Ciru akaba obulwala bw’okuyahukira coronavirus (COVID-19) bugendekire bwahagalika omukolo gw’emiliyoni y’Abahamirizi ba Yehova n’okubona bagendekire bacihangana okurhumikira amarhegeko g’abakulu b’ecihugo okubiyerekire okurhaciyegererana, bagendekire bajira enterekêro yabo. Omu bihugo eyi ndwala yasamiremwo bwenene, bene wirhu bali bakolesa abundi bulenga lyo bagendekera bahuburi.

Mwene wirhu muguma olama omu Pise, e Italie, aderha ntya: “Rhuli rhajira amahubiri bwinja bwenene! Bulya bantu banji barhaciribarhenga ahamwababwe, nie na mukanie rhwalola amazino g’abantu rhugwerhe omu telefone zirhu na ntyo rhwarhondeza obulenga bw’e vidéo conférence lyo rhukabaganiza. Rhugwerhe mafunzo manji g’Ebibliya rhunali rhwagalukira bantu banji (ago mafunzo galimo abantu rhwalimanyire embere n’abarhurhalimanyire), oko kuli kwarhuhashisa rhujire nsa nyinji omu mahubiri n’okuba n’enganiro nyinja haguma n’abantu.”

Omu cihugo c’e Corée du Sud, obulwala b’ecorona bwarhumire abahubiri bakolesa bwenene jw.org na JW Library. Kwa lwiganyo, mwene wirhu muguma asomerwa bwenene okubona emesaje ya mwanafunzi wage w’Ebibliya wa mira, halikola hamagera myaka 3 alekire okuciyiga Ebibliya. Abwira mwene wirhu oku eyi ndwala y’okuyahukira egezire omw’igulu lyoshi yarhumire arhanye bwenene oku bimanyiso by’ensiku nzinda. Mwene wirhu akolesa e option “partager le lien” ya JW Library ly’amurhumira emyanzi yakamurhabala ahugûkwe bwinja oko. Ahugwire oku “okubona ebimanyiso by’ensiku nzinda biri byabonekana bwinja oko kuli kwarhabala bantu banji balonze okumanya binji kuli Nnamahanga n’Ebibliya.”

Eraporo kurhenga omu tawi omw’igulu lyoshi ziyerekine oku bwenene bene wirhu bali bashibirira omukolo gw’amahubiri. Kushagalwire bwenene okubona bali bakolesa “obwenge bw’okunali” lyo bagendekera bayaliza omwanzi mwinja.​—Mikeyo 6:9.