Obubasi bw’enyumpa mpyahya ebiro by’etawi byahamiramwo, buli bwajirwa e Lubumbashi omu République Démocratique du Congo. Babetelite 260 bali barheganyizibwa okuhamira mw’ezo nyumpa mpyahya kurhangira omu Mwezi gwa 5, 2022. Babetelite 131 bo babêra omu nyumpa ebiro by’etawi by’e Kinshasa birimo ene. a Na kandi obubasi bw’ezindi nyumpa z’okulamamo n’ebiro bwarhangire hofi n’aha etawi ya buno y’e Kinshasa eba. Babetelite 48 bo barheganyizibwe okuyish’ihamira mw’ezo nyumpa mpyahya kasanzi kalebe enyuma z’Omwezi gwa 1, 2024. Ezo nyumpa zoshi zarhabala omukolo gw’eciteokrasi gugendekere gwaja mbere omu Congo Kinshasa n’omu Congo Brazzaville.

Omu mwaka gw’omukolo gwa 2021, bene wirhu b’omu République Démocratique du Congo balongozize mafunzo g’Ebibliya 250 000, na kulusha. Bantu balushire muliyoni muguma bahisire Ahakukengera olufû lwa Kristu. Ene, Babetelite 394 bo bali bakola omu tawi y’e Congo Kinshasa.

Bulya enafasi zabire nsungunu oku beteli y’e Kinshasa, bene wirhu balonza omu zindi vile aha bakabona enafasi nnene. Babona enafasi eshinganine e Lubumbashi yakayeneramo enyumpa mpyahya z’etawi n’ezindi nyumpa zakakolesibwa omu kasanzi kayisha.

Eco ciwanja c’e Lubumbashi ciri oku bilometre 2 300 n’e Kinshasa. Ciri ca hektare 12, cajamo enyumpa z’okulamamo, ebiro, enyumpa y’okubîkira ebintu, enyumpa y’okujiriramo bintu binji n’ecumpa c’okuliramo.

Obo bubasi bwarhonderaga omu Mwezi gwa 11, 2020, cikone obu bulwala bw’ekorone bwahumire kw’ogo mukolo.

Mwene wirhu Robert Elongo, w’omu Komite y’Etawi y’e Congo (Kinshasa), ahugwîre ntya: “Efrontiyere zali nyigale. Birhakacihashikine okupata ebikolanwa by’obubasi n’oko kwarhuma omukolo gwayusa kasanzi kanji.”

Ciru akaba ntyo, Mwene wirhu Elongo adesire ntya: “Omu kasanzi ka mwaka muguma gone, rhwali rhwamayusa bigabi 40 okw’igana by’omukolo murhanzi gw’obubasi.”

Rhuli rhwabona n’obwalagale gurhi Yehova ali agisha ogu mukolo gw’obubasi. Rhuli rhwashenga ly’obu buhirhi buyushûsire oku buhirhi bwa Kristu buhâna obuhamirizi n’okukuza izino lya Yehova Nnâmahanga.—Mateyo 24:47.