Emiliyoni y’Abahamirizi ba Yehova n’abantu basima Ebibliya babuganana lwakabirhi nsiku 7/4/2020 lyo bajira idinye ly’obulagirire bwenene omu kalamo kabo lya liguma omu mwaka, kw’okuderha Kukengera olufû lwa Yezu. Cikoki ogu mwaka, obulwala bw’okuyahukira bw’e COVID-19 bwarhumire el’idinye lyajirwa oku lirhajirwa eyindi myaka yoshi. Bigamba binji biri byajirira entimanano zabo kugerera e vidéoconférence.

Erhi obu bulwa burhangira omu bihugo binji, abakulu b’ebihugo bahanza abantu okurhacibuganana bigusho. Co cirhumire bigamba binji omw’igulu lyoshi biri byajirira entimanano zabo kugerera e vidéoconférence. Na ntyo ko banajira oku biyerekire Okukengera olufû lwa Yezu. Kandi omu kulonza okurhabala bantu banji, eprograme nyarejistre yayishihirwa oku jw.org.

Omu mwaka gwageraga, bantu balushire miliyoni 20 bajire aha Kukengera olufû lwa Yezu. Rhulangalire oku ogu mwaka nago emiliyoni y’abantu bashimba Okukengera olufû lwa Yezu ciru akaba enjira bakolesa, kube oku vidéoconférence, oku telefone erhi kulola e arejistrema oku jw.org.

Omu bihugo binji, obulwala bw’okuyahukira bugendekire bwalandirira na ntyo buli bwahira akalamo k’abantu banji omu mazibu. Rhukwanine rhugendekere rhwaba masu lugenda okulanga bene wirhu omu kurhumikira amarhegeko g’abakulu kuhika obu bulwala buhwe. Ciru akaba ntyo, obulangalire bw’okuli oku Yehova arhurhabala bwanarhushumya rhugendekere rhwarhumikira er’irhegeko lidesire ntya: “Mukajira ntyo kube kukankengera.”​—Luka 22:19.