaraza Eri Yalongoza ejijirwe na Kenneth Cook, Jr., Gage Fleegle, Samuel Herd, Geoffrey Jackson, Jody Jedele, Stephen Lett, Gerrit Lösch, Jacob Rumph, Mark Sanderson, David Splane, na Jeffrey Winder. Banakolere oku biro birhu bikulu biba e Warwick, omu New York, e États-Unis.

 Embaraza Eri Yalongoza yahizireho komite ndarhu ziba ziyimangire bigabi mberuluka by’omukolo gwirhu. Na ngasi mwene wirhu w’omu Mbaraza Eri Yalongoza anakolere omu komite nguma erhi kulusha.

•   Ekomite y’Abaratibu: Eba eyimangire ebiyerekire eby’amarhegeko, enanarhabale omu mango g’obuhanya, amango Abahamirizi ba Yehova balibalibuzibwa enyanya z’obuyemere bwabo, n’omu gandi mazibu gahûnyire okulwisibwa duba-duba gahumire oku Bahamirizi ba Yehova.

•   Ekomite y’Abanyakazi: Eba eyimangire emipango eyerekire ba Betelite b’omw’igulu lyoshi.

•   Ekomite y’Okutangaza: Enalongoze omukolo g’okujira ebicipo biyimangire oku Bibliya n’okubirhumira ebigamba, enanalongoze omukolo gw’obubasi bw’ahantu rhujirira entimanano, obubasi bw’ebiro by’okuhinduliramo ebicapo birhu omu zindi ndimi, n’enyumpa z’etawi.

•   Ekomite y’Omukolo: Eba eyimangire omukolo gwirhu gw’okuhubiri ‘omwanzi mwinja gw’Obwami.’​—Mateyo 24:14.

•   Ekomite y’Okuyigiriza: Enalongoze omukolo g’okurheganya ebiryo by’ekiroho bihânwa kugerera entimanano, amasomo, n’eprograme z’e audio n’evideo.

•   Ekomite y’Obwandisi: Enalongoze okurheganyizibwa kw’ebiryo by’ekiroho bihânwa nka bitabu bicape, n’ebindi bicapo biba oku site yirhu y’e enternete, enanaba eyimangire omukolo gw’okuhindula ebicapo birhu omu zindi ndimi.

 Aha nyuma n’emikolo Embaraza Eri Yalongoza ejira kugerera ezo komite, ngasi mugobe bene wirhu b’omu Mbaraza Eri Yalongoza banarhimanane lyo baganirira amalagirire g’ikubuliro. Mw’ezo ntimanano, abo bene wirhu banaganirire ebi Amandiko gadesire bananaleke iroho litagatifu lya Nnâmahanga libalongoze lyo boshi barhôla muhigo muguma.​—Ebijiro by’Entumwa 15:25.

 Baba bakristu bikubagirwa barhabala Embaraza Eri Yalongoza omu komite mberuluka. (1 Abakorinti 4:2) Bajira obulenga na bumanye bunji omu mikolo ekomite yabo ekaba eyimangire, bananajire entimanano z’ekomite ngasi mugobe. Ciru akaba barharhôla emihigo, abarhabazi b’Embaraza Eri Yalongoza banahâne amahano n’emyanzi y’obulagirire. Na kandi banakolese emihigo yarhozirwe n’Embaraza Eri Yalongoza n’okushimbulira gurhi eri yakolesibwa n’amalehe yalesire. Na kandi Embaraza Eri Yalongoza yanabaha omukolo gw’okulambagirira bene wirhu na bali birhu omu maeneo gali lubero g’igulu erhi kubaha omukolo gw’okugeza ebigabi oku ntimanano za ngasi mwaka erhi amango g’okuhâna ediplome oku masomo g’e Gileyadi.