Kurhangira omu lusiku 1/4/2022, Abahamirizi ba Yehova bacib’irhondera entimanano za busu oku busu. Oboba bene wirhu na bali birhu bakag’iyumva bwahinduka masheka, mirenge y’omwishingo n’obushagaluke bw’okuyimba enyimbo z’Obwami.

Kuli bantu baguma na baguma, bo bwali burhanzi bahika aha Nyumpa y’Entimanano.

Mwene wirhu Krzysztof Hoszowski w’e Pologne adesire ntya: “Bo bwali burhanzi naja oku ntimanano za busu oku busu aha Nyumpa y’Entimanano. Nayigaga Ebibliya kugerera e Vidéoconférence, n’abandi bakolesize zoom lyo babona gurhi nabatizibwa. Nal’imanyire gurhi entimanano za busu oku busu zijirwa bulya nakag’ilola kanji-kanji evideo ziganirire ezo ntimanano. Obuzigire, omwishingo, n’obwinja bwa bene wirhu na bali birhu byanshagalusa bwenene.”

Erhi obulwala bw’Ekorona burhondera omu mwezi gwa Kasharhu, 2022, Abahamirizi ba Yehova barhondera okujira entimanano zabo kugerera e Vidéoconférence. Abantu barhakahash’ihika oku ntimanano za busu oku busu, banazikulikira kugerera e Vidéoconférence.

Mwene wirhu Neil Campbell w’e Édimbourg, omu Écosse adesire ntya: “Erhi olwimbo lurhondera, n’erhi ntondera nayimba olwimbo lurhanzi, omurhima gwani gwadurha enyanya z’omwishingo gw’okucib’irhimanana na bene wirhu na bali birhu enyuma za myaka ibirhi rhurhabonana.”

Rhuvuzire Yehova omunkwa kw’eyo migisho erhurhabire rhucib’igaluka oku ntimanano za busu oku busu.—Ennanga 84:10.