Okubona abakola bashosi bo bali bagwarhwa duba-duba n’endwala y’e corona, bene wirhu na bali birhu bakola bashosi bagendekire barhumikira n’obwenge boshi oku marhegeko g’abakulu n’okurharhenga omu nyumpa. Cikone ciru akaba ntyo, barhali bone erhi kunyihye obushiru bwabo omu mukolo gwa Yehova. Bali bakolesa e teknoloji mpyahya lyo baja oku ntimanano n’okuhubiri.

Omu Roma (Italie) mwali wirhu muguma ogwerhe myaka 94, abatizibagwa omu mwaka gwa 1952, arhakanacirhenga omu nyumpa embere z’obu bulwala bw’okuyahukira. Ciru akaba akagilola entimanano oku JW Stream, ali kola agwerhe nsiku arhaja oku ntimanano haguma n’ecigamba cage. Cikoki, kurhangira abagula barhonderha entimanano kugerera e vidéoconférence, ali acibibuganana na bene wabo na bali babo n’okuyunguka n’entimanano.

Omu Spanish Fork, e l’Utah (États-Unies), mwali wirhu Stephanie Aitken, aba kaduma, aba alamire omu nyumpa abantu barhaciyemererwa okulambagirira. Mugula muguma na mukage barhabala oyo mwali wirhu w’e Italie okugwasa e aplicasyo y’okuhashisa okujira e vidéoconférence omu kumuhâ amahano omu lulimi lw’orhuduma kugerera oku mulango gw’eciyo. Erhi mwali wirhu Aitken ahashigwasa eyo aplicasyo omu tablete yage, ayihobera. Agwerhe obushagaluke bunji bw’okugendekera aganira haguma n’ecigamba cage.

Omw’igulu lyoshi, bene wirhu na bali birhu, ciru n’abakola bashosi bali bacihangana okukolesa eteknoloji mpyahya lyo bagendekera bahagalika amazibu galesire n’okurhacibuganana kwalesirwe n’eyi ndwala y’okuyahukira omw’igulu lyoshi. Oko kurhukengezize oku Yehova alaganyagya oku olubaga lwage lwanayônke “amônka g’amashanja.” (Izaya 60:16) Rhuyemire n’obwalagale oku agendekera aba ngasi byoshi ly’ashibirira abakozi bage omu kasanzi kabi.