Omu nsiku 20/2/2022, Amandiko g’Ecigiriki g’Ecikristu g’e Tafsiri ya Ulimwengu Mupya omu lulimi lw’Ekipende gahânwa amango g’eprograme yali arejistre embere z’akasanzi. Mwene wirhu Nicolas Hifinger w’omu Komite y’Etawi y’e Congo (Kinshasa) yewatangazizagya bahubiri hofi 10 000, okubaho kw’ago Mandiko omu forma y’ecielektronike. Ebibliya ncape oku rhuradasi zabonekana omu mwezi gwa Kani, 2022.

Omukolo gw’Abahamirizi ba Yehova baderha olulimi lw’Ekipende gwarhonderaga omu mwaka gwa 1960, erhi mulume muguma ohamagalwa Makanda Madinga Henri ahâbwa Ilabiro ly’Akalalizi. Erhi ayus’ilisoma, ayemera n’obwalagale oku eyo myanzi eri y’okuli anarhondera okuganirira abandi kw’ebi akag’iyiga. Ahikira aha abatizibwa aba muguma w’omu Bahamirizi ba Yehova. Enyuma z’aho ecigamba cirhanzi c’olulimi lw’Ekipende carhondezibwa e Kiefu omu mwaka gwa 1979.

Eyi Bibliya yarhabala bene wirhu na bali birhu amango g’ifunzo lyabo bone n’omu mukolo gwabo gw’amahubiri. Kwa lwiganyo, Mwene wirhu Hifinger ahugwîre oku eyo Bibliya mpyahya eri “y’okuli na nembu okuhugûkwa,” na kandi “egalwire izino lya Yehova ngasi hoshi lyali omu mandishi ga mîra.”

Rhuli rhwashenga Yehova lyo eyi Tafsiri ya Ulimwengu Mupya erhabala bene wirhu na bali birhu bagendekere ‘bayâna amalehe omu ngasi bijiro binja, banayushûke omu bumanye [burhalimo magosa] bwa Nnâmahanga.’​—Abakolosi 1:10.