Rhurhayaka Abahamirizi ba Yehova barhacijira omukolo gw’amahubiri ciru n’abahikire aha bacitenga n’ecigamba. Cikone rhunajire okwirhu koshi lyo rhubarhabala bacib’ishagalukira ebintu by’ekiroho.

 Rhurhatenga ho n’aho muntu mulebe wajijire ecaha cizibu. Cikone erhi Omuhamirizi wa Yehova mubatize akaba n’enkomedu y’okukavuna amakanuni g’Ebibliya, arhanalonzizi okuciyunjuza, anakalihirwa erhi ciru anahikira aha atengwa. Ebibliya edesire ntya n’obwalagale: “Omubi mumurhenze ekarhî kinyu.”​—1 Abakorinti 5:13.

 Gurhi byakaba erhi omulume akatengwa n’ecigamba cikone mukage n’abana bage baciri Bahamirizi ba Yehova? Anabêra irhwe ly’omulala, cikone arhakacikashangira haguma nabo ebintu by’ekiroho. Anagendekera ashibirira mukage, abana bage n’okuhikiriza amalagirire gabo.

 Abatenzirwe n’ecigamba, bayemerirwe okuja oku ntimanano zirhu. Nka balonzize, banahabwa amahano g’ekiroho kurhenga emw’abagula b’ecigamba. Omuhigo gw’abagula kuba kurhabala ngasi yeshi watenzirwe acib’ihikiriza ebihunyirwe ly’acib’iba Muhamirizi wa Yehova. Erhi omuntu watenzirwe akaleka olugenzi lwage lubi, akanayerekana oku alonzize okulama kushimbana n’amakanuni g’Ebibliya, anacib’iyegerezibwa omu cigamba n’okucib’iba muguma w’omu Bahamirizi ba Yehova.