Kugerera oburhabale bw’abagula b’ebigamba, etawi y’e Rwanda n’ey’e Zimbabwe, bakola haguma lyo barhabala bene wirhu na bali birhu bajire omu mazibu gw’okubula ec’okulya erhi eyi ndwala yerhuma.

Omu nsiku 2/4/2020, ekomite y’etawi y’e Rwanda yarhumira abagula amaruba gababwizire balonze ensabu ya bene wirhu na bali birhu bajire omu mazibu gw’okupata eby’okulya erhi eyi ndwala y’ecorona erhuma lyo bahâbwa oburhabale. Abagula ba mw’eco cihugo bacihira haguma lyo bahâ bene wirhu na bali birhu ebiryo n’ebindi bintu by’obulagirire.

Omu kagarhi kw’omwezi gwa kani, etawi yarheganya komite 31 z’okuhâna oburhabale. Ezo komite zagabira emilala eshano y’ebigonje, omuceri, ebishimbo, omunyu, ensukari n’amavurha. Muli ako kasazni milala 7 000 yahâbwa oburhabale.

Enyuma z’okuhâbwa ebyge biryo, mwali wirhu Charlote Nizeyimana n’abana bage basharhu baderha ntya: “Koko bwenene kw’obu burhabale bw’omubiri n’ekiroho mugendekire mwarhuha mw’aka kasanzi kazibu kw’obu bulwala. Ciru rhurhamayiri ebi rhwakaderha lyo rhuyerekana oku rhuli rhwaciyumva.”

Lolaga oku owundi mwene wirhu aderhaga olusiku ayumvagya oku emilala yahâbwa oburhabale. Ahugwîre ntya: “Olo lusiku, mukanie ahola bulya arhalyaga. Ho n’aho mwene wirhu muguma ampamagala oku telefone nyishe ntole ebiryo by’omulala gwani. Nashagaluka bwenene. Najira obudufu boshi ndi navuga Yehova omunkwa.”

Endwala y’okuyahukira ehamagalwa COVID-19 yarhumire amazibu kayushuka oku gandi lugenda okubulirwa n’ebiryo mw’eci cihugo.

Etawi y’e Zimbabwe yajira komite irhanu z’okuhâna oburhabale. Kandi eyo tawi egendekire yalalika bene wirhu na bal birhu bagendekere barhabala bene wabo na bali babo babulirwe n’ebiryo n’ebindi bintu by’obulagirire by’omu kalamo. Obo burhabale buyimangirwe n’amakomite.

Mw’aka kasanzi ezo komite zamakagabira abantu bilo 62 669 by’enshano y’ebigonje, litre 6269 z’amavurha, bilo 3 337 by’ensamaki zihamagalwa kapenta (nsamaki nyûmu) na bilo 5 139 bya bishimbo oku bahubiri 7 319.

Mulume na mukage baciri banafunzi ba Bibliya bananacihangane okuja oku ntimanano za cigamba ciguma barhaligwerhe ebiryo. Bashagaluka bwenene erhi babona mwene wirhu obayigiriza Ebibliya ayisha abalerhire omufuko guyunjwire biryo. Embere z’olo lusiku pasteri w’akanisa kabo ali amayishibaganiza. Ababwira oku bamuhe entûlo lyo ye na mukage bagendigula ebiryo. Erhi bacibonera bone olubero lunene luli ekarhi k’Abahamirizi ba Yehova na pasteri, abo banafunzi b’Ebibliya bahiga okurhenga mw’er’idini lyabo.

Rhulangakire n’obwalagale oku Yehova agendekera agisha ogu mukolo gw’okuhâna oburhabale lyo bene wirhu b’e Rwanda n’ab’e Zimbabwe bagendekera bahâbwa ebintu by’obulagirire babulirwe nabyo.​—Ebijiro by’Entumwa 11:29.